Galatiako 1 - Angami Naga CL (Re-edited) Bible (BSI)

Kelukeshü

¹ Paul, themia thuo pethokeshü morei themia kekuo geinu mo, derei Jisu Khrista mu Ukepenuopfü u Puou, kesiako donunu Khrista phoukelieu kinu ketsekeshü apostel-u,

² siro a ze keba Ukepenuopfü kikru nu tsüphrümia chülieketa pete kinu, Khapie Galatia kehouko ki keshü:

³ Ukepenuopfü u Puou mu u Niepuu Jisu Khrista ngukemezhie mu nouneu bu nieko ze baliecie,

⁴ puoe Ukepenuopfü u Puou medo mhiei tsie kerüzhü tei hau nunu u shüphralietuoü u kephoumako la puo thuo puo phou khashü,

⁵ puo bu telhekechachie zapuzayie chücie. Amen.

Dieliekevi-e Puo Rübei Zo

⁶ Nieko rükri hathede chü Khrista kinu kepar ngukemezhie la nie kiekelieu therhiese dieliekevi kekrei puo vatazhücü a ngo zo,

⁷ süu üse dieliekevi kekrei ülie kenjü, derei huomia thuo nieko kebvü mu Khrista dieliekeviu pu pesuo nyükezha zo.

⁸ Derei hie rei morei teigeidieliemia shierei, hie pie nie pethashü kemo dieliekevi kekrei se nieko ki pu üro puo bu rüsepfücie.

⁹ Hie hadzü pukeshü tuoi, mu tsie rei pu laya, themia kehoupuorei nieko thiedzü ngukelie dieliekeviu kemo kekrei pupie nie petha ro puo bu rüsepfücie.

¹⁰ Ka, siro a themia nei chü nyüya mo, Ukepenuopfü nei chü nyüya ga? Mo a themia nei chütuoü pfhüya ga? A tsie rei themia nei chütuo üya ro, a Khrista kituomia chülie kenjü.

Paul Apostel Puo Chükelie

¹¹ A kezeko, a dieliekevi pie zhapu chükeshüu themia kinu sede mo ücü nie bu si nyü;

¹² a süu themia kinu ngulie mo, morei mia süu pie a petha mo, derei süu Jisu Khrista thuo pie a pesikeshü zo.

¹³ A thiedzü Judamia zho zekecü ki nieko a zho a rüli dze si zo. A Ukepenuopfü kehou pesüpemvüthor mu pekawatuoü a hie chü sie zo.

¹⁴ A Judamia zho keze nu a ramia a tshümiako ki vi se, u krü u pfutsanuo zhoko medzikecü mia kekra ki a rhierhukuocü la.

¹⁵ Derei Ukepenuopfü ngukemezhie la a penuolie kemonu puo thuo a kelakreilie mu a kieliete, mu puo medota

¹⁶ di puo Nuou pie a pengushü, a bu puo dze pie Judakemoko pethashülieketuo la, sükisü a themia medo rüsa mo,

¹⁷ morei Jerusalem nu a mhodzü apostel chü tuoketako ki kho mo, derei a rükri Arabia nu vo, mu süsie a Damaska nu la vor.

¹⁸ Sidi cie se sie nu Kefa ze kesetuoü Jerusalem nu kho di zha kerepengou puo ze ba;

¹⁹ sirei a Niepuu siezeu Jakob zo kemosie apostel kekreiko puorei ngu chie mo.

²⁰ A thupie nieko ki shükecüko, Ukepenuopfü mhodzü nunu puya, a tijü mo zo!

²¹ Süsie a Siria mu Kilikia kijüko nu vokecü zo,

²² tsiu süki zorei Khrista nou baketa Judia nu kehouko ze kese rei moluo;

²³ ukoe “Mia puo u pechüpenyüketuou sü tsie we puo thiedzü pekawatuo ükesie kepeleu pie mia petha tuote,” ikecü kesi zo.

²⁴ Sidi ukoe a la Ukepenuopfü tsheta.