Ibriko 3 - Angami Naga CL (Re-edited) Bible (BSI)

Jisu Mosa Ki Zhakuokecü

¹ Süla a siezedzürieko, teigei phreimia chütuo üdi kielieketa kemesa dziesemiako, Jisu, süu u kepele apostel-u mu zievo kezhatho-u dze leshücie,

² Mosae “Ukepenuopfü kiu peteko nu diethokeshü tuoi puo rei puo kedakelieu mhodzünu diethoshü zo.”

³ Sishierei ki kechüue kiu ki therhu nyikuokecü tuoi, Jisu rei Mosa ki therhu nyikuote.

⁴ (Kekreilamonyü ki kehoupuorei puo chükeshümia puo nyi, derei mha pete chükeshüu sü Ukepenuopfü zo.)

⁵ Thekemia puo chü di Mosae Ukepenuopfü kiu pete gei diethoshü zo, sidi puoe thiesie pu vorketuoko dze pushü zo.

⁶ Khrista we nuothonuo chü di Ukepenuopfü kiu gei diethoshü, mu we ki süu zo, we u kemerüu geinu ngukelie kethepfu mu mhokuou theze kemetei se tha zolie liro.

Pele Kemoko Pejokeshü

⁷ Süla Kemesa Ruopfüe pukeshü hamhie, “Thie, nieko puo pfhe silie ro,

⁸ thiedzü puo nei kemo kechü tuoi, rayha nu sünhie puo dojüketa tuoi, nie nou reta hiecie,

⁹ nieko puonuoko a dojü, ukoe a mhathoko nguwata zorei

¹⁰ teicie hiediako nu. Süla thephou süu gei a nei mota, sidi a sie, ‘Uko u melou nu cha vajowa sei tuo zo, sidi uko a chako silie mote,’ siwa.

¹¹ Sidi a bu a nei kemopfü sie rüse zo di ‘A kerülei nu uko bu lelie lhote,’ si zowa.”

¹² Süla a kezeko, nieko mia puo bu rei pele kemvü thenou kerüzhü nyita di rhei tuoyakezha Ukepenuopfü kinu rüreiketa keprei la menuoliecie.

¹³ Derei kephouma bu nieko miapuorei sewa di thenou reta molieketuo la “Thie” ikeba chie, nieko teisonhie huoniehuo tarho ba zolie.

¹⁴ Kekreilamonyü, we rei sietsenu si toulieketa kethepfuu theze kemetei se zo tha thelau tsolie liro, u pete rei Khrista ze dziese chüketamia zo.

¹⁵ Süu pukeshü, “Thie, nieko puo pfhe silieta ro, thiedzü puo nei kemo kechü tuoi nie nou reta hiecie,” si.

¹⁶ Siro puo pfhe silie mu puo nei kemo chüwaketako suomia ga? sükoe Mosa bu krüta chü di Ijipt nunu ze parkeshüko mo üme?

¹⁷ Derei puo teicie hiedia suomia gei puo nei mo tuo ga? Kephouma chüwa di umo vapie rayha nu shükewako mo üme?

¹⁸ Siro puo rüse zo di suomia bu puo kerülei nu lelie lhoü pu ga? puo die ze mvüketako zo mo üme?

¹⁹ Süla we ngukelie ukoe pele kemvü la sünu lelie mota zo.