Ibriko 6 - Angami Naga CL (Re-edited) Bible (BSI)

Kepele Vakewa Kemichie

¹ Süla Khrista dze kepetha die sede kerieko khapie zhüwa di vi tseilieketuo dzetsa le petoulie khe. Puo mvüdze kesa la mo di kesia mhathotsanu thenoukedikecü mu Ukepenuopfü kitsa kepele,

² siro dzülukepfü tsiu u dzie khapie mia tsü gei keshü siro kesiamia rheilakesie mu kechachie la u capi chüketuo dze kepetha dieko bode kesa molie khe.

³ Mu Ukepenuopfü u bu hau chülienu ro, we süu chütuo.

⁴ Kekreilamonyü thiedzü huomia u kenei ngulie, mu teigei mhaphruo rei metha tsiu Kemesa Ruopfü rei u ya nyilie,

⁵ siro u thuo u geinu Ukepenuopfü dieu rei vi zo ücü mu thiesie vorketuo kelhou dze kekuo rei metha,

⁶ sidi tetsu lata ro, themia sikecüko chü kesa lalie di thenoukedilieketuo chülie kenjü, kekreilamonyü ukoe Ukepenuopfü Nuou gou la mu mia bu puo peseketuo chüwate.

⁷ Kijü kehoupuorei tsiekenuo teirü tsurkecüu krielie di mha leikeshüko petsüpethepie ciekeshümia tsüya liro Ukepenuopfü theja ngu salietuo.

⁸ Derei mhanuü sünu kikhahuko mu nharhuko lhou sierta ro, süu kemethuote; mu rüsewaketuo penuo mu mi bu thewaketuo zote.

⁹ Hie khrieko, hie die hakemhie pushü shierei, hie nie pelekhrupfü ba zo, mu mha vikuocüu sü kelakelie dzeko zo.

¹⁰ Kekreilamonyü Ukepenuopfü dietho motaya mo; puo nie mhachükeshüko morei puo za la nie kekhrie nunu mia khruohikeshü mu tsie rei nie kezemia kemesamiako gei süu chüshü bayakezhako rükra motalie lho.

¹¹ Hie kemenguu sü nieko mia puopuokecü bu shürhei zo tha thela tsolie mu nie kemerü puo kebau ngu toulieketuou zo,

¹² sidi nie bu mecüta mo di pelekelieko mu shügeshühielieketako tuoi phrapie kezhüko wekelieu zo.

Ukepenuopfü Phrakeshüko Chü Touketuo

¹³ Ukepenuopfü puo die phrapie Abraham ki keshü ki, kekreimia puo ki zhakuokecü puo za se rüseketuo ba moketa la, puo thuo puo za se rüseshü,

¹⁴ sidi sie, “A japie n tsü tou zotuo mu n chü pekrashütuo” sishü.

¹⁵ Sümhie di Abraham shügeshühiepfü pfhe ba zolie, sidi phrakeshüu ngulie.

¹⁶ Themiae rüse ro, puoe puo ki zhakuokecümia puo za pu rüseya, sidi süu geinu dienya pete pepiwa di thela chüwaya.

¹⁷ Sütuoi Ukepenuopfü rei mha pupie tsütuo ükezhü ngulieketuoko ki puo die kediwalie kelho rüse di pukeshü geinu u bu si toulieta zo.

¹⁸ Sidi rüditalie kelho kenie geinu, Ukepenuopfü mhakipuorei tijütalie lho zo ükecü geinu we ta puo khrükhro kevoko bu u mhodzütsa kezhü siedzeu thezetsase tuolieketuo le u kethepfu nyi selieketuo chüshü.

¹⁹ We u kemerü baketa hau, u chüpie khrukhre tsiu u ruopfü la roucawi puo tuoi khe kemeteise bate, mu kemerü süu zo kinu le pfhe lhapiekezhau pfüthe kemesatho chüu nu lete,

²⁰ sünu Jisu, Melkizedek tuoi kechachie zievokezhatho-u chü di u la pedzüperie sünu lete.