Hosea 12 - Angami Naga CL (Re-edited) Bible (BSI)

¹ Efraim-e teikhrie pfhe di, teisozha pete niathutsa teikhrieu whuo tuoya; ukoe kemeda mu zhosuo chü pekra miemieya, ukoe Asiria ze kepfhekholie, sidi tier toupfü Ijipt nu vo.

Ukepenuopfü Petsoukecü

² Jihovae puo nei mo di Juda petsou bate, siro Jakob zho ki ze puo pechütuo; tsiu puo mhatho ki ze puo zha chüshütuo.

³ Puo zuo va nunu puo dzürieu phitshü teshülie, mu puo themia zho se Kepenuopfü ze kekuokie chü.

⁴ Puo teigeidieliemia ze kene di kuolie, kra di puo ki puo mezhiemelo; puoe Bethel nunu puo ze kese, di sünunu puo ki mha pu.

⁵ Jihova sü krodiko Kepenuopfü, puo zae Jihova!

⁶ Derei n la zo we, rürei n Kepenuopfü ki volie, kekhrie mu kethocau thezetsalie, sidi n Kepenuopfü pfhe merü sei baliecie.

⁷ Lhitho-u dzie nu kekrükecü roshükhou ba, puoe mia pesekecü puo neiya.

⁸ Efraim sie, “Aya, ae mhanyi, a la kinyi pfhüliete; a mhapfhükelie pete nu a gei kekrükecü kephouma ngulie mo.”

⁹ A Ijipt nu rei n Kepenuopfü Jihova zo; pethokeshü thenyi zhako tuoi, a n bu pfheki nu lhoutuo.

¹⁰ Ae siedzekesiko ki mha pushü; ziemho chü pekrakeshüu sü a zo, tsiu siedzekesiko geinu mha pekaketuo se vortuo.

¹¹ Gilid nu mha kesuo ba, ukoe kemethuo chütatuo. Gilgal nu ukoe thudo pie ruosuo chü, süla uko ruosuokoe lie nu ketsie ketapie kepupie kezhü tuoitatuo.

¹² Jakob-e Aram kijü nu ta vota, sünu Israel-e puo kimia la mhachü, tsiu puo kimia la puoe tekuo pfhe.

¹³ Jihovae siedzekesiu geinu Israel ze Ijipt nunu parshü, tsiu siedzekesiu geinu puo pekrupie balie.

¹⁴ Efraim-e mha kesuo chü seshü, süla puo Niepuu puo kejo-u pie puo gei shütuo, puo mia kengakeshü pie puo gei lashütuo.