Galatiako 2 - Angami Naga CL (Re-edited) Bible (BSI)

Paul mu Apostel Kekreiko

¹ Süsie cie keredia sie nu a Barnaba ze di Jerusalem nu la kho, mu Tita rei sa ze tuo.

² A bu sünu kho morosuo üdi pesikeshü la. Sidi a uko mhodzünu (kehou krütako ze kese kreikecü tei puo zorei) a dieliekeviu pie Judakemoko pethakeshüu pie pushü, a mhatho chükelieko mu chü saketuoko bu kemethuo puo chüta nyü kemo la.

³ A ze ketuou Tita, Grikmia zorei puo kemvü chüpie puo zhüretuo ücü chü mo.

⁴ Derei kepele khrava di huomia hie Jisu Khrista ze puo chüketa la hie shüphralieketa dze si nyü di hie kro-u nu hie rücie vor, sidi ukoe hie bu u diemia chütuoü sie,

⁵ derei dieliekevi ketho-u bu nie ze sei balieketuo la, hie puotei yopuorei pie uko tsüwa mo.

⁶ Siro krütamia üketuoko (uko thuo mhaü tuo zorei, a la mhapuorei krei mo; Ukepenuopfü miapuorei rhu pekreiya mo) a la zowe mhapuorei chüshü mo.

⁷ Sikecüumonyü uko Pitor bu dieliekeviu pie zhükereko pethanu puo pelekeshü tuoi a bu dieliekeviu pie zhürekemoko pethaketuo a peleshüketa ngulie,

⁸ (kekreilamonyü Pitor bu zhükereko la apostel chü di puo ze mhachükezhaue, Judamiakemoko la a bu apostel chüte).

⁹ Siro uko donu thekrütho chü keba Jakob, Kefa mu Johan ukoe ngukemezhie hau pie a tsüshüwaketa silie tse, uko u dzie u zatsa pie Barnaba hienie ze kedzie teshüshü, hienie bu Judakemoko mu ukoe zhükereko donu lietho chüketuo kepfhekholie.

¹⁰ Uko hienie bu kejüketsopfhüko vaphinu di kepu rübei sie mhapuorei cha mo, süu a chü nyü tuoyakecü puo zo.

Paul Antiok nu Pitor Kerhieketa

¹¹ Derei Pitor Antiok nu kevor ki a mhotsou puo petsouta zo, puo kekrü touketa la;

¹² kekreilamonyü Jakob kinu mia kro puo kevor mhodzü we puo Judakemoko ze mhacü baya zo. Derei uko vor tse, zhükereko prei di puo kerei kreilie di süko ze kepekro mota.

¹³ Mu Judamia kekreiko rei puo mhie ketherata, sidi süko bu Barnaba rei sewa di puo bu rei ketherata.

¹⁴ Derei uko dieliekevi ketho-u nu tuo seilie moketa a nguta tse, a uko pete mhodzünu Kefa ki, “No Judamia di Judakemomia mhiei lhou liro kedipuo mhie di no Judakemoko kemvü chüpie Judamia mhie di lhoulienuya ga?” ishü.

Kepele la Kelakelie Zo

¹⁵ We sietsenu Judamia, mu Judakemomia mhiei kephoumamia mo;

¹⁶ sirei we sikelie, mia puoe thezho-u chüüze di miatholieya mo, derei Jisu Khrista pelekelie rübei geinu zo. We rei miatholieketuo la Jisu Khrista peleliete, mu süu kepele pie Khrista gei bakelieu geinu zo. Thezho-u chüüzekelie geinu mo zo, miapuorei thezho chüüzekelie la miatholie kenjü zocü la.

¹⁷ We Khrista geinu miatholieketuo chüya üro, we rei kephoumamiata zo, di siro Khristae kephouma lietho-u üme? Si moto zo.

¹⁸ Derei a bierhuokewako a thuo chü lata ro, a thezho kevarhuomia puo ükecü thashüte.

¹⁹ Thezho-u geinu thezho-u a kitsa siata zo, sidi a Kepenuopfü kitsa rhei tuolieketuo la. Khrista ze a gouwate,

²⁰ mu a rhei tuoketa a monyü a nou keba Khristau zo. Mu tsie chüüzie nu lhou keba kelhou hau, Ukepenuopfü nuou kepele nu zo, puo a khrie di a la puo phou khashü.

²¹ A Ukepenuopfü ngukemezhieu pejüwalie kenjü, kekreilamonyü thezho geinu mezhükelie vorya üro, Khrista bu kemethuo nu siate.