Filipiko 4 - Angami Naga CL (Re-edited) Bible (BSI)

¹ Süla a zeko, ae khrie mu mengu tuoyakezhako, a keneiko mu a tsüreko, nieko Niepuu nunu metei tha zoliecie, a khrieko.

Tarhokeshü

² A Iwodia mu Suntuke unie bu Niepuu nunu nou puo chü zolienu di hüshüya.

³ U, mu harie, a dziese ketho-u, Siziga, a n bu thenu hanie khruohi sashünu pushüya, unie-e Klement mu a ze mhachüyakezha kerhei leshüda nu u za thulieketako rei ze dieliekevi lietho-u nu u rhiechü di a khruohi phi zocü la.

⁴ Niepuu nunu nie nei sei tuolie; a kepu sie pu rei, nie nei tuo zolie.

⁵ Nie nou kemeneu themia kehoupuo bu rei siliecie. Niepuu penuo bate.

⁶ Mhapuorei le nie nou kemezhie hie, derei mhakehoupuo nu rei Ukepenuopfü thezie di nie tsopfhüko pu cha mu melo ba zolie.

⁷ Silie ro Ukepenuopfü noune kesikele pete ki rükrükecüu thuo Khrista Jisu nunu nieko melou mu nie medoko rüguose balietuo.

⁸ Thela nu, a khrieko, mhakehoupuorei ketho ücüko, mhakehoupuorei therhu ücüko, mhakehoupuorei mezhü ücüko, mhakehoupuorei mesa ücüko, mhakehoupuorei u nei ücüko, mhakehoupuorei pu pevilie keviko, mu vi rükrü zocüko mu tshelie kevi huo nyi üro, süko le ba zoliecie.

⁹ Nieko a kinu silieketa, mu lielieketa, tsiu a geinu rünyülie mu nguwaketako, mha süko chü zolie, siro noune Kepenuopfüu nie ze tuolietuo.

Mha khakeshü la Theziekeshü

¹⁰ Nieko a rüli rükra di nie nounyü lakelie la a Niepuu nunu a nei phi bate; nieko a la nie nounyü tou ba zo, derei süu chüshüketuo tei ngulie mo vorte.

¹¹ A tsopfhüu la hau pu mo, kekreilamonyü kebakoyo rei se a nei balieketuo do siliete.

¹² A ketsakemere do rei si, mu ketshukelhuo kechü rei si. A mhaneiüko nu, puotei kehoupuo nu, pevü rei merü rei, ketshukelhuo shierei, jü shierei, kehoupuorei ze keselie kevi do siliete.

¹³ A chü pekuoshüyakezhau la a mhakehoupuorei chülie vi.

¹⁴ Puoü ba rei, nieko a mezhieu keza pfükelie la nieko pezie ho.

¹⁵ Nieko Filipiko, a dieliekevi mhatho sede therieki, Makedonia nunu tuoketa ki, nieko rübei sie kehou kekrei puorei mha khakeshü mu ngukelie nu rei a ze keza chie mo.

¹⁶ A Thesalonika nu keba ki rei nieko a tsopfhü vaphikeshü va puo rübei mo.

¹⁷ A mha methuo ngukelie pfhü mo, derei nieko za nu kengupie kezhüu bu mevipie süu salieketuo kepfhü zo.

¹⁸ A ngulie kezhü de pie a tsüshüte mu sü kezie rei nguliete; a nei tseite, nieko mha methuo khakeshüko Epafrodita kinu nguliete, mha cüko kethengu ruosuo, lielie kesü ruosuo mu Ukepenuopfü nei chükelie viewe.

¹⁹ Ukepenuopfü puo thuo Khrista Jisu nu zapuzayie kechü kinyi nunu nieko tsopfhü kheko nu nieko khruohishütuo.

²⁰ Siro Ukepenuopfü mu u Puou bu telhekechachie zapuzayie chüliecie. Amen.

Kelukeshü

²¹ Khrista Jisu nu ketuo kemesamia pete kelushücie. U zemia haki a ze kebako rei nieko kelushü ho.

²² Kemesamia pete rei nieko kelushüya, ba hurei Kaisar kiu kro nu ketuoko nieko kelushü ho.

²³ U Niepuu Jisu Khrista u ngukemezhieu bu nieko pete ruopfü ze bakelieu chücie.