Filemon 1 - Angami Naga CL (Re-edited) Bible (BSI)

Kelukeshü

¹ Paul, Khrista Jisu la kedie chü ketuou, mu u siezeu Timothi kinu, Thupie hie khrieu mu kedziese di mhachüyakezha Filemon,

² tsiu u üpfü Afia, mu hie ze chüpahi chüyakezhau Arkipa tsiu n kinu kehouyakezhako ki keshü:

³ Ukepenuopfü u Puou mu Niepuu Jisu Khrista bu ngukemezhie tsiu noune pie nieko tsücie.

Filemon Kekhrie mu Kepele

⁴ A kecha nu n rükrakecü metsei a a Kepenuopfü thezie sei baya,

⁵ kekreilamonyü no kemesako pete khrie mu Niepuu Jisu kitsa n kepele keba dze sikelie la.

⁶ A kechau sü, n bu Khrista nunu mha kevi se u vie chü baketako si pesou salie di n kepele keza pevi sakelieu zo.

⁷ A siezeu, n kekhrie geinu a kenei mu thenou keluo ngu philieya, kekreilamonyü n la kemesako u nou va perheikelie ngukelie la.

Paul Onesima la Puo Mezhiemelokecü

⁸ Mhaca hau la, a Khrista geinu thepfu se di n bu n mhatho chülienu diekhashülie vi zo ürei,

⁹ a kekhrie nunu n ki chakecüu a neikuote, mu a Paul, phichümia puote, siro Jisu Khrista diemia puo rei chü sa di süu chaya.

¹⁰ A n ki chayakecüu sü, kedieki nunu a puo puo chüketa a nuou Onesima la zo.

¹¹ Hamhodzü we n bu puo la kepra puorei jü, derei tsie we puo n la mu a la rei mevi sekecü puo chüliete.

¹² A tsie puo ketse lapie n ki shüya, süu a melouu zo.

¹³ A puo khapie puo bu a ze bata nyü, sidi a dieliekeviu la kedie chü ketuo ki puo bu n sou chü a lie chü bata nyü zo;

¹⁴ derei a n medo rüsa mo di mhapuorei chü nyü mo, süusü n kemvü kechü geinu monyü n bu n nou nu keda di ketseikevi thashüketuo la zo.

¹⁵ Siro puo zopuoki n therüketa ha, puo bu la vor n ze sei bataketuo puo la mecie,

¹⁶ puo ü kediemia ü sa monyü, kediemia ki rei u kekhrie siezemia puo chüte, süu a kitsa rei zo, derei n kitsatie rei, puoe chüüphou nu mu Niepuu kitsa rei sikuota zo.

¹⁷ Süla no a üse n dziesemia puo ücü leya ro, a zekelie tuoi puo zeliecie.

¹⁸ Puo n gei kekrüwata ümharo, morei n pu pfüzhü üro, süu a za nu shüwacie.

¹⁹ A Paul, a thuo a dzie se leshü hau thushüya: a thepu süko su phrewatuo. No n phou zorei a pu pfüzhü zo, derei a süu pu lho.

²⁰ Uwe, a siezeu, Niepuu zanu n geinu mha hau pie a mevi chücie. Khrista geinu a nou va pemvüshücie.

²¹ No kediezelieketuo thepfu di a thupie n ki shüzhie ho, mu noe a kepu ha kezie rei chü zoketuo si ba zo.

²² Siro a la rüsobou puo kesepie bacie, nie kecha geinu mia a kha lashü di a bu nieko ki vorlieketuo merü ba.

Kelukeshü Thelau

²³ Khrista Jisu nu a ze kedie chü kebau Epafra n kelushü ho,

²⁴ mu a ze mhachüyakezhako Mark, Aristarka, Dema mu Luk rei sa n kelushüya.

²⁵ Niepuu Jisu Khrista ngukemezhieu bu n ruopfü ze baliecie.