Hosea 7 - Angami Naga CL (Re-edited) Bible (BSI)

¹ A Israel chü keshürhokelie ki, Efraim mhatho kesuoko hielashütuo, Samaria kerüzhü mhathoko rei; kekreilamonyü ukoe meda, kerügumia kinu ler mu sekecü kro-u chazou mha pekatuo.

² Derei ukoe a uko kerüzhü pete rükra baya ücü leya mo. Uko mhathoko thuo uko houpfüliete, ukoe a zie mhodzüki bate.

³ Uko kerüzhüko se uko kediu nei chüya, tsiu uko meda di kezhako nei chüya.

⁴ Uko pete pieüpieramia phre, ukoe miphu bie pelepie keba, niekhrüda keriemia niekhrüdau bu pou partuo üdi khrei sa pie thou nepie bakewa sie, niekhrüda keriemia mi chü la morei vicü tuoi.

⁵ Hie kediu teiki kezhakoe zu kele la mhachü; puoe mia krenyüyakezhako ze di puo dzie yha.

⁶ Kekreilamonyü uko miphu tuoi tu par, uko geinu uko melou the; teizeizha pete uko noupfhü thuo khuzhü; khise süu miü tuoi tu par.

⁷ Uko pete rei miphu tuoi le, sidi uko kezhako mezulie, uko kedi pete tetsute; uko miapuorei a kieshü mo.

⁸ Efraim thuo themiako ze kereilie; Efraim-e niekhrüda chü kekhelieya kemo mhie zo.

⁹ Chazoumia bu puo kekuo mezulie, derei puoe süu si mo; puo tsü gei puo tsütha rüpou, derei puo süu si mo.

¹⁰ Israel kemiakokecü thuo puo petsou keba thashü; sishierei uko rürei Jihova uko Kepenuopfü kitsa vo mo, morei mha hako pete la, puo pfhülie mo.

Seyieko Kemethuo Chütaketuo

¹¹ Efraim-e mekhru tuoi, nya mu kesikele jü; uko Ijipt kie, uko Asiria nu vo.

¹² Uko vo tse, a jal kelhoupie uko gei shütuo; teirako mhie a uko teshü se kerwatuo; uko kehoue uko dze pukeshü medzi di a uko pethatuo.

¹³ Uko we ce, chülietie, kekreilamonyü uko a kinu tate! kepeka uko gei vor, kekreilamonyü uko a petsou! a uko rhalie vi zo, derei uko kemeda pu a petsou.

¹⁴ Uko u melou nunu kra a ki shü mo, derei uko zhüko geinu meheimelozhü; uko telha mu zu kesa la vo kengulie; uko a petsou sierte.

¹⁵ Uko pethakeshü mu uko bou chü kemeteikeshüu sü a zo, sirei uko sier a petsou.

¹⁶ Uko rüreise puo kepra kejü nu vo; uko theü kesuo puo mhiete; uko kezhako zhiecha geinu tetsutuo, kekreilamonyü uko tie kere la. Ijipt kijü nunu die doneiü pu ba rei si zotuo.