Ibriko 4 - Angami Naga CL (Re-edited) Bible (BSI)

Ukepenuopfü Phrakeshü Kerüleiu

¹ Süla phrapie kezhü puo kerülei nu lelie vikezhü ki, nieko miapuorei süu vajowa molieketuo la menuoliecie.

² Kekreilamonyü süko sikelie tuoi di we dieliekeviu silie, derei uko silieketa die süu uko la kepra jüte, kekreilamonyü uko süu kerünyü ki kepele sa balie moketa la.

³ Sirei we pelelieketako we kerülei süu nu lete. Ukepenuopfü pukeshü mhiei, “A a nei kemopfü sie rüse zo di, ‘Uko bu a kerülei nu lelie lho,’ ishü,” puo kijü chülie tse nu puo mhathoko chü tseilieta zo ürei.

⁴ Kekreilamonyü mharapuo zha thenie dze pukecü, “Mu Ukepenuopfü zha thenie nhie puo mhatho pete nunu rüleilie,” si.

⁵ Siro hau nu pu lakecü, “Uko a kerülei nu lerlie lhote,” si laya.

⁶ Siro dieliekevi sikelie kerieko kerülei nu lelie mote kekreilamonyü uko pele mvüketa la, sirei huomia bu sünu lelieketuo süu khrüpie zhü zo,

⁷ süla puo teisozha kekreipuo keda lapie “Thie” sishü, sidi teicie kekra sie nu David geinu pukeshü khinyhü dieko nu pushüwaketau, “Thie, nieko puo pfhe silie ro, nie nou reta hiecie,” si.

⁸ Joshua kerülei khapie uko tsüwa üliro, Ukepenuopfü kenuotsanu teisozha kekrei puo pu lalie lho.

⁹ Süla Ukepenuopfü themiako la zo we tsie rei sabat kerülei puo ba zo;

¹⁰ siro Ukepenuopfü kerülei nu leketamia sümia Ukepenuopfü puo mhathoko chüwa di rüleiketa tuoi rüleitatuo.

¹¹ Süla dieze chü mvü di mia puo bu rei tetsuketako tuoita molieketuo la kerülei nu lelietuoü u rhiechü salie khe.

¹² Ketho zo, Ukepenuopfü dieu kerhei mu puo kekuo kenyi die, zhiecha lutsahatsa puoü kechü ki rei vikuo, süu u phou tsiu u ruopfü, u kere mu u kelei zekho kekreishü, u nouleko mu we chü nyü keba noudoko nyie pepishülieya.

¹³ Mu puo mhodzünu chüpie keba kerheiro puorei rüshükelie jü, sizomonyü we puo mhodzünu u thuo u rüli pie pu phre zoketuou mhi nu zowe mha peteko hielapie meyiemeluopfü ba zo.

Jisu Zievokezhatho-u

¹⁴ Süla we u kepeleu theze kemetei se tha zolie khe, kekreilamonyü u zievokezhatho-u Jisu, Ukepenuopfü Nuou teiko pfüthe kho baketa la.

¹⁵ Kekreilamonyü we u kethachüko silie kelho zievokezhatho-u puo monyü puo zorei u kemhie di dophi kehoupuorei dzükelie puo bate, puo zowe kephouma puorei jü.

¹⁶ Süla thepfu di ngukemezhie kedibau penuo volie khe, sitse we ngukemezhie mu ketseikevi ngulie di u tsopfhüko nu u khruohilietuo.