Hagai 1 - Angami Naga CL (Re-edited) Bible (BSI)

Rüsuokiu Chülienu Diekhakeshü

¹ Darius kediu dikelie cie kenie cie, khrü sorouu nu, khrülhou zha puo nhie, Jihova die Hagai siedzekesiu geinu Shealtiel nuo Zerubabel, Juda nu ahng mu Jehozadak nuou Joshua, zievokezhatho-u ki vor:

² Krodiko Jihovae puya: Themia hakoe Jihova kiu chüketuo tei vor moluo übaya.

³ Sitse Jihova die Hagai siedzekesiu geinu vor di pukecü:

⁴ Nie thuo nie ki we chü pevi phikelie nu balie, sirei ki hau bu we suokezhü tei zo üba me?

⁵ Süla tsie krodiko Jihovae puya: Nie chükezhüko le menuoshücie.

⁶ Nieko mha kekra prushüte, mu mha huoyo rübei rekelie zo, nie mhacüya, derei nie kelhuo ba mo, nie krieya derei nie ketshu chülie mo; nie pfhe dzieya, derei miapuorei lelieya mo; mu nie mha krakelieko zorei krapie likhuo kepako nu shüwaya.

⁷ Krodiko Jihovae puya: Nie mhachükezhüko le menuoshücie.

⁸ Kijükhruko gei khocie di sei se vorlie, sidi kiu chülie. Sitse a süu nu a neilietuo mu therhupfülietuo, Jihovae siya.

⁹ Niekoe mha kekra meho sie, ru harie, huoyo zie vor mo; nie süu se kinu vor tse, a süu mhe petawa. Kiüdi ga? Krodiko Jihovae siya. Kekreilamonyü a kiu ruo zhüketa la zo, sirei nieko pete rükri nie thuo nie ki nu vote.

¹⁰ Süla nie mho gei kezha teie thezei pekrüshü mote, mu kijüu puosi rüchükelie khashü mote.

¹¹ Siro a teikuo kiepie kijüu gei mu kijükhruko gei, lhacülhale gei, khubezu kesa gei, tier gei, kijü nu lhou parlieyakecü khe gei, themiako gei mu khunuoko gei, tsiu uko mhathoko gei shü.

¹² Sitse Shealtiel nuou Zerubabel siro Jehozadak nuou Joshua, zievokezhatho-u, themia lhiekelieko pete Jihova uko Kepenuopfü pfheu zelie tsiu siedzekesiu Hagai dieko zelie, Jihova uko Kepenuopfü puo ketsekeshü tuoi; mu themiako Jihova khrüpreilie.

¹³ Sitse Hagai Jihova dielieu, Jihova dieu pie themiako ki pu di sie, a nieko ze tuo zo, Jihovae siya.

¹⁴ Süsie Jihovae Shealtiel nuou Zerubabel, Juda nu ahng mu Jehozadak zievokezhatho-u, tsiu themia lhiekelieko pete hüshü, sidi uko vor krodiko Jihova, uko Kepenuopfü kiu mhatho chü,

¹⁵ thekhrü sorouu nu zha mepfüedia nhie.