Ibriko 7 - Angami Naga CL (Re-edited) Bible (BSI)

Melkizedek Zievo-u

¹ “Melkizedek hau Salem nu kediu, Kerükrietho Ukepenuopfü zievo rei chü, Abraham-e kediko penyüwa di la vorkezhü ki puo ze kese di japie puo tsüshü;”

² mu Abraham “Mha ngukelie kehoupuo nu rei ker-zapuo” khapie puo tsü. Puo za ca kerieu ro, “kemiatho kediu si,” süsie puo Salem kediu rei sa, puoca, “vitho kediu.”

³ Puo puo, puo zuo, mu puo krü puo pfutsanuoko dze, puo penuokelie mu puo se dze puorei jü, derei puo Ukepenuopfü Nuou kemhie puota zo; puoe kechachie zievo chü sei bate.

⁴ Puo zhapie kedipfü chü shi! Abraham, u pfutsau zorei terhü nu ngukelie pete nu ker-zapuo pie puo tsü.

⁵ Levi yiemiako bu zievo chü mu thezho-u nu uko bu u siezedzürie Israelmia puoca Abraham yiemiako kinu ker-zapuou pfhülienu pupie zhü.

⁶ Derei themia hau we Levi yie geinu lhou sier mo, derei phrakeshüko ngukelie Abraham kinu ker-zapuou lielie di japie puo tsüshü.

⁷ Süu japie mia ketsüu theja piekelieu ki rei zhakuo zo.

⁸ Kesia phou kepfüko bu ker-zapuou lieya, derei puoca kekreiu nu we, rhei tuoya zo üdi pu tuoketau bu süu lie.

⁹ Süla ca puo nu ro Abraham-e ker-zapuou khakeshü ki, Levi rei ker zau khashüwata zo,

¹⁰ kekreilamonyü Melkizedek puo ze kesekecü ki puoe puotsanuo vanu tuo zoluo.

Melkizedek Tuoicü Zievo Kekreiu

¹¹ Siro zievo kechü zho-u pemvü di vi tseikecü ngulieya üro, themiakoe zievo mhatho khronu thezho-u nguliecü la, kiüdi Melkizedek mhiekecü, Aron mhie kemo zievo kekrei puo bu la sier morokesuo pu lata ga?

¹² Kekreilamonyü zievo kedikecü ze di thezho-u nu rei mha huo kedi morosuotaya.

¹³ Siro puo dze pupie kezhü hako lesie ro puo seyie rei krei, puo seyie nunu miapuorei ruosuoba nu lietho chü mo.

¹⁴ Kekreilamonyü u Niepuu Juda yie geinu siercü we si ba, mu Mosa zorei zievoko dze pu kesie ki seyie hau pu mo zo.

¹⁵ Tsie we Melkizedek kemhie zievo kekrei puo sierkelie geinu hau dze si kemeciekuo parte,

¹⁶ puoe chüüzie zho geinu monyü pekawalie kelho kerheiro kekuo puo nunu zievo chülie.

¹⁷ Kekreilamonyü süu dze pukecü, “Melkizedek kemhiei, no kechachie zievo chüte,” si.

¹⁸ Tsie we die khakeshü kerieu khawate, kekreilamonyü süu thachü mu kemethuo puo zokecü la,

¹⁹ (Mosa zho-u mhapuorei chü pevi tseishülie kenjücü la); tsie we u kemerü kesa puo khashüte, süu geinu we Ukepenuopfü penuo volieya.

²⁰ Hau we rüse puo se mvü kemeteilie; kekreilamonyü kekreiko we zievo pie pfükecü rüse mo,

²¹ derei hau we rüse puose, kekreilamonyü puo ki pukeshüue sie: “Niepuue rüseshüte mu puo die vawalie lho, ‘No kechachie zievo chütuo,’ ” isiwaketa la.

²² Süu medzi di Jisu rei vikuokecü dietseidiekho puo la zhapu pfüliete.

²³ Kekrei puo liro, thiedzü zievomia kekra tuo rei kesia bu uko kedeiwawa di u mhatho chü salie lhotata vor;

²⁴ derei puo we zievo mhatho-u chü sei vo zotuo, kekreilamonyü pue kechachie batuo.

²⁵ Süla puo geinu Ukepenuopfü ki kevo khe kelalietuo, puo kechachie rhei tuo di süko la cha sei bayacü la.

²⁶ Kekreilamonyü we zievokezhatho haikecü se morosuo tuoya, puoe mesa, pejolie lho, rhuta mo, kephoumamia kinu kelakreilie di teiko ki rei rükriekuo.

²⁷ Puoe zievokezhatho kekreiko mhie mo, puoe puo thuo puo la mu süsie themiako kephouma la teisonhie ruosuo khakeshü mhatho-u chü morei vite; hau puoe puo phou pie vapuochü ruosuo chüwata zo.

²⁸ Thezho-u zowe kethachü nu ketuo kro puo kedapie zievokezhathoko chü, derei thezho-u sie nu kevor rüse dieue kechachie vi tseikecü Nuo puo bu chüliete.