Isaya 13 - Angami Naga CL (Re-edited) Bible (BSI)

Babilon Petsou di Pukeshü

¹ Amoz nuou Isayae Babilon gei vorketuo ngukecü.

² Kijüthou methuocü puo gei zasi puo piesieshü, uko ki melie petoshülie; uko bu pehüko careu nu lelieketuo la dzieziepie uko kieshülie.

³ A a thuo a themia chü kemesakelieko ki diekhashüte, a nouyieu se mhachüshüketuo la, a terhümiaviko, a uko la kemiakoyakecü keviko kieshüwate.

⁴ Rünyüliecie, kijüthouu gei mhapfhe puo themia krodi puo meliekeshü tuoi! Rünyüshücie, kedi kekreikreicü, seyie kekreikreicü vor kengukelie pfhe! Krodiko Jihovae terhü chütuo üdi rüpfhünuo kie kenguzhie.

⁵ Ukoe kijü kepecie nunu, teiko thelatsa nu vorzhie, Jihova mu puo noupfhü rünyiekoe, kijüu pete pekawatuo üdi.

⁶ Kraliecie, Jihova teisozhau penuoketa la; Kuokejokejüu kinu kepeka kevor tuoi süu vor zotuo!

⁷ Süla thedzie pete thachütatuo, mu themia pete melou ze jütatuo,

⁸ tsiu ukoe thedzükoutatuo. Kechü mu keziekere uko telietuo; uko thenumia nuonuovachü tuoi meyhumezhietuo. Ukoe huoniehuo meho thopfü thatatuo, uko zie tu partatuo.

⁹ Harie, Jihova teisozhau vorzhie, zhosuo, noupfhü mu nouyie kemerie se di kijüu pekaperuowatuoü siro sünunu kephoumako pekawaketuo la.

¹⁰ Teiko gei themvüko mu themvü kroko, uko kezie khashü motatuo; niakithu kepar nu rei zeitatuo, tsiu khrü puo kezieu bu zieshü motatuo.

¹¹ Ae kijüu kesuo la siazha pie puo tsütuo, mu kerüzhümia u kephouma la; ae uko kemelha di kelhieketuou pie puo thela chüwatuo, mu kerüzhakezhako bie kerünuowatuo.

¹² Ae themia biepie suna kemesa ki rei tsakuowatuo, mu themianuo bu Ofir suna ki tsatatuo.

¹³ Süla ae teiko chüpie peshütuo, mu kijü keniepie puo ba nu ba motatuo, Krodiko Jihova noupfhünouyieu kemerie chü kesie nhie,

¹⁴ Chüzhie-e chüwhuomia kinu talietuoü ketuo tuoi, morei tekuo puo kepfhe kejü tuoi, mia pete puo thuo puo themia kitsa vatatuo, mu mia pete ta puo thuo puo kijü nu votatuo.

¹⁵ Kehoupuorei ngukelieu rhükhriwatuo, mu kehoupuorei tekelieu zhiecha geinu siatatuo.

¹⁶ Uko mhinguki nu uko nuoranuoko vütshiewatuo; uko kiko vawatuo, mu uko nupfünuoko shüwatuo.

¹⁷ Harie, ae uko perhietuo üdi Mediamiako, rakachü ü mhaü kemoko mu suna u neiya kemoko, pfükerhüshüzhie.

¹⁸ Uko theü khriesako vakhriwatuo; ukoe nuobvü siu ngumezhielie lho; uko mhi-e nhicumia ngumezhielie lho.

¹⁹ Siro Babilon, kedirüvieko zapuzayieu, Chaldiako zayieu mu uko mholieu, Sodom mu Gomora mhietatuo, Ukepenuopfü uko pekakewa nhie.

²⁰ Sünu mhakipuorei rüna chü lalie lho morei thephou puorei sünu lhou lalie lho; Arabmia puorei sünu puo pfheki pethoulie lho, kuopfheko puorei puo kuo bu sünu zhülie lho.

²¹ Derei nhachüko sünu zhütuo, mu ruo kekuo khunuo thuo uko kiko tshutuo; sünu Ostrikko thuo lhoutuo, mu thelouko thuo puodo whuotuo.

²² Puo rükhoubako gei haina thuo vo ruotuo, mu puo kediki keviko nu meseruko thuo batuo, puotei süu penuo bate, mu puo teisozhako pecha salie lho.