Hosea 14 - Angami Naga CL (Re-edited) Bible (BSI)

Thenou Kedilienu Chakeshü

¹ He-i Israel, Jihova n Kepenuopfü ki rürei vortacie, kekreilamonyü n kejokemou la no tetsute.

² Dieko selie di no rürei Jihova ki vorlie; sidi puo ki, “Kejokemou pete chüsetayi; mha keviu lielie, siro hie hie tie siu pie ruosuo chüshütuo.

³ Asiria hie kelalie lho; hie kierko gei ba lho; hie rhithoko ki, ‘Hie Ukepenuopfü’ isi salie lho. N geinu merünuomia ngumezhiekeshü siliecie.”

Kejo Va Toushüketuo

⁴ A uko dietho moketau chü kemene lashütuo; a uko khrie tseishütuo, kekreilamonyü a nouyieu uko geinu rüreite.

⁵ A Israel gei thezei tuoishütuo; puo terhuobiepou tuoi poulietuo, puoe Lebanon ketsa tuoi puo mie krelietuo.

⁶ Puo nuotheko pou parlietuo; puo zivi-e olivbo mhielietuo, tsiu puore kevi-e Lebanon mhielietuo.

⁷ Ukoe a khrükhro nu lhoutatuo, uko tezie tuoi kruolietuo; ukoe khubebo tuoi poulietuo, uko re keviue Lebanon khubezu tuoilietuo.

⁸ He-i Efraim, a n terhuorhiko se kedipuo chü ta? N pfhekhokeshü tsiu n meho kevor-u sü a zo. Ae saipres kepejo tuoi zo; n kemiatho a geinu vor.

⁹ Mhasi u gei kebamia hako silietuo; mhalelieyakezhamia hako silietuo. Jihova chakoe mezhü zocü la, tsiu kemiathomia süko nu tuoya, derei kejo kechümia süko geinu u phi mesülieya.