Hosea 8 - Angami Naga CL (Re-edited) Bible (BSI)

Israelko Kepele Khakewa

¹ Ketsü pie n tie nu shülie! Jihova kiu gei chürhaü kemhie puo ba, kekreilamonyü uko a dietseidiekho-u bierhuowate, sidi a zho-u varhuowa.

² Israel-e a ki shie di sie, “A Kepenuopfü, hie, Israel, n si ba zo!”

³ Israel-e mha keviu meliewate; ngumvümia puo whuotuo.

⁴ Uko kedimia petholie, derei a geinu mo, ukoe kedinuoko peselie, derei a sanyü di mo. Uko rakachü mu suna se di mharhiko chülie süko thuo u pekawatuo.

⁵ N thunuo meliewate, he-i Samaria. A nouyie tu sier süko petsouya. Uko kichiepuo kemezhü chü mo batuo ga?

⁶ Kekreilamonyü süu Israel nunu, mhachü kesimiae chüshü; süu Kepenuopfü mo. Samaria thudonuou bietshie phawatuo.

⁷ Kekreilamonyü ukoe teikhrie prushü, tsiu uko khriewhi retuo. Telhabo pedou kethau puo kre ba mo, süu kecüca khashülie lho; mhanuü süu vü par liro, chazoumia süu mezulietuo.

⁸ Israel mezuliete; uko tsie we seyieko donunu mhabou selie kesuo puo mhiete.

⁹ Kekreilamonyü uko Asiria nu kho, nha gada puo puo rübei rühou ketuo mhie; Efraim-e puo neimia ze kelhitha.

¹⁰ Uko thuo seyieko ze kelhitha zorei, a uko ze vor kengulie lho. Pecha mo di ukoe kediko mu kedinuoko khro nu rüperületuo.

¹¹ Efraim-e ruosuoba chü pekralie di kephouma chü kemesatuoü kesie ki, ukoe phoumaketuo ruosuoba chüta.

¹² A puo pethakecü thu phishü zorei, uko sü üse kethekhrükecü puo mhiete.

¹³ Uko thuo ruosuo keviko kedapie khashü zorei, uko thuo themuo cü zorei, Jihova süko lielie lho. Puoe uko kejokemouko rükratuo, sidi uko kephouma la kepechü khashütuo, uko Ijipt nu la votuo.

¹⁴ Israel-e puo Chükeshüu rükra mote, sidi kedikiko chülie; tsiu Judae dahou kenyi nadiko chü pele saliete; derei a mi ketsepie puo nadiko mhoshütuo, sidi süu puo dahou kemeteiko mezulietuo.