Isaya 10 - Angami Naga CL (Re-edited) Bible (BSI)

¹ He-i ketou kemo zho rhükeshüko, mia neketekecü zho thukeshüko,

² kethocau nunu ketsopfhüko kelhiketuo la, mu a themia kejümiako mezhüu pejüketuo la, mu samipfüko pie nie mhava chüketuo la, mu merünuoko pie nie chüte chü tuoketuo la!

³ Siazha khakeshü nhie, kepecie nunu kepeka se vorketuo nhie no kedipuo chülie ta? N kekhruohi la supuo pfhü ta? n kinyi pie kirapuo batuo ga?

⁴ Sütuoi kedieko donu gou tuota moketuo la, mu dukhrikewako ze tetsuta moketuo la. Hai shierei puo nouyieu rüdita mo; puo dzie yhapie ba zo.

Asiria Pejokewa

⁵ Ce, chülietie, Asiria, a nouyie seiro-u, uko dzie nu seitau sü a nou kerüpeu!

⁶ Pele kemo seyieu petsouketuo la a puo ketseshü, mu a noupfhü pfü keba themiako petsou di a puo ki diekhashü, mha ketakelieko mu pekakelieko selie, mu chako nu nyoba tuoi uko kedewaketuo la.

⁷ Derei puo lekecü hau mo, mu puo noue sükemhie medo mo; derei mha pekaketuoue puo nou ba, mu huoyo mo di seyie kekra dathewatuo ükecüu.

⁸ Kekreilamonyü puoe sie: “A rüpfhünuo mhokezhako pete puo kedimia phre mo üme?

⁹ Kalnoe Karkemish mhie zo mo üme? Hamat-e Arpad mhie zo mo üme? Samariae Damaska mhie zo mo üme?

¹⁰ A dzie-e vo terhuorhi kedibako tsokecü tuoi, uko mharhiko Jerusalem mu Samaria nu mharhiko ki zhakuo.

¹¹ A Samaria mu puo mharhiko gei chükeshüu Jerusalem tsiu puo terhuorhiko gei rei chüshü motuo me?”

¹² Niepuue Zion Kijüthou gei mu Jerusalem gei puo mhatho-u chü tseiwa tse, puoe siazha khapie kemholiekeba mu kemharhükecü Asiria kediu petseishütuo.

¹³ Kekreilamonyü puoe sie: “A dzie kekuou mu a mhasi pie süu chülie, ae kesikele bakecü la; ae themia kijü rieko biewate, mu uko kinyi vawate; thudo mhie ae kediba gei kebako sekerwate.

¹⁴ A dzie perakru keli tuoi, themiako kinyi liliete; mu mia peradzü vawaketako chü kengulieyakecü tuoi ae kijü pete kenguliete, mu mhapuorei shüphra rei mo, morei tiega rei mo, morei mecu rei mo” si.

¹⁵ Seidurüe puo kepieu ki kemelhalie vi me? Morei seigeizhie-e puo keseu mhodzü puo thuo puo chü pezhatuo me? Seiroe puo seketuou piesie, morei ketheue sei kemo puo piesietuo me?

¹⁶ Süla Kediu, krodiko Jihovae puo terhümiaviko gei weto votayakecü kechü kere puo ketseshütuo, mu puo zapuzayieu khro mhaketu puo petushütuo, mi ketu tuoi.

¹⁷ Israel keziee mi puo chütatuo, tsiu puo Kemesau miü puo chütatuo; sidi süu tu di khunhie vachü puohuko siro huphienuoko the mu pekawatuo

¹⁸ Puo ketsa kevi mu puo kijü keviu, puo ruopfü tsiu puo mo rei Jihovae pekawatuo, mu süue mha suota di khakewa vie mhie votatuo.

¹⁹ Puo tsa mu lhiepie keba seiboko tsatsa vo nhicumia yopuo thuo rei phrüpie thulie vitatuo.

Israel Lhiekelieko

²⁰ Sünhie Israel lhiekelieko mu Jakob kinumia rhei kebako puo vükeshüu gei vakhrie motatuo, derei ketho nunu Jihova, Israel Kemesau vakhrielietuo.

²¹ Lhiekelieko, Jakob lhiekelieko kekuou Ukepenuopfü ki la vortuo.

²² Nie themia Israel-e dzükezha huocanyo mhie shierei, lhiekeshü huoyo rübei la vortuo. Kemiatho pie ketshukezie chü di kepeka vorketuo pushüwate.

²³ Jihova, Krodiko Kepenuopfüe peka tseiwatuo üdi pushüwaketau, kijü pete nu chüshütuo.

²⁴ Süla Jihova, krodiko Kepenuopfüe puya: He-i, a themia, Zion nu kebako, Asiriako, Ijiptmia tuoi di seiro pie nieko vü mu kethe yha siekecü ki uko prei hiecie.

²⁵ Kekreilamonyü pecha mo di a nouyieu puo thela chütatuo, mu a nei kemo-u uko bie pesuokecüu nu phitatuo.

²⁶ Krodi Jihovae Oreb tsiekrieu kinu Midian biekewa tuoi, uko vütuo, siro puo theue dzükezha mho sietuo mu puoe süu Ijipt nu pesiekeshü tuoi pesieshütuo.

²⁷ Mu sünhie puo pieu n bouka geinu lhouwa, siro puo vocieu n vo geinu bie pesuowatuo. Puoe Rimon nunu khote,

²⁸ puo Aiat nu vorte, puo Migron pfüthe vote, Mikmash nu puo nya khapie bawa;

²⁹ uko puozhau ciepfüte; theva Geba nu zhü; Ramae pe bate, Saul Gibiau tate.

³⁰ Shiekhouishücie, he-i Galim nuopfü! Rünyüshücie, he-i, Laisha! Puo die kelashücie, he-i Anathot!

³¹ Madmenah tatuote, Gebim nu kelhouko krulietuo üdi tate.

³² Thie teiso, puo Nob nu batuo, puoe puo duthe kesüpie, Zion nuopfü kijüthouu kietuo, Jerusalem kijükhruu.

³³ Harie, Kediu, Krodiko Jihova, kuo kemerie di puo coko sawatuo, sei kerükriethoko wiwatuo, mu kerükrieko bie kerünuowatuo.

³⁴ Puoe ketsa nu sei kedeiko seidurü se wiwatuo, mu Lebanon puo seibo kezhako ze tetsutatuo.