Ibriko 11 - Angami Naga CL (Re-edited) Bible (BSI)

Kepele

¹ Siro kepele-e siedze ngulietuoü ketuoko merü tou baketa puo, ngu mo zoluo rei si tou baketau zo.

² Ketho zo, u pfutsanuoko rei kepele süu la uko üse mezhü ülie.

³ Kepele geinu tei kijü chükelie Ukepenuopfü die geinu zo ücü silie, sidi ngu kemoko geinu kengu vieko chüse parlie.

Abel, Inok mu Noah pie Thakie Kechü

⁴ Kepele geinu Abel-e Kain ruosuo ki vikuocü chüpie Ukepenuopfü tsülie. Sügeinu puo üse miatho ülie, sidi Ukepenuopfü thuo puo mha khakeshüko puotou ükelie zo; süla puo siata zorei puo kepele süu geinu tsie rei u rüchüya.

⁵ Kepele geinu Inok bu sia mo di ze khote, mu “Ukepenuopfü thuo puo ze khoketa la puo ngu mote.” Kekreilamonyü puo ze khoketa mhodzü rei “Puo Ukepenuopfü nei chülie” ükecü zhapu chüshü zo.

⁶ Siro kepele sa mo di Ukepenuopfü nei chülie kenjü, kekreilamonyü puo ki kevormia, puo ba zo ükecü mu puoe puo pfhü kevormia zhakhra chüshüya ücü pele morosuo.

⁷ Kepele geinu Noah rei vorketuoko ngu moluocü nu Ukepenuopfüe puo tarhokeshü dieu silie, mu tarhokeshü dieu ze di rou puo chülie, puo kinuko kelalieketuo la; süu geinu puoe kijüu pejowate, mu kepele la puoe kemiatho kayieu chüte.

Abraham Kepele

⁸ Kepele geinu Abraham rei puo kekie die ze di pie puo tsütuo ükezhü kijüu nu voketuo la puoe tuo prata, puo kevokevü cha si mo zorei.

⁹ Kepele geinu puotei huoyo la puoe phrakeshü kijüu nu chazoumia mhie di lhou, dzüpfheki nu lhou, Isak mu Jakob unie rei sümhie di pfheki nu lhou, unie rei puo ze phrakeshü kayieu kerhe zocü la.

¹⁰ Kekreilamonyü puoe merü keba nadi puo mvüdzeko dzepie zhükewau, süu rhi mu chükeshüu sü Ukepenuopfü thuo zokecüu pfhüzhüketa la.

¹¹ Kepele geinu puo yie ngulie kevi kekuo ngulie, puo rei tsata mu Sara rei nuojüpfü puo zo, sirei puoe phrapiekezhüu dietho zoketuo peleketa la.

¹² Sidi kesiamia kemhie puo geinu zorei puoseüyie “Teigei themvüko mhiei mu dzükezha khieki huoca tuoi phrü hulie kelho kekra lhoulie.”

¹³ Themia hako pete rei phrakeshüko ngulie mo, rei kepele nunu sia phrete, derei uko ratsa nu süko ngu di u neita zo. Uko pete rei kijü hanu la zowe rüsomia mu chazoumia zoü pu,

¹⁴ themia hai di pukeliemia u rüna ketho puo pfhükezhü thakeshü la.

¹⁵ Uko khawaketa kijüu dze leücü siewe, uko sünu la vota zotuo.

¹⁶ Derei ukoe vikuokecü rüna puo mengu tuote, süu teigei rünau. Süla Ukepenuopfüe uko bu puo uko Kepenuopfü üdi kie mengata mo zo; ketho zo, puoe uko la nadi puo kesepie bate.

¹⁷ Kepele la Abraham rei puo dojü kesie ki, Isak rei pie ruosuo chütuoü sie zo. Phrakeshüu ngulieketau puo nuo pfuliu zorei khapie ruosuo chütuoü dojüse tuo,

¹⁸ süu dze, “Isak geinu n nuosenuoyie üdi kieketuo siertuo,” isi .

