Galatiako 4 - Angami Naga CL (Re-edited) Bible (BSI)

¹ A pu kenyüu sü hau: kayieu nhicu keba chie, puo mha pete mho niepu zo ürei, puo miadiemia ze kekreiya mo;

² sidi puo puoe puotei puo chieshü kemochie puo thekemia mu kemeho-u khro baya.

³ Sümhiei di we rei thiedzü u nhicu ki, kijü hau nu ruopfüko die chü tuo.

⁴ Derei puotei touu vorlie tse, Ukepenuopfüe puo Nuou ketseshü di thenumiapfü puo geinu lhou vor, thezho-u khro nu penuolie,

⁵ thezho-u khro ketuoko rhalie di u peviepie u bu Ukepenuopfü nuonuo chülieketuo la.

⁶ Mu nie puo nuonuo chüketa la Ukepenuopfüe puo Nuou Ruopfü ketsepie u nou shü, süla we “Abba! Apuo!” idi kielieya.

⁷ Süla nie kituomia mote, derei nuothonuo chüte, mu nuothonuota üro, Ukepenuopfü geinu kayieu rei ta zo.

Paul Galatiako Rüli Kemedo

⁸ Thiedzü nieko Ukepenuopfü si kemo ki terhuo kemo kro puo die chü tuo.

⁹ Derei tsie we nieko Ukepenuopfü siliete, sizomonyü Ukepenuopfü bu nie siliete, kiüdi nieko rürei la kethachü mu kemezhiekecü ruopfüko ki votieya mu? Kiüdi nieko süko die chü la nyüya ga?

¹⁰ Niekoe teisozha tsiu thekhrü mu puotei kekreikreicü tsiu teicieko kenyüya.

¹¹ A nieko la mhachü kevorko kemethuo chükewa prei bate.

¹² Kezeko, a nie ki chaya, a mhieliecie, a rei nieko mhielietacü la. Nieko a gei kesuo puorei chü mo.

¹³ A dieliekeviu pie nieko petha kerietho-u va, a shürho ba kemo ki puo ükecü rükra batuo,

¹⁴ a chünyü geinu nieko dojükecü puo chü zo ürei, nieko a thi morei a melie reiwa mo, sicüumonyü Ukepenuopfü dieliemia puo tuoi, tsiu Khrista Jisu zekelie tuoi a zelie.

¹⁵ Thiedzü nie nei kebau kiüta ga? Süki we a ngukecü nie chülie vituo ücü sie we nie mhi rei kerülapie a tsüwa thenyü siei sie zo.

¹⁶ A tsie ketho-u nie ki pukeshü la nieko ngumvümia chüte me?

¹⁷ Mia kro puo puoca kevi nunu mo di nie la u nounyü phicü mhie tuoya; ukoe nie khawa di nie bu uko gei nie nounyü parta nyüya.

¹⁸ Puoca kevi puokecü sie huoniehuo la puotei pete nu thenou nyücü vi zo, mu hau a nieko ze keba ki rübei zo suo.

¹⁹ A nuonuoko, Khrista bu nieko nou ba toulie kemochie, a nieko la nuonuovachü chü bate,

²⁰ a bu tsie nieko ze ba di, a pfheü kreita ro a neitieciü, nieko la a mekeso chüpfü baketa la.

Hagar mu Sara Geinu Thakie

²¹ Nieko thezho-u khrükhro tuo nyüyakezhako a ki pushücie, nie thezho-u rünyüshü lho me?

²² Kekreilamonyü süu thukeshü Abraham puo nuo kenie nyi, puo kediepfü geinu mu kekreiu kediekemopfü geinu.

²³ Kediepfü geinu penuokelieu we chüüphou tsa nu zo, derei kediekemopfü geinu penuokelieu we phrapie kezhüu geinu zo.

²⁴ Hau pie dievi nu shüshü: thenunie pie dietseidiekho kenie thashü ba. Puoe Sinai Kijüthou geinu penuopie miadiemia chü, süpfüe Hagar.

²⁵ Hagarpfü pie Arabia nu keba Sinai Kijüthou mu tsiedo keba Jerusalem meseu chü, hapfüe puo nuonuo ze di miadiemia chücü la.

²⁶ Derei kekreipfüe pie pesogei Jerusalem meseu chü, süpfüe miadie chü mo mu süpfüe u zuopfü zo.

²⁷ Kekreilamonyü süu thupie kezhü; “N neiliecie, no nuojüpfü, nuo penuo kemopfü, keneipfü kelilie mu shieshülie, no nuonuovachü si mo zocüpfü; puo rübei kebapfü nuonuokoe puo nupfu ze lhou kebapfü nuonuoko ki krakuo zocü la.”

²⁸ Süla kezenuoko, niekoe Isak kemhiei phrapie kezhü nuonuokota zo.

²⁹ Derei thiedzü chüüphou nunu penuokelieu, ruopfü geinu penuokelie nuou pese zo, mu tsie rei sümhie ba zo.

³⁰ Derei kethodie nu kedipuo pu ga? “Kediepfü mu puo nuou whuowalie; kekreilamonyü kediepfü nuou bu kediekemopfü nuou ze kekarhelie kelho la.”

³¹ Süla a kezeko, we kediepfü nuonuo mo, derei kediekemopfü nuonuoko zo.