Ibriko 10 - Angami Naga CL (Re-edited) Bible (BSI)

Khrista Vapuochü Ruosuo Chüwate

¹ Siro thezho-u zowe mha kevi vorketuoko rhi touu monyü süko khrü puo zokecü la, teiciekepra ruosuo chü tuoyakezha ruosuo süko se penuo vorkezhako chü pevi tseilie kenjüta zo.

² Mo üro rüsuoyakezhakoe vapuochü u chü kemesalieta üdi kephouma dze le u pejo sa mota di ruosuo rei chü sa lhota motuo üme?

³ Derei ruosuo süko kechü geinu mia bu teiciekepra u thuo u kejokemouko rükra lalieyakezha zo.

⁴ Kekreilamonyü thudo mu temvü zie zowe themia kejokemouko setalie kenjü zocü la.

⁵ Süla Khrista kijü nu kevor ki, puoe sie, “No zowe ruosuoko mu mha khakeshüko kevorko n neiya mo, derei no a la themo puo keseshüwate;

⁶ no zowe kethe ruosuo mu kephouma ruosuoko nu n neiya mo.

⁷ Sitse a sie, ‘Harie, Kepenuopfü, a zowe n medo-u chütuoü vor zowe, he-i Kepenuopfü’ (Leshütshüu nu a dze thupie kezhü tuoi,)” si.

⁸ Puo nnyhü pukeshü, “No we ruosuoko mu mha khakeshüko tsiu kethe ruosuo mu kephouma ruosuoko mengu morei n nei reiya mo” ishü zo, (ruosuo hakoha thezho-u medzi di chüya.)

⁹ Süsie rei, puoe pukecü, “Harie, a we n medo chütuoü vorwe,” si. Puoe kenuou sedeshüketuo la kerieu khawate,

¹⁰ tsiu süusü Ukepenuopfü medo la Jisu Khrista mo-u pie vapuochü u ruosuo chüwaketa la u chü kemesaliete.

¹¹ Siro zievo kehoupuorei teisonhie ruosuo kechü sie chü lala thaya rei, süko kejo kephoumako chüsetalie kevi ruosuo mo.

¹² Derei Khrista we kechachie la kephouma ruosuo va puo rübei nu chüwa di vo “Ukepenuopfü zatsa bate,”

¹³ mu sidi “Puo ngumvüko pie puo phi khro shüwa kemochie” pfhe bate.

¹⁴ Kekreilamonyü ruosuo chü keviwa di kechachie la chü kemesalieketako chü pevi tseiliete.

¹⁵ Süla Kemesa Ruopfü rei u ki puo zhapu khashü, di sie,

¹⁶ “Vorkezhü teisozhako nu a uko ze dietseidiekho chüketuou hauha zo; Niepuue siya: A a zhoko pie uko melou nu shütuo, tsiu a süko thupie uko nou shütuo,” si,

¹⁷ puoe pu sacü, “A uko kephoumako mu uko thezho kevarhuoko rükra sa motatuo,” si.

¹⁸ Mha hako vakelie nyita ro, kephouma ruosuo chü sa morei vite.

Ukepenuopfü Penuo Volie Khe

¹⁹ Süla, a kezeko, Jisu zie la we thepfu di Kemesachü nu lelie vite,

²⁰ puoe pfhe lhapiekezhau pfüthe le di cha kesa mu kerhei cha puo u la khrüshüwaketau ze di (süusü, puo mo-u geinu zo),

²¹ mu we Ukepenuopfü kinu zievokezhatho puo bate,

²² süla we u nou ketho chü tsiu kepele se chüsechü di u pejoketuo noule chü kemesakewa mu dzü kemesapie khrüwaketa umo pfü di Ukepenuopfü penuo volie khe.

²³ We rüditalie kelho u siedze süu thezetsase tha zolie khe, puoe phrakeshüko nu dietho zotuocü la.

²⁴ Tsiu úko huoniehuo nou chüpie kekhrie mu mha kevi chülie khe,

²⁵ huomia zho tuoita mo di úko we keze kehou seiyakezha zho-u khawa hie khe, sikecüumonyü úko huoniehuo tarho ba zolie khe, Teisozhau penuo miemie vortazhücü ngu baketa la.

²⁶ Kekreilamonyü u bu ketho-u silieketa sie, u thuo u khre u ra chü phouma ro, kejokemouko valieketuo ruosuo kekrei ba sa mote.

²⁷ Derei u nyie kecüketuo mu kemeriekecü mi thuo mia petsouyakezhako pekawaketuou zote.

²⁸ Kehoupuorei Mosa zho-u ze mota ro “Zhapumia keniekese die geinu” puo ngumezhie moto zo di pesiawaya.

²⁹ Siliro, mia puoe Ukepenuopfü Nuou melieta, mu thezie pie chü kemesalie di dietseidiekhokelieu üse mesa kemo puo mhieita tsiu ngukemezhie Ruopfüu rei thiketamia süki rei puo siazha rekuo zhü mo me?

³⁰ Kekreilamonyü, “Khepu sü a mese, a thuo zhadavüshütuo,” idi pukeshü, we si ba. Süsie rei, “Niepuu puo themiako nyie kecütuo,” si lashü.

³¹ Rhei tuoyakezha Ukepenuopfü dzie nu letuo ükecü mha kemichie kezha se puo zo.

³² Derei nie kezie ngulieketa theriekiko rükra lashücie, süki nie kemezhiekecüko nu rei shügeshühie thalie zo,

³³ huoki mechühou nunu pese tsiu mia bu nie pechüpenyü, mu huoki sikecü ze kesekecüko rei ze puo chü.

³⁴ Kekreilamonyü nieko kedie kechüko rei ngumezhie, siro mia nie vie peka cülie zorei nie nei siei di hielie, mha vikuokecü mu jütalie kelho pie nie vie chüketuo siketa la.

³⁵ Süla, nie thepfu baketa hau pejüwa hiecie; süu zhakhra kezha se vorshü zotuo.

³⁶ Nieko Ukepenuopfü medo-u chülieketuo la, mu phrakeshüu ngulieketuo la shügeshühie tha zoliecie.

³⁷ Kekreilamonyü, “Puotei huoyo sie, mia puo vortuoü ketuou vortuo mu menuotalie lho;

³⁸ derei a themia kemiathoko we kepele geinu rheilietuo. Sirei kehoupuorei tsiesieketako a ruopfü sümia ngu puo neilie lho zo,” si.

³⁹ Derei úko zowe tsiesie la keka nu voketako monyü kepele nyi di u kelalieketuoko zo.