Isaya 1 - Angami Naga CL (Re-edited) Bible (BSI)

¹ Amoz nuou Isayae Juda kedi Uzia, Jotham, Ahaz mu Hezekia teiki Juda mu Jerusalem dze ziemho ngukecü.

Juda kesuo

² He-i teiko, rünyüshü, mu n nyie kedeishücie, he-i kijüu; Jihovae pushüte: A nhicuko theke di uko sesiershü, derei uko a perhiepetsoute.

³ Thudo we puo keperiu siya, mu gada zorei puo niepuu mhacabouu siya, derei Israel we si tuo mote, a themiako we mhacamhala si mote.

⁴ Ce! kephouma seyie, kejokemou pie u pie chüpfüketuo themiako, kesuo kechü yiemiako, kesuo chüyakezha nuonuo, Jihova khawaketako, Israel Kemesau rütseyakezhako, mhapuorei kepfhesi tuo moketako!

⁵ Kiüdi nie vü sakecü pfhüya ga? Nieko kiüdi dieze nu lhou mvü ba zo mu? U tsü pete kekrü bate, mu u melou pete meziete.

⁶ U phizhü nunu kho u tsüle ketso, puotoukecü puorei tuo mote, derei vümvü mu kechüpfü tsiu thezie rüzapfü zote, süko ne reiwa mo, morei pha rei shü mo, morei tier pie va kemene rei mo.

⁷ Nie rüna ruo zhüte, nie nadiko mi bu thewate; nie mhinguki nu solhimia bu nie kijü mezuliezhie; chazoumia bu vawa mu ruo zhüte.

⁸ Siro Zion nuopfü bu khubelie nu pru yopuo tuoite, tsütuo lie nu pru puo tuoi; mia bu puo rekeba rüna puo tuoi.

⁹ Krodiko Jihovae huoyo lhiepie u tsü motuo ücü we, úko ha Sodom mhie zotuo, mu Gomora mhieta zotuo.

¹⁰ Jihova die rünyüliecie, nie Sodom mhokezhako! Ukepenuopfü u kepethadie rünyüliecie, nie Gomora nu themiako!

¹¹ Nie ruothoruoriko chü phikeshüko a la kedipuoü mu? Jihovae siya. Ae tekuochü mu puophou kevi khunuo shuo, mu kethe ruosuo ngu a nyiete; thudo zie, morei tekuonuo zie, morei temvü zie rei a neiya mo.

¹² Nie a mhodzünu kevor ki, supuonie nie dzie nu hau cha mu? A kitiezha kede sa motalie;

¹³ ruosuo se kevor kemethuo zo; mha kethengu a la kerütse. Khrülhou mu Sabat siro kiekeshü kehou mu kejokemou kenyi kehouko a hie salie kenjüte.

¹⁴ A ruopfüe nie khrülhouko mu nie nyiko rütseya; süko a la thepie puo chüte, a süko toupfü a nyiete.

¹⁵ Niekoe nie dzie yhakeshü ki, nie kinu a mhi kevietatuo; nieko kecha chü phi zo shierei, a rünyü lho; nieko dzie sü thezie thuo tshu.

¹⁶ Nie khrüwaliecie; nie chü kemesalie; nie mhatho kesuoko a mhinguki nu setalie; kesuo chü sa hie,

¹⁷ mha kevi kechü dojülie; kethocau pfhülie, mia u peseyakezhako kelashülie, merünuomia yapielie, samipfüko zhapulie.

¹⁸ Jihovae puya: Tsie vorlie di úko keze mharhü kekie khe, nie kephoumako thuo merieyhara zorei, süko krapie pekrie mhietatuo; ukoe merie pie meriekrü zorei, uko tekuo mie mhielietuo.

¹⁹ Nie chü nyü siei mu dieze chü keba sie, nie kijü keviu cüükrietuo;

²⁰ derei nie mvü mu mia petsou ro, zhiechau bu nie cülietuo; Jihova tie thuo pushüte eru.

Suoketa Nadiu

²¹ Kimhie di kemiatho nadiu thethenumiapfü puo chüta mu! Hapfüe kethoca pie puo tshupfü zomu ru! kemiatho puo gei tuoya ru, derei tsie we kedukhrimia thuo tshute!

²² N rakachü puolhe puochu chüte, n khubezu dzü pie reite.

²³ N kedinuoko mia kepetsoumiate mu kerügumia ze khrietho chüte. Mia pete theso u neite mu mha u ketsüko whuoya. Ukoe merünuomia yapieya mo, mu samipfüko yau u mhodzüki tuo mo.

²⁴ Süla Kekuotho-u, Krodiko Jihova, Israelko Kekuoue puya: He-i, a a ngumvüko gei a noupfhü rushütuo, di a perhiekecüko gei a kheputuo!

²⁵ A a dzie pie nie gei shütuo; sidi mige dzü pie thezhübuo the pezhawayakezha tuoi n kerhu pete bie pejüwatuo.

²⁶ Kerieki mhiei a n capimia kha lashütuo, sede ki mhiei mharhükesiko kha lashütuo. Süze kenuotsa n üse kemiatho nadiu, kedietho nadiu üdi kietuo.

²⁷ Kemiatho se Zion rhalietuo, mu kemiatho pie puo ze keba, thenou kedikelieko rhalietuo.

²⁸ Derei mia kepetsouko mu kephoumako peka kesawatuo, mu Jihova rükra moketako bie pejüwatuo.

²⁹ Nie phriebo nie neikezhako la mengatatuo; mu nie kedakelie tezieko la nie ziekejü chütatuo.

³⁰ Nie phriebo puonyü rüwitayakezhapfü tuoituo; mu dzü kejü tezie puo tuoitatuokecü la.

³¹ Kekuomia teisedo mhietatuo, mu uko mhathoe mi kepro mhietatuo, sidi uko mu uko mhatho keze tutatuo, miapuorei unie pemhekewa jü di.