Hosea 5 - Angami Naga CL (Re-edited) Bible (BSI)

Israel mu Juda gei Ketsokecüu Vorketuo

¹ Hau rünyüliecie, he-i zievoko! Si toulie, he-i Israel kinumiako! Rünyülie, he-i kediu kinumiako! Kekreilamonyü ketsoketuou pie n gei shütuo; nie Mizpa nu kebie puo chü, siro Tabor nu jal pethoupie zhü,

² tsiu Shitim nu kheho kesou puo thielie; derei a uko pete pechütuo.

³ A Efraim si, siro Israel a kinu rüshülie mo; he-i Efraim, no tsie thethe lie; Israel bie perhuwate.

⁴ Uko mhathoko u chüpie Kepenuopfü kitsa volie mo. Kekreilamonyü thethe kechü ruopfüu uko gei tuo, tsiu uko Jihova siya mo.

⁵ Israel kemiakokecüu thuo puo petsou keba thashü; Efraim-e puo kejokemou nunu tetsu; Juda rei uko ze tetsu.

⁶ Ukoe uko kuoko tsiu kirinuoko ze di Jihova pfhütuo, derei uko puo ngulie lho, puoe uko kinu puo kereiliete.

⁷ Ukoe Jihova gei kepele kejü mhatho chü; kekreilamonyü uko tekhruonuo penuoshükecü la. Khrülhoue uko lieko sa di uko mezulietuo.

⁸ Gibia nu tekuo kiau khoushülie, Rama nu ketsüu khoushülie. Bet-aven nu kemichie vorkezhü pfheu shieshülie; Benjamin n sietsa mehoshülie!

⁹ Efraim siazha khakeshü zha nhie kaüruotatuo; Israel seyieko donu kedipuo vor toutuo shicü a pesishütuo.

¹⁰ Juda kedinuokoe therieu bie kedikewamia kemhiete; süla a uko gei dzü tuoi a nouyieu rushütuo.

¹¹ Efraim mia bu puo pese, dienya nu mezhülie mo, kekreilamonyü puoe kemethuo sie whuo nyü beite.

¹² Süla ae Efraim la shülhe tuoitatuo, tsiu Juda kinuko gei cieketa tuoituo.

¹³ Efraim-e puo kechükenyüko ngushü, mu Juda puo rüzapfü ngushü tse, Efraim-e Asiriamia ki vota, sidi kedi kezhau ki ketseshü. Derei puoe n chü pevilie kenjü, morei n rüzapfü chü kemenelie kenjü.

¹⁴ Kekreilamonyü ae Efraim la losha tuoi, tsiu Juda kinumia la losha shapou tuoitatuo. A thuo cierhawa di tuotatuo; ae chüsetatuo, mu miapuorei kelashülie lho.

¹⁵ Ukoe kekrükewa phrashü di, a zie pfhülie kemochie, a thuo a chüu nu la votatuo. Uko kemezhiekelie ki ngukemezhie chatuo.