¹⁹ Puoe Ukepenuopfü kesiamia zorei chü perhei lalie kevi pele zo, mu sürhi puo nunu puoe puo ngu lalieta zo.

²⁰ Kepele la Isak rei hasie vorketuo thejako japie Jakob mu Esau unie tsüwa.

²¹ Kepele la Jakob rei siatatuo ükezhü ki japie Josef nuonie tsü mu, “Puo the mengupie di rüsuota zo.”

²² Kepele la Josef rei puo se tieki Israelmiako tuo la pralietaketuo dze puta zo mu puo khruketuo la mha morokesuoko pushü zo.

Mosa Kepele

²³ Kepele la Mosa penuokelie sie ki puo krünie thekhrü se puo keviese bata, unie unuoyo zivicü ngucü la; sidi unie kediu thezho khakeshü rei prei mota.

²⁴ Kepele la Mosa rei phichü sierkelie ki puo Faro nuopfü nuo ücü rei kie mvüta,

²⁵ sidi kephouma nunu puo nei kebau ki rei Ukepenuopfü themiako ze kemezhieketuo kedalie.

²⁶ Puo Ijipt kinyiko pete ki rei Khrista la thetha pfükeshü we puoma rekuo ücü leta, puoe thiesie zhakhrau meho tuoketa la.

²⁷ Kepele la puo kediu nouyieu prei mo zo di Ijipt nunu tuoprata, kekreilamonyü puoe umhi ü ngulie kelho-u ngu baketa tuoi khashü mvü beita zo.

²⁸ Kepele la puoe Ciekevonyiu keselie mu thezie kegepie vakecüu rei chülie, sidi nuorieu kepekau bu Israelmia nuorieu pekawa molieketuo chülie.

Israel Krüta Kekreiko Kepele

²⁹ Kepele la themiako Kemerie Dzükezhau ha rei ü kijü keso tuoi di cie vota zo, derei Ijiptmia süu cietuoü kele ki uko pelheikhriwa.

³⁰ Kepele la uko zha thenie tuo Jeriko dahouu whikeshü sie süu bu tetsuta.

³¹ Kepele la dieze chülie moketako donunu thethenupfü Rahab dukhriwa molie, kekreilamonyü puo puo nei siei di mha rie kevornie pesokelie la.

³² A bu kedipuo pu sa ta? A Gideon, Barak, Samson, Jeftha, David, Samuel mu siedzekesiko dze putuo üro pu kekralie lho,

³³ süko kepele geinu kedirüvieko penyülie, kethoca chülie, phrakeshüko rei ngulie, loshako tie rei pha khalie,

³⁴ kemeriekecü miüko rei biemhelie; zhiecha rei therhielie, kuo kemonu rei kekuo ngulie, terhü nu miavimia chülie, solhimia rüpfhünuoko rei whuokelie zo.

³⁵ Thenuko bu u themia siaketako rhei lakelie ngu. Kekreiko kedieki nunu par mvü di mia bu u pechü, uko rheilakesie vikuocü puo menguketa la.

³⁶ Huomia mia bu u kre, u vü, u tepie pha mu kedie chü.

³⁷ Ketsie pie u vakhri, seigei pie rethe, zhiecha pie uko dukhri; uko bu tekuo mu temvü zhü dzie di ze whi kho mu ke, tsopfhü, u pechüpenyü mu u pese phi,

³⁸ kijüu themia süko ze balie sü mota zo. Uko rayhako siro kijüthouko gei rühou kho mu ke, tsiu tsiepfüko mu keciekiko nu lhou tuota.

³⁹ Sishierei kepele geinu kuokelie hako pete uko kepele la thetshepfü phi zorei, uko phrakeshüu ngulie mo,

⁴⁰ derei Ukepenuopfü uko la süki vikuokecü puo keseshü, süko bu úko sa mo di chü pevi tseikelie nguwa moketuo la.