Hosea 6 - Angami Naga CL (Re-edited) Bible (BSI)

Thenou Kedilienu Kiekeshü

¹ “Vorlie, úko rürei la Jihova ki vo khe; kekreilamonyü puoe cierhashüya mu u chü keshürhoshütuo; puoe vükhrüshü, tsiu puoe u pha lashütuo.

² Zha kenie sie puoe u chü perheishütuo; zha se nhie puoe u phou piesieshütuo, sitse we puo mhodzünu lhou tuotatuo.

³ Úko silie khe, úko Jihova silietuoü whuo zo vo khe; puo kengue teiso pi kepar mhie zo; puoe teirü tuoi u ki vortuo, bayie teirü tsur kijü tshekeshü mhieituo.”

Israel mu Juda Thenoukedilie Kemo

⁴ He-i Efraim, a n pie kedipuo chü ta? He-i Juda, a n pie kedipuo chü ta? N kekhrie-e khise kimhou tuoi zo; thezei ze mhaitayakezha mhie zo.

⁵ Süla a siedzekesiko ze di uko dathewa, a a tie nu dieko pie uko dukhriwatuo, tsiu a ketsokecüu kezie tuoi vota.

⁶ Kekreilamonyü a ruosuo mo di kekhrie a neiya, kethe ruosuo mo di Ukepenuopfü kesikele a neiya.

⁷ Derei Adam tuoi ukoe dietseidiekho-u vacie; sünunu uko a gei dietho kemoko chü.

⁸ Gilid sü mha kesuo kechü nadi puo, thezie kepekru nu vo.

⁹ Miaviesekecümia mia la bayakezha tuoi, sütuoi zievoko kro puo chü, di uko cha nu mia dukhri vo Shekem tso, ukoe kejo kemeriekecü chü.

¹⁰ Ae Israel kinu mha kemeriekecü ngu; Efraim thetheliecü sünu ba, Israel sü perhuwate.

¹¹ Harie Juda, n la rei sa lieyie tei puo pethopie bate. A themia miadie chüketuoko ze la vorkelie ki.