Filipiko 3 - Angami Naga CL (Re-edited) Bible (BSI)

¹ Thela nu, a kezeko, Niepuu nunu nie nei baliecie. Kethu sie thupie nieko ki keshü a la kemezhiecü puorei mo, derei süu nie la kevi zo.

Kemiatho Ngukelie

² Tefüko la nie kireilie, mha kesuo kechüko kinu nie kireilie, u thuo u pechüyakezhako kinu nie kireilie.

³ Kekreilamonyü we zhükeremia ketho zo, Ukepenuopfü Ruopfüu nunu rüsuoyakezhamia tsiu Khrista Jisu la kemholie tuoya, mu chüüphou tsa la kethepfu puorei jü,

⁴ kemosie a zokecüu we chüümo gei a kethepfu balie kevi ca ba phi. Mhanuü huomia chüümo geinu u kethepfu nyilietuo üro, a we nyikuolie vi:

⁵ penuokelie zha thetha nhie a zhüre, Israel seyie nu Benjamin yiemia, Ibrimia donu rei Ibri ketho, thezho-u kitsa ro Farisimia,

⁶ u rhie kechütsa ro, kehouu pechükecümia, thezho-u kitsa kemiatho dze lesie ro miapuorei a pejolie kelhomia zo.

⁷ Sirei a thiedzü a la mevi üketuoko tsie Khrista la a süko üse mhathopuo ütuo mote.

⁸ Sizomonyü a Niepuu Khrista Jisu sikelie süu mha pete ki rei vikuoketa la mha kekreiko puorei phrü tuo mote. Puo la a mha pete khawate, tsiu a Khrista pie a vie chülie nyü di mha kekrei pete üse cienheciera chüwate,

⁹ sidi puo geinu a ngu reilieketuo la, siro thezho-u keze geinu a miatholie monyü Khrista pelekelie nunu zo, kemiatho süusü Ukepenuopfü kinu vorya mu kepele la zo.

¹⁰ A Khrista mu puo rheilasiekelie kekuo rei si nyü sidi puo mezhieko nu puo ze kemezhielie di puo seu nu rei puo mhielie,

¹¹ sidi a rei kesia nunu rheilakesie ngulieketuo la.

Pesogei Vieko Whuozhü Zo

¹² A süu ngulietaü morei votuo ükezhüu tsolietaü ba mo; derei süu pie a vie chülieketuo la whuozhü zo, kekreilamonyü Khrista Jisu thuo a pie puo vie chüliete.

¹³ A khrieko, a thuo süu pie a vie chülieta ükecü a le mo, derei a mhapuo chüya: Süu a sietsa kebako rükra mo di a mhodzütsa kezhüko penou beituo zo.

¹⁴ Ukepenuopfüe Khrista Jisu nunu mhapuo khashütuoü teigei nu a kiekezha a mha süu whuozhü zo.

¹⁵ Úko phichüketako we mha sükemhie le phrelie khe; mu nieko mha kekrei huo le ba üro, Ukepenuopfü thuo süu rei thashü nie kietuo.

¹⁶ Sirei we vor tsokelie tuoi tuo sa volie khe.

¹⁷ A zenuoko, nieko a dorie lieliecie, siro hie thapie nie kiekeshü mhie di lhouyakezhako meho menuolie.

¹⁸ Kekreilamonyü themia kekra Khrista krus-u ngumvü chü di lhou tuote; a tsiekenuo süko dze nieko ki pushü tuote, mu tsie rei kra zo di nie ki pu lashüzhie.

¹⁹ Süko thelau sü keka zo; uko vadi-e uko rhuo zo; mu uko zayie sü thenga kechüu zo; uko nou pie kijü nu vieko rübei le tuoya.

²⁰ Derei we teigei themia, mu we sünunu Kelakelieu Niepuu Jisu Khrista la kevor pfhe terüpfü ba.

²¹ Puo mha pete se puo khrükhro vorlie kevi kekuou pie u mo mhacümhatho kemo hau chü kedipie puo mo vithedze chükecüu mhielietuo.