Galatiako 3 - Angami Naga CL (Re-edited) Bible (BSI)

Thezho morei Kepele

¹ Harie, mhalekemo Galatiako! Supuo bu nieko kemouwata ga? Nieko mhingu nu Jisu Khrista gouwaketa tha kemeyiemeluoshü ze!

² A nieko kinu hau rübei si nyüya: Ka, nie Ruopfüu ngukelie thezho-u nu chünukeshüko chükelie la mo nie rünyükelieko pelekelie la ga?

³ Nieko melo hi zo me? Ruopfüu nunu sede di themia medo nu puo thela chütuo me?

⁴ Nie mezhieko kemethuo puo chüte me? Süu kemethuo puotou zo üro,

⁵ Ukepenuopfüe Ruopfü pie nie tsü mu nieko donu ungomhatho chükeshüko ha nie thezho-u mhathoko chükelie la mo, rünyükelieko pelekelie la ga?

⁶ Abraham-e “Ukepenuopfü pelelie, süla puo ü miatho ülie.”

⁷ Süla kehoupuorei pelekeliemia Abraham yiemia ücü leliecie.

⁸ Siro kepele geinu Ukepenuopfüe Judakemomia bu rei mezhülieketuo kethodie-e pedzüperie pushü, sidi pedzüperie dieliekeviu pie Abraham ki pukecü, “Seyie pete n geinu thejapfütuo,” si.

⁹ Haha la, Abraham pelekelie tuoi kepelemia pete rei puo ze theja ngulieya.

¹⁰ Thezho-u mhatho merükezha pete rüseu khro bate, kekreilamonyü süu thupie kezhü, “Kehoupuorei thezho leshüdau nu thupie ketuo pete chüüzelie kemo khe rüsepfütuo,” isi zo.

¹¹ Süla miapuorei thezho-u la Ukepenuopfü mhodzünu mezhülieya mocü mecü zo; kekreilamonyü “Kemiathomia kepele geinu rheilietuo.”

¹² Derei thezho-u kepele nunu mo; sikecüumonyü “Kehoupuorei thezho-u nu chü morokesuoko chülie ro süko la rheilietuo.”

¹³ U la rüse puo chü di Khristae thezho-u rüse nunu u rhaliete, süu thupie kezhü, “Kehoupuorei sei geinu goukewa khe rüsepfüketamia zo,” isi,

¹⁴ süusü Khrista Jisu geinu Abraham thejau Judakemoko gei vorlieketuo la, sidi u bu kepele geinu phrapie kezhü Ruopfüu ngulieketuo la.

Abraham ki Phrakeshü

¹⁵ A siezedzürieko, a thiethie kelhou nunu thakie puo khashütuo: Mia puoe pfhekhodie puo chüpie bata ro, miapuorei süu pe morei rhü reiwaya mo.

¹⁶ Phrapie kezhüko Abraham tsiu puo yieu la zo; süu “Mu n yieko” idi mia kekra la pu mo; derei süu pucü, “Mu n yieu” idi mia puo la zo, süu Khrista zo.

¹⁷ A kepuu ro hau: Ukepenuopfüe pedzüperie dietseidiekho chüpie kezhüu sie, cie krie dia di ser zenu ngukelie thezho-ue phrapie kezhü die süu pie thedo chüwalie lho.

¹⁸ Mhanuü kayieu thezho-u kinu vor üro, süu phrapie kezhüu kinu vor mote; derei Ukepenuopfüe phrapie kezhüu geinu süu pie Abraham tsüshü.

Thezho-u mu Phrapie Kezhü

¹⁹ Siro thezho-u kedipuo la ga? Süu khakeshüe joketa la, phrapie kezhü puo yieu vor kemochie ba zo votuocü la zo; mu süu teigeidielieko bu se vor thedo nu dielie kechüu dzie nu shü.

²⁰ Thedo nu dielie kechüu we lutsahatsa la; mu Ukepenuopfü we puo zo.

²¹ Siüro thezho-u Ukepenuopfüe phrapie kezhüko petsoute me? Si mo zo! Kekreilamonyü thezho khakeshüu kerhei khashülie vi üro, thezho-u geinu miathokelie vor zotuo.

²² Kethodie-e mha pete pie kephouma khro shüwate, sidi Jisu Khrista kepele geinu phrapie kezhüu pie pelekelieko tsüketuo la.

²³ Kepele kevor mhodzü, kepeleu pekieshü kemochie thezho-u die chü mu u khapfü tuote.

²⁴ Sidi kepele geinu u bu miatholieketuo la, Khrista kevor mhodzü thezho-u bu u kepethau chü vor.

²⁵ Derei tsie we kepeleu vorte, mu we u pethashüyakecüu khro ba sa mote,

²⁶ Khrista Jisu kepele geinu nie pete Ukepenuopfü nuonuo chütakecü la.

²⁷ Nie Khrista nu dzülupfülieketa khe Khrista chü dzieliete.

²⁸ Judamia morei Grikmia üketuoko, kediemia morei kedie kemomia, thepfumia mu thenumia icüko kekreilie lho; pete Khrista Jisu geinu puo chüketa la.

²⁹ Tsiu nie Khrista vieta üro, nie Abraham yiemiate, mu phrapie kezhü kayieko rei ta zo.