Hosea 9 - Angami Naga CL (Re-edited) Bible (BSI)

Israel Kephouma la Siazha Ngukelie

¹ N nei siei hiecie, He-i Israel! Seyie kekreimia mhiei n chü kerükrie hie, kekreilamonyü noe thethe lie di, n Kepenuopfü ki nunu tuote. Noe sie peteko nu thethenu kazau n neite.

² Sieu mu khubezu kethebouu süko vachüshülie lho, tsiu khubezu kesau uko khruohilie lho.

³ Ukoe Jihova kijüu nu ba motatuo; derei Efraim-e Ijipt nu la votatuo, sidi Asiria nunu ukoe mesa kemo cütuo.

⁴ Ukoe khubezu kekrie ruosuo pie Jihova tsü lho, tsiu uko ruosuoko puo nei chülie lho. Ruosuo sükoe thekrü kechümia kecüca mhietuo; kehoupuorei süu kecü pete rhutatuo; kekreilamonyü uko kecücae kemerü la zote; süu Jihova kiu nu vorlie lho.

⁵ No thenyi zha pethopie keba nhie, kedipuo chü ta? Jihova thenyi zha nhie kedipuo chütuo ga?

⁶ Mhanuü uko thuo kepekau nunu talie zorei, Ijipt-e uko ze vo kengulietuo, Memfis-e uko khruwatuo. Zozie thuo uko rakachü puoma kereko setatuo; zohu thuo uko pfhekiko nu batatuo.

⁷ Siazha khashüketuo teisozhau vorte, su laketuo teisozhau vorte; Israel shiekhoui di, “Siedzekesiue kenyamia, ruopfü themiau melute!” Kekreilamonyü nie kejokemou kezha la, n kepetsou rei rete.

⁸ Siedzekesiue Efraim mho a Kepenuopfü la rükhouu chü, sirei puo cha pete nu rathomia kebie thuo tshu, tsiu puo Kepenuopfü kiu nu kengukemvü ba.

⁹ Ukoe Gibia teiki tuoi u thuo u bie pesuo sewate; puoe uko kejokemou rükratuo, puoe uko kephouma la uko pechütuo.

¹⁰ Rayha nu khubesi tuoi, a Israel ngulie. Chiedebo gei puosi kerieu tuoi, puotei kerie nu, a n puonuoko ngu. Derei ukoe Baal-peor nu vor, sidi uko thuo u khapie thenga vieko chü, sidi kerütsekecü uko neimiako tuoite.

¹¹ Efraim zayieu pera tuoi pruotatuo, nuo penuolie lho, nuonipfülie lho, nuo lhoulie lho!

¹² Uko thuo u nuonuo theke sesier rei, a uko pesia zo vo miapuorei lhieshülie lho. A uko kinu tuoketa ki uko we ce, chülietie!

¹³ Va puo we a Efraim ha kukuo pie thechü u keneira pelhoupie keba tuoi ngu, derei tsie we Efraim puo nuonuoko ta ze kedukhri nu vo morosuote.

¹⁴ He-i Jihova, uko tsüshücie, no kedipuo se uko tsütuoü ba ga? U nuonuo krüketa nuobvü mu u nudzü soketa nuko.

¹⁵ Uko kesuo kechü pete Gilgal nunu sede; a sünu vo di uko ngumecüte. Kekreilamonyü uko kerügekerüzhü thoko la, a ki nunu uko whuowatuo, a uko khrie salie lhote; uko kezhako pete rei mia kepetsoumia.

¹⁶ Efraim vüwate, uko mieko sote, uko si vü sa mote. Uko thuo penuolie zorei, a uko nuobvü siu, uko keneiu dukhriwatuo.

¹⁷ Kekreilamonyü uko puo pfhe rünyü mvüte, süla a Kepenuopfüe uko melietuo; uko seyieko donu rühouketuomia chütatuo.