Hosea 2 - Angami Naga CL (Re-edited) Bible (BSI)

¹ Nieko prüu Ami, mu nie üpfü Ruhama ki pushülie.

Israel Miatho Kemo Siazha mu Rhakelie

² N zuo ze di pushülie, pushülie, kekreilamonyü puo a kimia mo, tsiu a puo nupfu mo, sidi puo bu puo mhinguki nu thetheliekecü, tsiu puo nunie donunu pieü kechü khawalie;

³ kemosie a puo pfhe puo nei lhewa di puo bie kemethuoshütuo, sidi puo pie puo penuokelie nhie tuoiwatuo, mu puo pie rayha kemhieshütuo, sidi puo pie kijü sotoikecü nu shüwatuo, tsiu puo bu terhü di siatatuo.

⁴ A puo nuonuoko rei ngumezhieshülie lho, kekreilamonyü ukoe thethenumia nuonuocü la.

⁵ Kekreilamonyü uko zuoe thethe lie; uko penuokeshüpfüe thenga thoko chü. Kekreilamonyü hapfüe sie, “A a neimia sie whuo votuo; uko a kecüca mu a kekrie, a nhachümiepfhe tsiu a flax, a tier mu a kekrie a tsüya.”

⁶ Süla a zohu pie puo cha khawatuo; tsiu a puo petsou di sozha pfhewatuo, sitse puo puo chako ngulie motatuo.

⁷ Süpfüe puo neimia sie whuotuo, derei uko tsolie lho; tsiu puoe süko pfhütuo, derei uko ngulie lho. Sitse süpfü sie, “A tuo la se a nupfu kerieu ki votuo, kekreilamonyü süue tsieki rei vikuo zo.”

⁸ Puoe, a thuo lhacülhale, khubezu, mu tier pie puo tsü, tsiu rakachü siro suna pie puo tsü seshü mu ukoe Baal la sekewa silie mo.

⁹ Süla a lhacülhale teiki, mu a khubezu teiki süko chüsetatuo; tsiu a a chümiepfhe, siro a flax se puo kemethuo kewhe khakeshüko lie lalietuo.

¹⁰ Tsie we a puo neimiako mhinguki nu puo kemenga hielashütuo, mu miapuorei a dzie nunu puo kelalie lho.

¹¹ Siro ae puo puoneipuonyü chüyakezha pete, puo thenyiko, puo khrüsako, puo sabatko, tsiu thenyi zha pethopie bayakezha pete bu ba sa motatuo.

¹² A puo khubebo tsiu puo chiedebo bu ruotatuo, sidi puoe süu üse, “Hako a zhakhra, a neimia haha khapie a tsüwe.” A süko chüpie ketsa chüwatuo, tsiu nhachükoe süko cütuo.

¹³ A Baalko thenyi zhako la puo pechütuo, süusü puoe kethengu thepie süko tsü, tsiu puoe dziekha mu cümenyie se puo ketsolie di puo kekhriemia siemedzi tuote, sidi a rükra mote, Jihovae siya.

¹⁴ Süla, a tsie puo ketsilietuo, sidi puo ze rayha nu vortuo, sidi puo ki die pu menuoshütuo.

¹⁵ Sidi a sünunu khubelieko pie puo tsütuo, sidi Akhor Razhau chüpie kemerü kenyi kicie puo chüshütuo. Siro thiedzü puo rüü teiki mhie, tsu puoe Ijipt kijü nunu kepar teiki tuoi, sünunu mha putuo.

¹⁶ Jihovae puya, sünhie no a kie di “A nupfu” ituo, tsiu Baali üdi a kie sa motatuo.

¹⁷ Kekreilamonyü ae Baal za chüwatuo, sidi süko za pu sa motatuo.

¹⁸ Teisozha sünhiesü ae lie nu nhachüko, teirako, mu kijü gei gouyakezhako ze di n la dietseidiekho puo chütuo; mu a kijüu geinu theü, zhiecha, terhü khawatatuo, sidi nie bu khrukhrekecü nu zhütatuo.

¹⁹ Siro a n liepie kechachie la a kimia chülietuo, mu kemiatho tsiu kemezhü nunu, rüdirüli kemo kekhrie, mu ngukemezhie nunu a n liepie a kimia chülietuo.

²⁰ Ae kedietho nunu n liepie a kimia chülietuo; mu no Jihova silietuo.

²¹ Siro sünhie a n pfhekhoshütuo, Jihovae siya, a teiko pfhekhoshütuo tsiu uko kijü pfhekhoshütuo;

²² Siro kijüu lhacülhale, khubezu, mu tier pfhekhoshütuo, sidi ukoe Jezril pfhekhoshütuo,

²³ tsiu a thuo a la puo pie kijü gei prushütuo. Siro a Lo-ruhama ngumezhieshütuo, mu a Lo-ami ki, “No sü a themia zo,” isituo; sitse puo sie, “No a Kepenuopfü zo,” isituo.