Hosea 10 - Angami Naga CL (Re-edited) Bible (BSI)

Israel Kephouma mu Miadie Kechü

¹ Israel-e puosi vü phishüyakezha khubebo puo. Puo si vükralie mu puoe ruosuobako chü pekraya; puo kijü chü kehiekelie ki, puo coko chü kehielie.

² Uko meloue kemeda melou, süla tsie uko kejo-u pfü morosuo. Jihova uko ruosuobako biemewatuo; mu uko coko pekawatuo.

³ Süla tsie uko sie: “Hie kedi jü, kekreilamonyü hie Jihova khrüpreiya mo, tsiu kedimia puoe hie la kedipuo chülie ta?”

⁴ Ukoe diethuo dieko puya; uko kemethuo rüse se dietseidiekhoko chü; süla tekhou doupie kezhü nu kenyakecü thereinha mhiei pou sierya.

⁵ Bet-aven nu thudonuoyo la Samaria nu kelhouko peba. Puo themiako süu la thekrü chütuo; mu puo miarhi kerüsuo zievoko süu la kratuo, puo thetshetherhu puo kinu tuoketa la.

⁶ Siro kedi kezha rhushüketuo la mhanyako zorei toupfü Asiria nu votatuo. Efraim pie thenga nu shüwatuo, tsiu Israel-e puo rhuorhiko la mengatuo.

⁷ Samaria kediu dzümeluo gei seico yopuo kemhie jütatuo.

⁸ Aven thechü kerükrieko, Israel kephoumau pekawatuo. Zohu mu huphienuo uko ruosuobako gei lhou siertatuo. Ukoe kijüthouko ki, Hie wheliecie, mu kijükhruko ki, Te hie gei tsurcie, situo.

⁹ He-i Israel, noe Gibia teiki nu phouma tuote; sünunu ukoe si sei vorte. Gibia nunu terhüe uko penyülie lho me?

¹⁰ A rüyo ketuoko petsou vortuo, siazha pie uko tsüketuo la; tsiu kephoumako va süde kenie rei kraketa la, seyieko kie kengupie uko petsoutuo.

¹¹ Efraim-e mithunuo pethakelie puo, telha nyükecü puo neiya, mu a puo vo keziviu pesepie ba; derei a Efraim bu kijüu bietshietuo, Juda bu kijü thietuo; Jakob-e puo thuo lie rü morosuo.

¹² No n thuo kemiatho prushülie; ngukemezhie relie; lie krokezhü phieshülie; kekreilamonyü Jihova pfhükecü teiute, sitse puo vor di kemiatho teirüu perüpie nie gei shütuo.

¹³ Niekoe kerüzhü pelhoushü, nieko ketho kemo-u reliete, niekoe kemeda siu cüliete. Kekreilamonyü nie thuo nie kekuo, tsiu nie terhümiaviko kro pelete.

¹⁴ Süla terhü pfheu n themiako petsou siertuo, sidi n kudako pete pekawatuo, terhükegeikecü nhie Shalman-e Bet-arbel pekakewa tuoi, u nuonuo sa di mia zuonuo duchüdurhakewa ki.

¹⁵ Sütuoi n gei chüshütuo, he-i Bethel, kekreilamonyü n kerüzhü zhathorte: teisotie ki Israel kediu dathe tseiwatuo.