Isaya 11 - Angami Naga CL (Re-edited) Bible (BSI)

Jese Co-u Kemiatho Kedi

¹ Jese mvü nunu puo nuothe puo partuo, mu puo mieko nunu puoco puo lhou partuo.

² Jihova ruopfüu puo gei balietuo, mhasi mu kesikele ruopfüu, mharhükesi mu kekuo ruopfüu, mha kele tsiu Jihova keprei ruopfüu.

³ Jihova kepreiu pie puo kenei chütuo. Puoe puo mhipie kenguu geinu morei puo nyie pie kesiu geinu mha pepishü lho;

⁴ derei puoe kemezhüu pie kejüko ca catuo, mu ketho se di kijü nu kokemoko la mha pepituo; puoe puo tie seitau pie kijü vütuo, mu puo me thesü pie kerüzhüko dukhrituo.

⁵ Kemiatho pie puo chieca kepha chütuo, mu kedietho pie puo chiepha chütuo.

⁶ Socie-e tekuonuo ze batatuo, mu khurhüe temvünuo ze zhütatuo, siro mithunuo, losha mu kirinuoko kezelietuo, tsiu nhicumia yopuo thuo uko cha thatuo.

⁷ Mithu mu thega keze nha cütuo, uko nuonuoko keze zhütuo; siro loshae thudo tuoi rügu cütuo.

⁸ Kenunuoyo nyhübvü kerhupfü ki mho geinu puo meruochütuo, mu thekhonuoyoe puo dzie pie nyhübvüpfü ki pemoutuo.

⁹ Ukoe a kemesa kijüthouu gei mha bie pesuo morei bie pekalie lho; dzüe dzükezhau tshupfü keba tuoi, Jihova mhasi thuo kijü ketshu chütaketuo la.

Lhiekelieko Zayie Chü di La Vorkelie

¹⁰ Sünhie Jese mieu themiako mhodzünu zasi puo tuoi thalietuo; seyiekoe puo dze ketsotuo, mu puochü puobako zayie chü zotuo.

¹¹ Sünhie Jihovae va kenieu puo dzie yhashütuo, puo themia lhielieketako pfhü kengulieketuo la; Asiria nunu, Ijipt nunu, Pathros nunu, Ethiopia nunu, Elam nunu, Shinar nunu, Hamat nunu mu dzükezha khie kijüko nunu.

¹² Puoe seyieko la zasi puo piesieshütuo, mu Israelmia mia u thicüko pfhü kengu lashütuo, tsiu Judamia cüreketako kijü ke diako nunu pfhü kengushütuo.

¹³ Efraim mia ngu puo rokecüu ba motatuo, Juda kemhimvükecüu dathewatuo; Efraim-e Juda ngu puo ro motatuo, mu Judae Efraim ngumvü motatuo.

¹⁴ Derei unie thutsu niakratsa Filistin boukako vatuo, di unie keze niathutsa themiako pekatuo. Unie unie dzie pie Edom mu Moab petsoutuo, siro Ammonmiako unie die zetuo.

¹⁵ Siro Jihovae Ijipt dzükezhau meü bie pesuo phrewatuo; mu puo teikhrie keleu se kerüu mho puo dzie keleshütuo, di süu chüpie rücü thenie chüwatuo; sidi pephi tuolie kevi cha chüshütuo.

¹⁶ Siro puo themia lhiepie kebako la Asiria nunu chaü puo bu balietuo, Israelkoe Ijipt kijü nunu kepar ki uko la bakecü tuoi.