Hosea 11 - Angami Naga CL (Re-edited) Bible (BSI)

Ukepenuopfü Israel Ngukemezhie

¹ Israel nhicu baluocü nu, a puo khrie vor, tsiu Ijipt nunu a nuou kielie.

² A uko kie kra mu uko a kinu pecie miemie; ukoe ruosuo chüpie Baalko tsüzhü zo, tsiu kethengu thepie terhuorhiko tsü.

³ Sirei Efraim pethapie chatuokelieu sü a zo, a uko pie a bouka gei shülie; derei a uko chü keshürhokeshü ukoe si mo.

⁴ A themia ngukemezhie ro-u mu kekhrie pfhe se uko taze vor zo. Ae uko la mia puoe nuoranuo puo chüpie puo dzo gei shülieyakezhamia mhie zo. A nuketsu di uko vachü.

⁵ Uko Ijipt kijü nu la votuo, sidi Asiria bu uko kediu chütuo, ukoe a ki rürei vor mvüketa la.

⁶ Zhiechau uko nadiko petsou bate, süue uko zievo mha pushüyakecüko tecülieya, tsiu uko mharhüko la uko mezulieya.

⁷ A themiako a kinu rüreitatuoü rhüzhü zo. Ukoe kerükrietho-u kieshü, derei puoe uko phou sesierya mo.

⁸ Efraim, kiüdi a n khawatuo mu? He-i Israel, a kimhie di n pie mia tsü ta? A kimhie di n chüpie Adma mhielietuo mu? A kimhie di n gei Zeboim mhieshütuo mu? A nou a kera bate, ngukemezhieu mu kekhrieu a nou zha miemiete.

⁹ A nouyie kereu se lho; a Efraim peka salie lho; kekreilamonyü ae Kepenuopfü, mu themia mo, Nie donu Kemesau, tsiu a noupfhü nunu vor lho.

¹⁰ Ukoe Jihova siemedzi votuo, losha tuoi mehoshüyakecüu; puo mehokeshü ki, puo nuonuoko niakratsa nu perüsü vortuo.

¹¹ Ukoe Ijipt nunu perako tuoi, mu Asiria kijü nunu mekhru tuoi perüsü zo vortuo; mu a uko bu u kinu volietuo, Jihovae siya.

¹² Efraim-e tijü, tsiu Israel kinumia meda di a houpfülie; derei Juda tsie rei Ukepenuopfü ze tuo zo, mu Kemesau gei dietho ba zo.