Hosea 13 - Angami Naga CL (Re-edited) Bible (BSI)

Israel gei Siazha Chüwalie Kelho

¹ Efraim die pukeshü ki, sünu perüsüta; puoe Israel nu puo chü kerükrielie; derei puo Baal geinu kephouma chüwa di siata.

² Siro ukoe phouma zhü zo tsiu uko thuo u la mharhi rhilie, uko thuo u kele se rakachü pie terhuorhiko rhilie, süko pete rükreimia mhatho phre zo. Uko sie, “Ruosuo chüpie hako ki shücie.” Themiako thudonuo mebo!

³ Süla ukoe khise gei kimhou morei thezei so mhaitayakezha mhietatuo, sie nunu shübe hepfütayakezha tuoi, morei khirki nu mikhu tuoitatuo.

⁴ Sirei a Ijipt kijü nu zorei n Kepenuopfü Jihova chü vor zo; a kemosie nie la Kepenuopfü kekrei si tuo mo, mu a sie kelakelie kekrei ba mo.

⁵ Ae rayha nu, kijü sotoikecüra nu n vachü kevor-u.

⁶ Ae uko vachükeshü ki, uko u kelhuo chülie; uko u ketshukelhuo chülie, sitse uko nou kemiakota; süla uko a rükra mote.

⁷ Süla a uko gei losha tuoitatuo, cha khieki khurhü tuoi a uko rü batatuo.

⁸ Thega mia puo nuonuo rügu seketa teiki tuoi a uko gei phirtuo, sidi uko melou kezeu cierhawatuo; sidi sünunu a losha tuoi uko mezulietuo, nhachü tuoi uko cierhawatuo.

⁹ He-i Israel, a n pekawatuo, supuonie n khruohilie ta?

¹⁰ N kelashülie kevi kediu tsie kirapuo ba ga? N nadiko nu kezhako sie, “A kediu mu kezhako kha a tsücie” idi pukeshüko kirapuo bata ga?

¹¹ A nouyie nunu kedi puo khashü n tsü, tsiu a noupfhü nunu puo chüseta.

¹² Efraim kejokemouko pha kenguse ba; puo kephouma keviepie ba.

¹³ Nuonuo vachüu puo gei vor, derei puoe mhasi kemo nuo puo; kekreilamonyü puo teiki puo khapie nuobvü tieu nu shülie mokecü la.

¹⁴ A Sheol kekuou nunu uko rhalietuo me? Kesia nunu uko rhalietuo me? He-i kesia, n thepetheruoko kira ba ga? He-i Sheol, n kepeka kira ba ga? A mhi kinu ngukemezhieu rüshütakecü la.

¹⁵ Puo thuo puo siezedzürieko donunu kruolie zorei, niathutsa teikhrieu vortuo, Jihova kinu teikhrieu, rayha nunu siertuo; sitse puo dzüluokiu sotatuo, puo dzüluo sotatuo. Süu puo kinyibou mhama kere pete bie pesuowatuo

¹⁶ Samaria puo kejokemou pfü morosuo, kekreilamonyü puoe puo Kepenuopfü petsouketa la; ukoe zhiecha geinu tetsutatuo, uko nuonuo kecüko vütshie phawatuo, mu u nupfünuo phoupiemo kebako rei rhiephawatuo.