Ibriko 8 - Angami Naga CL (Re-edited) Bible (BSI)

Jisue U Zievokezhatho-u

¹ Hie pu keba ca kemeyieu sü hau zo: teiko gei Kezhatho-u kedibau zatsa baketa u zievokezhatho hikecü puo bate,

² puoe themia bu monyü, Niepuu thuo chükeshü kemesachüu nu pfheki ketho-u nu lietho chü bate.

³ Kekreilamonyü zievokezhatho kehoupuorei kedapie puo bu mia mha khakeshüko khashü mu ruosuoko chüya; süla zievo hau rei mha huo khashü morosuota.

⁴ Mhanuü puoe kijü nu ba üro puoe zievomia puorei mota zotuo, kekreilamonyü zievomiako thezho-u medzi di ruosuo khakeshüko mezalie kevi bacü la.

⁵ Uko kemesachü nu rüsuoe teigei chüketuoko rhiu mu puo khrüu zo; kekreilamonyü Mosa rüsuopfhekiu pethoutuoü kesie ki, puo tarho di, “Kijüthou geinu thapie n pekiekeshüu medzi tou di chüliecie,” ishü zo.

⁶ Derei tsie we Jisu lietho vikuokecü puo nguliete mu puo thedo nu dietseidiekho vikuokecü puo chükelie rei phrapie kezhü vikuocü puo geinu puo mvüdze chüliete.

⁷ Kekreilamonyü dietseidiekho kerieu vi tsei üliro, kekrei puo pfhü saketuo ba ba mo.

⁸ Ukepenuopfüe süu vi tsei kemo ngu di pukecü: “Teisozhako vorzhü tou zo, Niepuue siya, a Israel kiu mu Juda kiu ze dietseidiekho kesa puo chüketuo ki;

⁹ a uko puonuoko ze dietseidiekhokeshüu, a Ijipt nunu uko dzie teshü di uko cha tha ze kepar nhie mhie lho, ukoe a dietseidiekho-u nu tuolie mo, süla a rei uko sanyü mote, Niepuu sidi puya.

¹⁰ Teisozha süko sie a Israel kiu ze dietseidiekho ketuou hauha zo, Niepuue puya: A a zhoko pie uko nou shütuo, sidi uko melou nu thushütuo, tsiu a uko Kepenuopfü chütuo, mu uko a themia chütuo,

¹¹ Siro uko huoniehuo petha morei mia puoe mia puo ki, ‘Niepuu siliecie,’ isi lho, kekreilamonyü uko pete a sitatuo, kecütho-u nunu vo kezhatho-u ketso.

¹² Kekreilamonyü a uko kejokemouko ngumezhieshütuo, mu a uko kephoumako rükra sa motatuo,” si.

¹³ Siro puo “Dietseidiekho kesa puo,” idi pukeshü ki, puoe kerieu chüpie kewe chüwate. Siro selie suoketau mu weketau jü mhaitatuo.