Ezra 9 - Angami Naga CL (Re-edited) Bible (BSI)

Ezra Kecha

¹ Mha hako chüwata tse, kezhakoe a ki vor di sie, “Israel themiako, zievoko, mu Leviko, kijüu nu themiako donunu u thuo u kelakrei se balie mote, ukoe kerütsekecüko chü di Kananmia, Hitmia, Perizmia, Jebusmia, Ammonmia, Moabmia, Ijiptmia mu Amormia kemhie bate.

² Kekreilamonyü ukoe uko thuo uko la, uko nuonuo thepfuko la, süko nuonuo thenuko lieliete, süla kemesa tsiau kijüu nu themiako ze kereiwate, mu kejokemou mhatho hau nu kezhako mu mia kekhayakezhakoe kerie chüta zo.”

³ Ae mha hau sikelie ki, a pfhenei tsiu a pfhedzie cierhawa, mu a tsütha mu a tiemie pie zo di a kedethepfü bata.

⁴ Sitse Israel Kepenuopfü dieko sishü di michiekelie pete vor a houpfülie, a thevatie ruosuo kechü tei ketso a kedepfü bacü ki, süu miadie chü di la vorketako kephouma la.

⁵ Sidi thevatie ruosuo kechü teiki, a mevo bakecü nunu sielie, di a pfhenei mu a pfhedzie cierhawa di, süsie a khoutoulie di a dzie yhapie Jihova a Kepenuopfü ki shü,

⁶ di sie, “He-i a Kepenuopfü, a tosie n mehoketuo rei le mengathorte mu a ziejüte, a Kepenuopfü, kekreilamonyü hieko kesuo kechüko hie tsüko ki rei rükriekuote, mu hie kejoko kho tei thu bate.

⁷ Hieko puonuoko teiki nu vor thie ketso kejokemou sou sete; tsiu hieko kesuo kechüko la nu, hieko, hie kediko, hie zievoko khapie kijüu nu kedimiako dzie nu, zhiecha, miadiemiaphrie, kepeka nu shüwa, mu thenga ngadi kralie, thie hakemhie tou.

⁸ Derei tsie puotei huoyo la Jihova hie Kepenuopfüe ngukemezhie thashü, puoe hieko bu talietuoü lhiekelie mu puo kemesa nu thechü khrukhrekecü puo khashü u tsü, süusü hieko Kepenuopfüe hieko mhi bie perhoshütuoü, sidi hie miadie chü ketuo nu hie chü perhei zashütuo ükecü la zo.

⁹ Kekreilamonyü hiekoe miadiemia zo; sirei hieko Kepenuopfü hie miadie chü ketuo ki rei hie khawa mo, derei Persia kediu mhinguki hieko ngumezhieshü, sidi hieko chü perheishü hieko bu Kepenuopfü kiu chü laketuo mu, süu ruo zhüketako chü kesa lashü, tsiu Juda mu Jerusalem nu hieko dahou pfheshü.

¹⁰ “Siro tsie, hie Kepenuopfü, hie kedipuo pu salie ta? Hie no diekhakeshüko khakegewata zeru.

¹¹ Süko noe n kituo siedzekesiko geinu khashü di pucü, ‘Nieko vo di welieketuo kijüu sünu themiako la mesa mote, uko kerütsekecü chükecüko lanu, uko mesa kemoko tietsatiepuo nu vo kekreitsatie ketshu chü di kijüu bu mesa mote.

¹² Süla nie nuonuo thenuko pie süko nuonuo thepfuko ki penyi hie morei nieko nuonuo thepfuko bu uko nuonuo thenuko lie hie, morei uko ze vitho kechü uko kinyi mhakipuorei mehou hie; siliro nieko meteilie di kijü keviu cüükrie tsiu süu khapie nie nuonuoko bu kechachie welietuo.’

¹³ Hieko mhatho kesuoko la, hie gei kevor peteko, hie kephouma kemeriekecüko la, noe ngukeshü ki, hie Kepenuopfü, hie kejo zhakhra chü kezhü de chü mokecü ngushü, sidi hieko lhieshü ürei;

¹⁴ hieko n diekhakeshüko varhuo di, vo mha kerütsekecü themia hako ze kesekerikecü chü tuo me? No hieko peka tseiwa, di miapuorei rhalieketuo morei lhiekeshü tuo mota kemochie hieko gei n nei mo baketa mese moü me?

¹⁵ He-i Jihova, Israel Kepenuopfü, noe miatho zo, hiekoe lhiekeliemia puo tuoi tapralie, thie hakemhiei, derei hieko n mhodzünu hie kephouma nu ba zo, mha hau la n mhodzünu miapuorei thalie kenjü zo ürei.”