Hosea 1 - Angami Naga CL (Re-edited) Bible (BSI)

¹ Jihova die Uzia, Jotham, Ahaz mu Juda nu Hezekia kedi hako teiki, tsiu Israel kediu Joash nuou Jeroboam teiki Beri nuou Hosea ki vor.

Hosea Kikruu

² Jihovae Hosea geinu die pukeshü therie nu, Jihova Hosea ki, “Vo di n la thethepfü puo liepie n kimia chülie mu thethe nuonuo nyiliecie, kekreilamonyü Jihova khawa di kijüu thetheliethor bate.”

³ Süla puo vo di Gomer Diblaim nuopfü lielie, sidi süpfü nuonipfülie di thepfunuo puo penuo puo tsü.

⁴ Sitse Jihovae puo ki, “Puo za thopie Jezril chülie, kekreilamonyü puotei huoyo sie a Jehu kikru gei Jezril zieu la khepu lietuo, sidi Israel kikru kedipie puo thela chüwatuo.

⁵ Siro sünhie Jezril razhau nunu a Israel theü bietshewatuo.”

⁶ Süsie puo nuonipfü lalie sidi thenumia yopuo penuoshü, sitse Jihova sie puo ki, “Puo za thopie Lo-ruhama chülie, kekreilamonyü a Israel kiu ngumezhie salie lhote morei uko kejo rei vashülie lhote.

⁷ Derei a Juda kiu ngumezhieshütuo, mu a uko Kepenuopfü Jihova chü di uko kelashütuo; a theü, morei zhiecha morei terhü, morei kier, morei kierkesemia geinu uko kelalie lho.”

⁸ Süsie puoe Lo-ruhama khowata tse, puo nuonipfü lalie sidi thepfunuomia yopuo penuolie.

⁹ Sitse Jihovae sie, “Puo za pie Lo-ami chülie, kekreilamonyü noe a themia mo mu a nie Kepenuopfü rei mocü la.”

Israel Piesie Lashüketuo

¹⁰ Sirei Israelko phrü kesieki dzükezha nu huocanyo mhietatuo, sidi mejü morei phrü hulie lhotatuo; siro uko ki, “Nieko a themia mo” sikeshüra nu uko ki, “Rhei tuoyakezha Kepenuopfü nuonuoko,” ilashütuo.

¹¹ Judamiako mu Israelko ze vor kengu lalietuo, sidi uko thuo uko la puo tsü pfüketuo puo kedalietuo; sidi uko kijü pevielietuo, kekreilamonyü Jezril teisozhau zha phishü zotie ru.