Galatiako 6 - Angami Naga CL (Re-edited) Bible (BSI)

Kekhoyalie

¹ A zeko, huomia kekrüketa ngu ro, nie Ruopfü themiako menuo di sikecümia cha tha kemezhü laliecie. Nie rei dophi sikecü nu leta molieketuo la menuolie.

² Nieko kekhoyalie, di Khrista zho-u chü tseilie.

³ Miapuonie mhathopuo mo zorei puo thuo puo le pevi ro, sümia u thuo u se penya tuoyakezha zo.

⁴ Kehoupuorei u mhatho-u kesie meholie; silie ro kekreimia mhatho la monyü u thuo u mhatho-u la u neilietuo.

⁵ Kehoupuorei u thuo u pieu pfü phre zotuocü la.

⁶ Dieu pie u pethalieketa khe bu mha kevi pete se u pethakeshümia ze kezalie.

⁷ Mia bu u sewa hiecie; Ukepenuopfü krenyüwalie kenjü, n thuo prukeshüu re la zotuo.

⁸ No n chüüphou la tsia vashü ro, chüüphou geinu kekau re latuo; derei no Ruopfüu la tsia vashü ro, Ruopfü geinu kechachie kerhei re latuo.

⁹ Süla mha kevi kechü u nyieta hie, kekreilamonyü we mezieta moro, puotei touki we re la zotuocü la.

¹⁰ Süla, we chülie kevi tei ngukelie ki, kepeleu kikru la pekuo di mia pete gei mha kevi chülie khe.

Tarhokeshü Thelau mu Kecha

¹¹ Harie a leshükhu kezhazhai di a thuo a dzie pie thushü ho.

¹² Huomia nieko kemvü chü nie bu nie zhüretuo üyakezhako themia mhodzü kemelha nyüyacü la zo, sükoe Khrista krus la mia bu u pechü molieketuo leya.

¹³ U zhürelieketako thuo rei thezho-u zeya mo, derei ukoe nie chüu la kemiako nyü di nie bu zhürelienuya.

¹⁴ Siürei a la zo we u Niepuu Jisu Khrista krus la kemholielie kevi zo, süu la a mhodzüki we kijüu pie krus geinu gouwate, mu a rei kijüu kitsa sita zo.

¹⁵ Kekreilamonyü u zhükere mu zhürekemo mhapuo mo, derei chü kesakelie-e puo bo zo.

¹⁶ Noune tsiu ngukemezhie bu thezho hau medzikezha khe, mu Ukepenuopfü themia Israelko ze tuolie.

¹⁷ Tsie yawinu mia puo bu rei a keyhu sa hietacie; kekreilamonyü a mo gei a Khrista dieliemia ükecü thepfü tuoketa la.

¹⁸ A kezeko, u Niepuu Jisu Khrista ngukemezhieu bu nieko ruopfü ze tuoliecie. Amen.