Ezra 8 - Angami Naga CL (Re-edited) Bible (BSI)

¹ Hako u chienuo nu krütako, mu hako Artaxerxes Kediu teiki Babilon nunu a ze kekhorko.

² Finehas nuoko donu Gershom. Ithamar nuoko donu Daniel; David nuoko donu Hatush.

³ Shekania nuonuo mia puo; Parosh nuoko donu Zakaria, mu puo sa di thepfumia mia krie puo di hiepengou.

⁴ Pahat-moab nuoko liro, Zerahia nuou Eliehoenai, mu puo sa thepfumia krie kenie.

⁵ Zatu nuoko liro, Jahaziel nuou Shekania, mu puo sa thepfumia krie se.

⁶ Adin nuoko liro, Jonathan nuou Ebed, mu puo sa thepfumia hiepengou.

⁷ Elam nuoko liro, Athalia nuou, Jeshaia, mu puo sa thepfumia hiethenie.

⁸ Shefatia nuoko liro, Mikael nuou Zebadia, mu puo sa thepfumia hiethetha.

⁹ Joab nuoko liro, Jehiel nuou Obadia, mu puo sa thepfumia krie kenie di kerethetha.

¹⁰ Bani nuoko liro, Josifia nuou Shelomit, mu puo sa thepfumia krie puo di hiesorou.

¹¹ Bebai nuoko, Bebai nuou Zakaria mu puo sa thepfumia mepfüethetha.

¹² Azgad nuoko liro, Hakatan nuou Johanan, mu puo sa thepfumia krie puo di ker.

¹³ Adonikam nuoko liro, kenuo zenu kevorko, uko za Elifelet, Jeuel mu Shemaia, mu uko sa thepfumia hiesorou.

¹⁴ Bigvai nuoko liro, Uthai mu Zakur, mu unie sa thepfumia hiethenie.

Kerüsuoki nu Chalieko

¹⁵ Ae uko kie kengu pie kerü kru Ahava tsa vokezhü nu shülie, sidi hiekoe zha se sünu razhü chü. A themiako mu zievoko meho sie ru, Levi nuonuo miapuorei ba kemo ngulie.

¹⁶ Sitse ae mia ketsepie Eliezer, Ariel, Shemaia, Jarib, Elnathan, mu Nathan, Zakaria mu Meshulam, pehü hako kie, mu kesikele ugei keba Joiarib mu Elnathan unie rei kie,

¹⁷ sidi uko ketsepie Ido ki shü, puoe Kesifia thechüu nu krütau, uko bu Kesifia thechüu nu keba siezedzürie rüsuoki chalieko ki kedipuo pulie morosuo shikecü pushü, süusü uko bu Kepenuopfü kiu la liethomia ze vorlie morosuo ücü pushü.

¹⁸ Siro Ukepenuopfü dzie keviu hie gei tuocü la, ukoe mhakesikelemia puo, Mahli nuonuo thepfuko donu, Levi nuonuo thepfuko donu, Israel nuou ze hie ki vorshü, puo za Sherebia, puo nuo thepfuko mu puo seyieko sa mia kerethetha.

¹⁹ Siro Hashabia, mu Merari nuonuoko donu Jeshaia, mu puo seyiemia uko mia mepfü rei sa;

²⁰ sizokemo rüsuoki chalieko mia krie kenie di mepfü sa, David mu puo khro kezhakoe uko bu Levimia mehotuo üdi kelakreikewako rei sa. Hako pete rei u za thu krei phre.

Mevo di Kecha Chükecü

²¹ Siro ae Ahava rüu kinu mevolienu di pushü, hie bu Ukepenuopfü mhodzünu u thuo u chü kerünuolie di u la, u nuonuo la siro u kinyi pete la cha nu hie rüguolieketuo pfhüketuo la.

²² Kekreilamonyü ae kediu ki chüpahimia mu kierkesemia kro puo bu cha nu ngumvümia perhie di hieko rüguoketuo cha mengata, hiekoe kediu ki, Ukepenuopfü dzie keviu puo pfhüyakezhamia pete gei keviu chülieya zo; derei kekuo mu puo noupfhünouyieu puo khakewamia perhie tuoyaü siwaketa la.

²³ Sidi hieko hau la mevo mu Ukepenuopfü ki chalie, sitse puoe hieko pfhe rünyülie.

Rüsuokiu la Mha Khakeshü

²⁴ Süsie ae zievo krüta kerekenie kedalie, Sherebia, Hashabia, mu unie seyiemia mia ker.

²⁵ Sidi ae rakachü, suna, mu mhabouko se Ukepenuopfü kiu nu ruosuo chüketuo la mu Israel pete-e khakeshüko mejüpie uko tsüshü, kediu, puo ketarhoko, puo niepuko, ba di süko khashü.

²⁶ Sidi a rakachü krie sorou di hiepengou, mu rakachü pie kechü mhabou talent krie puo, mu suna talent krie puo;

²⁷ suna khou mepfü puoma darik nyie puo; mu mese kevi pie kechü mhabou kenie, süu re pie suna tuoi zo.

²⁸ Siro a uko ki: “Nieko Jihova kitsatie mesa, mhabouko rei mesa; siro rakachü mu suna hako kenei nu khapie Jihova nie puonuoko Kepenuopfü ketsü ruosuo zo.

²⁹ Nieko süko pfhe balie mu kha menuopie balie, Jerusalem nu Jihova ki nu kibouko nu zievoko mu Leviko miapuonuo pehüko mhodzünu nieko süko mejüshüwa kemochie.”

³⁰ Sidi zievoko mu Levikoe rakachü mu suna, mu mhabou mejükeshüko se Jerusalem nu úko Kepenuopfü ki nu vortatuo üdi lielie.

Jerusalem nu La Vorkelie

³¹ Süsie hieko Jerusalem nu votatuo üdi, thekhrü thenieu nu zha kerekenie nhie Ahava rü nunu tuoshü, hieko Kepenuopfü dzieu hie gei tuo, di puoe ngumvümia dzie nunu, mu cha nu hie rü kebamia dzie nunu hie kelashü.

³² Sidi hieko Jerusalem nu vorlie, di sünu zha se balie.

³³ Sidi zha diau nhie Uria nuou Meremot zievo-u dzie nu rakachü mu suna, mu mhabouko mejüshüwa; süki Finehas nuou Eliazar rei puo ze ba; mu Levimia Jeshua nuou Jozabad mu Binui nuou Noadia rei unie ze ba.

³⁴ Mha pete phrülie mu mejülie, sidi mejükelie pete thupie zhüwa.

³⁵ Süki tezeketa nuonuoko rei miadie chü di vorkelieko, ruosuo chüpie Israel Kepenuopfü tsü, Israel pete kephouma ruosuo la, thudo kerekenie, tekuochü hiethepfüesorou, tekuonuo hietheniethenie, mvüdo kerekenie, hako pete se kethe ruosuo chüpie Jihova tsü.

³⁶ Süsie rei ukoe kediu ahzako pie kediu khro kebamia mu Kerü khie Lutsa keba ahngko tsüwa, sidi ukoe themiako mu Ukepenuopfü kiu khruohishü.