Habakuk 2 - Angami Naga CL (Re-edited) Bible (BSI)

Ukepenuopfü Siedzekesiu Die Kelakeshü

¹ A rükhoubau nu thatuo, siro a dahou gei batuo; sidi puo a ki kedipuo pushütuo shicü, mu a panyakeshüu puo kedipuo se a die kelatuo shi pfhe batuo.

² Sitse Jihova a pfhekhoshü sidi a ki: Ziemho-u thuliecie; mu süu thu kemecümecieshülie, süu kephrümia bu se ta volieketuo la.

³ Kekreilamonyü pethopie keba teiu la ziemho puo baluo, süu thela dze pu, mu medaya mo. Süu chü menuoketa mhie zorei, pfhe baliecie; süu vor tou zotuo, süu chü menuotalie lho.

⁴ Kemiako kebako mehoshücie! Uko ruopfüu u gei puotou tuo mo, derei kemiathomia we u kepele la rheilietuo.

⁵ Sizomoü, kinyi ha mha kese vie puo; mia rünyü kemomia thalie lho. Ukoe u mezha gapie Sheol tuoi thaya; kesia puo kelhuo chülie kemo tuoi. Uko la seyie pete kengulietaya, sidi themia pete pie u vie mhieitaya.

Kerüzhüko gei Kemichie

⁶ Kehoupuorei themia sikecümia petsou, tsiu u krenyükecü dieko se di uko ki, “U vie kemo pie u vie chü pekralieyakezhako we ce, chülietie!” isi lho me? Mia pie pfüshütuo üdi mhanyako pie puo thuo puo pie dalieyakezhamia kichiepuo si batuo ga?

⁷ No u pupfü kebako mhai sier lho üme? Tsiu n bie kemideshüketuoko colie lhoü ba me? Sitse noe uko la teseketa vienya puo chütatuo.

⁸ Noe seyie kekra pekawa, süla themia lhiepie keba pete n pekatuo, themia zie pekru, mu kijüu, nadiko mu sünu lhou keba pete bie pesuokecü la.

⁹ “Nie kiko la mha kesuo nunu kinyi pfhülieyakezhako, kemezhiekecü nunu talietuo üdi nie kru chüpie kerükrie gei shülieyakezhamia we ce, chülietie!”

¹⁰ Noe themia kekra dathewa di n kiu bu thenga kraliete; noe n thuo n kelhou pejüwate.

¹¹ Ketsieko thuo sozha geinu melie partatuo, siro no mela donunu mhanyhüpie kebako thuo süu die kelashütuo.

¹² “Nie thezie kepekru pie rüna chükelieko, tsiu kephouma nunu rüna chükelieko we ce, chülietie!”

¹³ Themia mhathomhachü sü mi ca chüketuo zo, tsiu seyieko kemethuo puo la mhachü u nyie keba zo; haha krodiko Jihova kinu vor mo me?

¹⁴ Derei dzüe dzükezha zepfü keba tuoi, Jihova mhasi vithedze kechüu thuo kijüu tshupfülietuo.

¹⁵ “U zanuomia bu krie mezelie di, u kemenga ngu kemochie n noupfhüu rushüyakezhamia we ce, chülietie!”

¹⁶ Noe zapuzayieu monyü mia bu ngumecükecüu n tshupfhü batatuo. No n thuo kriecie, sidi meze thuvüvü tuocie, Jihova dzie puo zatsa hieu n ki vortuo, sidi n zayieu gei thenga vortuo!

¹⁷ Kekreilamonyü Lebanon gei mha kesuo chükeshü n vupfülietuo; khunuo pekakeshüko n kechütatuo, kekreilamonyü themia zie kepekru siro kijüu, nadiko tsiu sünu lhou keba pete pekawacü la.

¹⁸ Mharhiyakezhau la terhuorhi-e kedipuo mu! mha lhopie rhikelie, kemeda kepetha. Kekreilamonyü süu rhikeshüue puo thuo chükelieu peleya, puo rhikelieue die pulieya kemo miarhi puo zoü rei!

¹⁹ Sei üse, “Colie!” tsiu die pulieya kemo ketsie ki, “N thuo sielie!” iyakezhako we ce, chülietie! Süu mia pethalie vi me? Harie, süue suna mu rakachü pie kenhekecü rübei zo, mu uko gei kerhei thesü tuo moto zo.

²⁰ Derei Jihovae puo kemesa rüsuoki nu ba; kijü pete bu puo mhodzünu kemekrie bataliecie!