Ibriko 13 - Angami Naga CL (Re-edited) Bible (BSI)

Ukepenuopfü Nei Chükelie Mhatho

¹ Huoniehuo khrie ba zolie.

² Thezie si kemo so pesokecü rükra mota hie, hau geinu huomia si mo di teigeidieliemia rei pesolie zeru.

³ We rei kediemia zeru idi kedie chü ketuoko rüli rükralie, we rei mia bu u pechüya zeru idi mia bu u pechüyakecümia rüli rükralie.

⁴ Nieko kehoupuorei kishükiya üse therhu puo chü zolie, mu kiya zhü bu kerüzhü zhü chü hie; Ukepenuopfü pieü kechüko mu pierüüko pejo zotuocü la.

⁵ Shükeiraka mehouta hie, derei nie vie ketuokoyo se nie nei tuolie; kekreilamonyü puoe pukecü, “A mhakipuorei n khawa morei n vawalie lho,” si;

⁶ Süla we thepfu di, “Niepuu sü a kekhruohiu zo; a michielie lho. Supuonie a gei kedipuo chülie ta?” idi pulie vi.

⁷ Thiedzü nie krütako, Ukepenuopfü die se nie ki pukeshüko rükrashücie; uko kedipuo mhie di lhou vo tsoshü shicü le di uko kepele dorie lieliecie.

⁸ Jisu Khrista zowe ndu rei thie rei kemhie ba zo mu kechachie si tuo zotuo.

⁹ Mia bu kepetha die neiüko se nie se seta hie, kecükekrie zhoko medzi monyü ngukemezhieu se thenou chü kemeteikelieu we vikuo, süko medziyakezhako rei süu la kemevi puorei ngulie lho.

¹⁰ We ruosuoba puo nyi, mu rüsuopfhekiu nu lietho chüyakezhamiako ruosuoba süu geinu mhapuorei cüketuo uko mezhü puorei jü.

¹¹ Zievokezhatho-ue kephouma la ruosuo khakeshü khunuoko zie se kemesatho chüu nu leya derei khunuo moko pie razhüchüu casie nu thewaya.

¹² Süla Jisu rei puo thuo puo zie se themia chü kemesawaketuo la nadi kharuu sie nu kemezhieshü.

¹³ Süla úko rei kharu sie pra di puo zhase pfükelieu nu puo ze thalie khe.

¹⁴ Kekreilamonyü hanu we jütalie kelho nadi ba mo, derei we thiesie vorketuo nadiu pfhü tuote.

¹⁵ Süla we puo za se Ukepenuopfü ketshe ruosuo kechü, süusü u tie üse puo za phrakeshüu.

¹⁶ Mha kevi chü rükra mota hie mu mha pie mia ze kezalie, kekreilamonyü Ukepenuopfü ruosuo sikecüko puo neiyacü la.

¹⁷ Nie krütamia die zelie mu uko khrükhro tuolie, kekreilamonyü sükoe nie phou pfheüla tuoya, tsiu thiesie uko mhatho süko dze se pushüketuo la. Uko bu u nousuo monyü u nei se di süko chüliecie, uko nousuo chü liro nieko la kemevi puorei jütatuo.

¹⁸ Hie la cha ba zolie, hie nouleu mesa zo, mu hie puotei pete nu therhu nunu mhachü nyü tuo zo.

¹⁹ A nieko bu nie nou thetho chü sakuo di hau chünuya, a bu la nieko ki pezi vorlieketuo la.

Thela Kecha

²⁰ Siro Ukepenuopfü nouneu, puoe kesia nunu u Niepuu Jisu chü perhei lakeshüu, tekuoko kepfhekezhau, puo zie geinu kechachie dietseidiekhokelieu bu

²¹ mhakehoupuo nu rei nie chü pevi tseishülie, silie ro nie puo medo chülietuo, mu Jisu Khrista geinu nie gei puo mhinguki puo neiu chülie di kechachie Khrista bu zayie chükelieu chücie. Amen.

Thela Dieko

²² A siezedzürieko, a nie bu shügeshühiepfü di nie tarhokeshü die rünyülienu chaya, a leshü thu pedzüpie nieko ki shüshü ho.

²³ U siezeu Timothi kedieki nunu la parta ükecü a nie bu si nyü ba, puo puotei ki vorlie ro, a nieko ki kevor ki puo a ze vortuo.

²⁴ Nie krütamia pete mu kemesako pete kelushücie. Itali nu kebako rei nieko kelushü ho.

²⁵ Ngukemezhie bu nie pete ze baliecie.