Ezra 7 - Angami Naga CL (Re-edited) Bible (BSI)

Ezra mu Puo Zeko Jerusalem nu Vorkelie

¹ Mha hako sie, Persia Kediu Artaxerxes kedi teiki, Seraia nuou Ezra, Azaria nuou, Hilkia nuou.

² Shalum nuou, Zadok nuou, Ahitub nuou,

³ Amaria nuou, Azaria nuou, Meraiot nuou,

⁴ Zerahia nuou, Uzi nuou, Buki nuou

⁵ Abishua nuou, Finehas nuou, Eliazar nuou, Aron zievo kezhau nuou.

⁶ Ezra hau Babilon nunu khorta. Puoe Mosa zho-u, Jihova Israel Kepenuopfü khakeshüu tsatie, thezho kesitho puo, tsiu Jihova puo Kepenuopfü dzie puo gei ketuo kemhiei kediue puo kecha pete chüshü puo tsü.

⁷ Siro Israelmia huo, zievoko mu Leviko, ükechüko, carekepfheko mu rüsuoki chalieko rei Jerusalem nu kho, süu Artaxerxes Kediu dikelie cie thenie cie.

⁸ Sidi ukoe khrü pengouu nu Jerusalem nu vorlie, süu kediu dikelie teicie thenie cie.

⁹ Uko thekhrü kerieu nu zha therie nhie Babilon nunu tuo sedeshü mu khrü pengouu khrü zha therie nhie puoe Jerusalem nu vorlie, puo Kepenuopfü dzie keviu puo gei tuokecü la.

¹⁰ Kekreilamonyü Ezrae Jihova zho-u pfhülietuoü, tsiu süu chüüzelietuoü, siro chünukeshüko mu pethokeshüzhoko pie Israel pethashütuoü puo nou nu rhülietakecü la.

¹¹ Hau Artaxerxes Kediue leshü khapie zievo-u Ezra, thezho kesitho-u, Jihova diekhakeshü mu chünukecüko khapie Israel ketsü zhotsatie kesiu tsükeshü hauha:

¹² “Artaxerxes, kediko mho kediu, khapie zievo-u Ezra, teigei ketuo Ukepenuopfü zhotsatie leshü kesitho-u ki shüzhie. Thenou kemene bu n ze baliecie. Mu tsie

¹³ ae thezho puo chüshüwate, süu a kedirüvie nu Israel themia kehoupuorei, morei zievoko, morei Leviko, u thuo Jerusalem nu kho kenyümia bu n ze kholiecie.

¹⁴ Kediu mu puo themia mia tarhoshüyakezha theniekoe n ketseshüzhie, süu n bu n dzie nu ketuo n Kepenuopfü zho-u kemhie di Juda mu Jerusalem dze ketsolienukecü la.

¹⁵ Siro n bu kediu mu puo themia mia tarholieyakezhakoe u thuo u nei di khapie Jerusalem nu bayakezha Israel Kepenuopfü ketsü rakachü mu sunako se voketuo la.

¹⁶ Siro noe Babilon rüna pete nu rakachü mu suna ngukelie pete, mu themiakoe u nei di khakeshüko sa di n nei di Jerusalem nu keba Ukepenuopfü kiu la khakeshü sa seliecie.

¹⁷ Sidi no menuo di raka hau se thudo, tekuochü mu tekuonuo khrülie, siro thoulha ruosuo mu kekrie ruosuo salie di, süko pie Jerusalem nu n Kepenuopfü kiu nu ruosuoba geinu ruosuo chüshüliecie.

¹⁸ Siro no mu dzieseko mhodzüki mha kiu vi shiü, Kepenuopfü medo ze di rakachü mu suna peshakelieko se chüliecie.

¹⁹ N Kepenuopfü kiu nu mhatho la mhabouko khapie n tsüshüwate ho, süla no sükosü pie Jerusalem nu Kepenuopfü mhodzünu shüwalie.

²⁰ Tsiu n Kepenuopfü kiu la kedipuopuo se sa morosuo shiü, no se nyükecü ba liro, kediu kinyi nunu seliecie.

²¹ “Siro a, Kediu Artaxerxes, Kerü khie Lutsatie keba kinyi seyakezha peteko ki die khashüte, süusü zievo-u Ezra teigei keba Kepenuopfü zhotsatie kesitho-u, nieko ki mhacha liro, süu kenourhei di chüshülie.

²² Rakachü talent krie puo ketso, tsiu thoulha kor krie puo ketso, khubezu bath krie puo ketso, mu tier bou krie puo ketso, tsiu metsie se morokesuo de.

²³ Teigei keba Kepenuopfü die khakeshüu keshürhei di chüshüliecie, moliro puo noupfhünouyieu kediu mu puo nuonuoko kediba nu vorta rei silie lhomu.

²⁴ Siro zievoko kehoupuo shierei, Leviko, ükechüko, kikha kepfheko, rüsuoki chalieko, morei Kepenuopfü ki hau nu liethoko gei khezhanuo, thekhruo morei u zhoki chü di mha khruokecü pie uko gei shükecü thezho mo, ikecü pie pesiya.

²⁵ “Siro no, Ezra, n Kepenuopfü mhasi pie n ketsü mhie di mia dienya kecüketuo tsiu thecathepi chüketuomia kedaliecie, sidi sümia bu Kerü khie Lutsatie keba themia peteko dienya kecüliecie; suomia Kepenuopfü zhoko si shiü sümia kedalie, siro suomia süko si mo shiü sümia pethashülie.

²⁶ Suomia n Kepenuopfü zho mu kediu zho zelie lhoütie shi, kenourhei sümia dienya pepiwalie, süu kesia rei, morei puo whuowatuo rei, morei puo ya lielietuo rei, morei kedie chütuo shierei, pepiwalie.”

²⁷ U puonuoko Kepenuopfü Jihova bu thetshetherhu pfüliecie, puoe mha haikecü pie kediu melou nu shü, di puo bu Jerusalem nu keba Jihova kiu ketso kezivishütuo ükezhü la.

²⁸ Sidi kediu, mu mia tarhoyakezha puo themiako mu kediu nuonuo kekuoko mhodzünu ngukemezhie pie a tsü. Tsiu Jihova a Kepenuopfü dzie a gei ketuo la a thepfulie, sidi ae Israelmia donu krütamiako bu a ze khotuoü kie kengulie.