Galatiako 5 - Angami Naga CL (Re-edited) Bible (BSI)

¹ Kekreilamonyü u bu miadie chü motuo üdi Khrista u phaphreishüwate. Süla metei thalie mu nie kha lapie kedie vocie nu shü hie.

Miadie Chü Motuo üdi Kiekelie

² Harie, a Paul puya, nie chüpie nie zhüre üro, Khrista nie la kemevi jü.

³ Siro a tsie rei pu laya, kehoupuorei u zhüre la ro thezho-u pete chüüze morosuo.

⁴ Süla nie thezho-u ze di miatholie nyüyakezhako Khrista nunu nie chükho kreiwate; nieko ngukemezhie nu thalie mote.

⁵ Kekreilamonyü Ruopfü geinu kepele se di miathokelie kemerüu pfhe kelho tuo zo.

⁶ Kekreilamonyü Khrista Jisu kitsa we zhükere mu zhürekemo ha mhapuorei kekrei mo; derei kepele üse kekhrie nunu mhachükezhau zo.

⁷ Nieko ta tou vozhü ru supuo nieko bu ketho-u die ze hienu nieko khawa ga?

⁸ Nie ketshükeshü hau nie kiekelieu kinu vor mo zo.

⁹ Khrei keduo yopuo pie thou pete valieya.

¹⁰ Nieko mha le kekrüta kelho Niepuu nu nie gei a kethepfu ba zo. Derei nie kebvükeboukezhamia kehoupuorei siazha ngulie zotuo.

¹¹ Siro a kezeko, a tsie rei zhükere se pethaya üro, kiüdi a pechüpenyüya ga? Siüliro krus la mia nei kemo kechüu ba mote.

¹² Nie kebvüyakezhako bu u thuo u pecüwa tse a neikuotuo!

¹³ A zenuoko, miadie chü motuo ücü la nie kieliete; derei u medo kechü hau se di chüüphou mengu nu vota hie, sikecüumonyü kekhrieu se di nie huoniehuo lie chüliecie.

¹⁴ Kekreilamonyü thezho peteu dieca puo nu tseilie, “N zanuomia khriepie n thuo n kekhrie mhietuo,” icüu zo.

¹⁵ Sirei nieko kemeki ketecü ba zo üro nieko huoniehuo pekawa molieketuo la menuoliecie.

Chüüphou Mhathoko

¹⁶ A kepuu ro, Ruopfüu geinu lhoulie, mu chüüphou menguko chüta hie.

¹⁷ Chüüphou mengukoe Ruopfüu petsouya, mu Ruopfüu mengukoe chüüphou menguko ze kepetsouya; hanieha kepetsouya, nie bu nie menguu chüta molieketuo la.

¹⁸ Derei Ruopfüu bu nie chathalieta ro, nie thezho-u die chü tuo mote.

¹⁹ Siro chüüphou mhathoko meyiemeluopfü ba. Sükosü pierüü, mesa kemo, kerüyokecü,

²⁰ terhuorhi kerüsuo, themoukecü, kengukemvü, kegeikecü, mia ngu u rokecü, noupfhünouyie, kemeükecü, kediekrei, u rüla kreikecü,

²¹ mha kemehou, mezemelukecü, meze di kethenga si kemo, mu sükemhie kekrei rei sa. A thiedzü nieko ki pukeshü tuoi pu lashüya: Kehoupuorei sikecü chüyakezhamia Ukepenuopfü kedi wekelie jü.

Ruopfü Siu

²² Derei Ruopfü si ro kekhrie, u neikecü, kezekevi, shügeshühiekecü, mia ngukemezhie, vikecü, kedietho,

²³ menekecü mu u kethekerekecü. Thezho puorei mha hako kepetsou jü.

²⁴ Tsiu kehoupuorei Khrista Jisu vie chüketako chüüphou mu süu rüya menguko sa pie krus geinu gouwate.

²⁵ We Ruopfüu nu rhei tuoya liro, Ruopfüu nu tuolie khe.

²⁶ We komethuo di huoniehuo nei kemo chü, mia bu u ki vi nyü mo idi huoniehuo ngu u ro molie khe.