Isaya 14 - Angami Naga CL (Re-edited) Bible (BSI)

Juda Ze La Vorkeshü

¹ Derei Jihovae Jakob ngumezhieshütuo mu Israel keda lalietuo, sidi unie pie unie kijü nu lashütuo; mu chazoumia unie salietuo, di u thuo u khapie Jakob kiu ku tuotatuo.

² Siro seyiekoe uko zelietuo di uko ze vor uko bako nu shütuo, sidi Israel kinukoe Jihova kijüu nunu thenu rei thepfu rei pie u die kechü tuoi seyieko pie uvie chütuo; ukoe uko keteko telietuo, mu uko kepeseko mho dituo.

Babilon Kedi Kaketuo

³ Jihovae n mezhieko nu mu kebvükecü siro mhatho kere chükecüko nunu kerülei pie n tsükeshü ki,

⁴ noe Babilon kediu kre di die hau putuo: Kimhie di mia kepeseu jüte mu! Kimhie di kemiako kemelhakecüu jüte mu!

⁵ Jihovae kelhieko the, kezhako the bietshewate.

⁶ Süue noupfhü se mia vüthorkeshüko, nouyieu se mia pesüpemvü di seyieko mho dikecüko.

⁷ Kijü peteu rülei mu zei bate; ukoe tsali chü zo parte.

⁸ Saipresboko n gei u neiya, Lebanon nu Sedarboko rei sie, “N pie kerünuowaketa la, miapuorei hie wiwatuoü vor mote” situo.

⁹ N kevor ki n zelietuo üdi pekhro nu Sheol rübvürübie bate; thiedzü kijü nu krütako bu n kelutuo üdi uko ruopfü kesoushüzhie; seyieko kediko rei kedibako geinu uko bu sietazhie.

¹⁰ Uko peteko rei die putuo mu sie n ki: “No rei hieko tuoi thachüte! No rei hieko mhiete!” ituo.

¹¹ N mholieu pie ke Sheol nu shüwate, mu n übou pfheu sa di; pesa bu n khronu n zhüu chü, mu zochü bu n kewhe chüte.

¹² He-i khinhie Mvüu, Teikeso nuou, No teigei nu kiki zo di tetsuta mu! No seyieko bie kerünuoshüshü kevor-u, kikidi n dathepie kijü shüwate mu!

¹³ Noe n nou nu sie, “A teigei khotuo; a kedibau piesie Kepenuopfü themvüko mho shütuo; ae Zafon kerükrieko gei; kehou kijüthouu gei batuo,

¹⁴ ae kimhouko rükrie mho sietuo, a thuo a chüpie Kerükrietho-u mhielietuo,” si.

¹⁵ Derei n pie Sheol nu kewate, Kheho kesoutho-u nu.

¹⁶ N kenguko n meho terütuo, sidi n gei hakemhie letuo: “Kijüu biepie pekeshüu, kedirüvieko keniekeshüu,

¹⁷ Kijüu biepie kijükesia chükewau mu süu nadiko biekhrükewau, puo dieko bu u kinu vo mvüketau hau me?” ituo.

¹⁸ Seyieko kediko pete mesümede di u thuo u mekhru nu zhü;

¹⁹ derei no we kesiamo kerütse puo tuoi, n mekhru nunu n chü kelhouwate, zhiecha se rhükhrikewako, Kheho-u tsieko nu ketsu kesiako pie n pfhedzie chü di kesiamo puo u phi pie kedekewa mhiete.

²⁰ N pie uko donu khrulie lho, kekreilamonyü n thuo n kijü pekawa, n thuo n themia dukhriwate. Kesuo kechümia seüyieko za pu sa mo üthienyü!

²¹ U puonuoko kejo la u nuonuoko dukhriwaketuo keseliecie, uko bu sie kijü pevie morei nadiko chüpie kijüu ketshu chü lalie lho zo.

²² Ae sie uko perhietuo, krodiko Jihovae siya, di Babilon nunu uko za mu uko lhiekelieko, uko nuonuoko mu uko yieko dawatuo, Jihovae siya.

²³ Tsiu a süu pie chiekru kebachü chüwatuo, mu dzü kethou zieko chüwatuo, mu kepeka phipfeu pie a sie tshowatuo, krodiko Jihovae siya.

Asiria Dze

²⁴ Krodiko Jihovae rüsekeshü: A rhilieketa mhiei, süu bu sütuoi zotuo; mu a rhülieketa mhiei, süu bu si vor zotuo:

²⁵ A a kijü nu Asiriau biewatuo, mu a kijüthouko geinu a phipie puo kedewatuo; puo vocieu uko geinu chüwatuo, mu puo pieu uko bouka geinu lhouwatuo.

²⁶ Kijü pete la rhülieketa mharhüu sü hau zo; mu seyie pete la yhase keba dzieu sü hau zo.

²⁷ Krodiko Jihovae rhüliete eru, mu supuonie süu valie ta? Puo dzieu yhapie bate, mu supuonie süu kerei lalietuo ga?

Filistia Dze Pukeshü

²⁸ Ahaz kediu siaketa cie die hau vor:

²⁹ Nie nei hiecie, nie Filistinko pete, nie kevü seiro-u tseta üdi, kekreilamonyü tinyhüu mieu geinu nyhübvü puo partuo, mu süu siue tinyhü kekhrie pruokecü puo tuo.

³⁰ Kejümia nuorieu pevütuo, mu ketsopfhüu khrukhre di zhütuo; derei ae pekrie pie n mieu vakhriwatuo, mu a n geinu lhiekelieko dukhriwatuo.

³¹ Kraliecie, he-i kharuu; shieliecie, he-i nadiu; kemichie nunu zetacie, he-i Filistin, nie pete! Pesotsa nu mikhu parketa la, mu puo kroko donu rügeketuo jükecü la.

³² Kedipuo se seyieu dielieko die kelashü ta? “Jihovae Zion piesieshüte, mu puo themia donu ketsopfhüko puo geinu u keya ngulietuo.”