Ibriko 9 - Angami Naga CL (Re-edited) Bible (BSI)

Kijü Hau mu Teigei Rüsuo

¹ Siro dietseidiekho kerieu nu zorei kerüsuo zhoko nyi mu kijü nu rei kemesachüu nyi.

² Kekreilamonyü rüsuopfheki puo chülie, süu kerieu, mu sünu mitubau, mizhüu, mu Kepekieniekhrüdau khapie ba; hau üse Kemesachü üya.

³ Siro süsieu nu pfhe lhapie khakecü bouu üse Kemesa sie rei Mesa iya.

⁴ Sünu kethengu kethe suna ruosuobau mu dietseidiekhobouu, pete suna pie dakecüu, suna pie kechü li manna pie shüse kebau, Aron the puonyü the zo parketau, tsiu dietseidiekhokelie tsiekranie rei pie zhü;

⁵ sümho gei zayie kechü cherubnie unie shü kelhapie ngukemezhiebau whepfü ba. Tsie mha hako dze pede pu balie lhote.

⁶ Mha süko keselie di zievoko bu rüsuopfheki kerieu nu le ruosuo chü seiya;

⁷ derei zievokezhatho-u rübei kibou kenieu nu lelie kevi zo, siro puo rei cie puo nu va puo rübei leya, mu puo süki thezie se di puo thuo puo la mu themiako le kemo nunu kephouma chükewako la le ruosuo chüya.

⁸ Haha la rüsuopfhekiu nu kibou kerieu keba chie kemesatho chüu nu leketuo cha khrüshü mo zo üdi Kemesa Ruopfü thuo thashüte.

⁹ Hau pie tsiedo teiu la zasi puo chüshü, sütei ki mia puoe puo mha khakeshü mu khunuo dukhripie ruosuo chükeshüko la puo nou chü pevi tseilie kenjü,

¹⁰ derei mhako chüpie puotoulieketuo teiu vor kemochie kecükekrie mu u chü kemesaketuo zho kro puo zo.

¹¹ Derei Khrista vor di mha kevi vorketuoko mho zievokezhatho-u chülieta tse, puoe (thedzie üse chü kemo, süusü tsiedo mhachükelieko mhie mo di), rüsuopfhekiu ki zhakuo mu vi tseikecüu nu,

¹² puoe vapuochü Kemesatho Chüu nu le ruosuo chüwate, sünu temvü mu mithunuo zie se mo, derei puo thuo puo zie se le di kechachie la rhakelie se vorshü.

¹³ Kekreilamonyü temvü tsiu thudo zie mu thuünuo thekeshü mige kegepie themia u perhuwaketako chü kemesalieya liro,

¹⁴ süki rei Khrista zieu we u chü kemesakuoshü motuo me, puoe kechachie Ruopfüu geinu puo thuo puo chüpie pejolie kelho chü Ukepenuopfü tsükeshü la, sidi kesia mhatho chü tuoketa nunu u chü kemesawa di u bu rhei tuoyakezha Ukepenuopfü lie chüketuo la.

¹⁵ Hau la puo dietseidiekho kesa nu thedo nu kethau chü, sidi kielieketako bu phrapie kezhü kechachie baketuo kayie welie vite, kekreilamonyü dietseidiekho kerieu khrükhro ketuo teiki rei jo tuoketako rhalieketuo la puo siashü zo.

¹⁶ Siro mha pupie mia tsükeshü die puo nyi üro, puo se sie nu kekreiu bu süu ngulieya.

¹⁷ Kekreilamonyü phrakeshüu se sie nu süu puo kekuo nyitaya, derei puo chükeshüu rhei keba chie we mhapuorei chülie lho.

¹⁸ Sütuoi dietseidiekho kerieu zorei thezie sa mo di chülie mo zo.

¹⁹ Kekreilamonyü Mosae thezho-u medzi di diekhakeshü pete pie themia peteko ki pukeshü ki, puo thudonuo mu temvü zie pie dzü sa kereilie mu chümielo kemene pie hisop nha gei phakelieu petselie di kegepie thezho leshüdau mu themiako va phreshü zo.

²⁰ Sidi sie, “Hauha Ukepenuopfü nieko ki die khakeshü dietseidiekhokelie zieuwe,” iya.

²¹ Sükemhie di thezieu kegepie rüsuopfhekiu mu rüsuo nu seyakezha mhabou pete rei vashü.

²² Ketho, thezho-u nu zorei thezie se mha pete khre chü kemesalieya, mu thezie sa mo di kephoumako valieya mo.

Khrista Seu La Kephouma Vakelie

²³ Siro teigei keba rhi hako thuo rei mha süko se chü kemesalie morosuota ro, teigei keba vieko zowe süko ki rei ruosuo kevi se morosuokuo zo.

²⁴ Kekreilamonyü Khrista zowe themia dzie se chükelie kemesachüu nu le mo, süu ketho-u rhi puo zocü la, derei puo teigei le di tsie u sou chü vo Ukepenuopfü mhodzünu bate.

²⁵ Sizomonyü zievokezhatho-u puo thuo puo zie monyü perinuo zie se di teiciekepra kemesachüu nu le sei tuoyakezha tuoi Khrista zowe tsiemelie puo phou pie ruosuo chüchü balie lhote;

²⁶ simotuo ükecü sie kijü chülie tsenu vor kenuotsa ketso puo tsiemelie kemezhie morosuota zotuo. Derei puo mia mhingu chü vor di kephouma valieketuo la puo thuo puo pie vapuochü ruosuo chüwate.

²⁷ Mu themia bu va puo sia phre di süsie ketsokecü vortuoüwaketa tuoi,

²⁸ Khrista rei themia kekra kephouma pfülietuo üdi vapuochü puo phou khashüwate, mu puo vorketuo va kenieu we kephouma dze la monyü puo merü kelho di pfhe kebako kelalieketuo la vorcü zotuo.