Filipiko 2 - Angami Naga CL (Re-edited) Bible (BSI)

Khrista Dorieliekelie

¹ Süla Khrista geinu chü kethepfukecü die huo, kekhrie geinu thenou va pemvükecü, Ruopfü nu mha vierhe kechü, noushünouzhie mu huoniehuo ngumezhiekecü huo ba üro,

² a keneiu chü tseishücie: Nieko kenoumhielie, sidi kekhrie puo khrielie, nieko kenourhelie di nou puo chülie.

³ Nie thuo nie zhazhü kele mu komethuokecü nunu mhapuorei chü hie, derei nie chü kerünuolie di kekreimia üse nie ki vikuoü zoliecie.

⁴ Siro nie kehoupuorei nie thuo nie keneiu rübei leta hie di kekreimia rüli rei rükralie.

⁵ Khrista Jisu noule pie nieko nou shüse tuolie,

⁶ puo, Ukepenuopfü rhiu zo shierei, Ukepenuopfü ze kethede üdi, puo thuo puo la mhapuorei chü mo,

⁷ derei puo thuo puo chü pejülie, miadiemia rhi chüpfü, themia mevi di penuolie. Siro themia rhi chüpfü di,

⁸ puo thuo puo chü kerünuolie sidi kesia ketso rei dieze chü zo tha, krus se rei chü zo.

⁹ Süla Ukepenuopfü rei puo chü pezha phishü mu theza peteko ki rei rükriekecü, theza pie puo tsüwate,

¹⁰ süla Jisu za nunu khoudza pete khoutou phretuo, teigei rei tsiu kijü rei mu kijü khro rei,

¹¹ tsiu Ukepenuopfü u Puou bu zayie chüketuo la, themia meü pete rei Jisu Khristae Niepuu zo ücü phra phretuo.

Kijü nu Kezie Puo Chü Zolie

¹² Süla a khrieko, nieko a dieze chü sei kevor tuoi, a kengu ki rübei monyü tsie we a ngu kemo ki pekuo di nie kelakelie nu michie mu pe zo di lhoushülie;

¹³ kekreilamonyü Ukepenuopfüe nie geinu mhachü tuo zo, sidi puo nei puo medo kemhiei chülieketuo la nie bu chü nyülie mu chülieketuo rei chüshüya.

¹⁴ Panyapara mu kemeüta mo di mhakehoupuorei chücie,

¹⁵ silie ro nie kijü hanu kerüzhü tsiu mesa kemoko donu mesa mu pejolie kelhomia chü di Ukepenuopfü nuonuo chü zo teigei khrüthemvü mhie zie balietuo.

¹⁶ Nieko kerhei dieu thezetsase bakelie geinu Khrista zha nhie a bu a neilietuo, a kemethuo puo la ta kewhuo mo, morei puoca kejü puo nu mhachü kemezhie tuo mocü la.

¹⁷ Derei mhanuü a kelhou ha pie nie kepele ruosuo puo chü di a zie kengeshü morosuotatuo ürei a nei mu nieko pete ze a nei zotuo,

¹⁸ siro sütuoi nieko rei nie noumvü mu a ze nieko neilie zhü.

Timothi mu Epafrodita

¹⁹ Telhe mo di Timothi ketsepie nieko ki shüketuo Niepuu nunu merü ba, a bu nieko pete dze sishü di a noumvülieketuo la.

²⁰ Nieko zhazhü le di thenounyü kethoyakezha puo mhiekecü puorei ba mo zo.

²¹ Kekreiko pete we Jisu Khrista la monyü u thuo u mevi la tuoya.

²² Derei nieko Timothi kevi si ba, puokrüpuonuo tuoi dieliekevi mhatho-u nu puo a ze kekhruohi vor.

²³ Süla a dze kedipuo mhietie shi silie mumetha a puo ketseshüketuo le ba;

²⁴ mu a Niepuu nu pelekecü a thuo zo rei pecha mo di nieko ki vorketuo merü ba.

²⁵ Sizorei, a siezeu, a ze kedziese di lietho chü siro Khrista chüpahi chükezha, nieko dielie se kevor mu a tsopfhü ki a thekekezhau Epafrodita ketsepie nie ki shü morokesuo le ba;

²⁶ puo rei nieko pete mengu ba, tsiu puo suokewa dze nieko bu sikewa la sa puo nou kemezhie ba.

²⁷ Puo suowa ketho, mu sia reita nyünuo zo. Derei Ukepenuopfü puo ngumezhieshü, mu puo rübei monyü a bu a noukesuo sie rei suo sa moketuo la a rei ngumezhieshü.

²⁸ Siro a rei puo ketseshü nyü di pfhelie kelho chü bate, süusü nieko bu rei puo ngu lashü di nieko neilie mu a bu rei a nounyü petsalieketuo la.

²⁹ Süla nieko Niepuu nunu nie nei siei di puo zeliecie, mu themia hakemhiemia rhushücie,

³⁰ nieko a gei chü nyü di chülie lho kebau puoe chü tseishütuo üdi puo kelhoupie kemichie nu shü, mu sidi Khrista lietho-u la sia reita nyünuo zocü la.