Ezra 6 - Angami Naga CL (Re-edited) Bible (BSI)

¹ Sitse Darius Kediu diekhashü, di Babilon nu leshü thupie kengupie kezhü kiu nu pfhü.

² Derei vo Media rüvie seluoba Akbatana nunu leshütshü puo ngulie, sünu hakemhie di thupie tuo: “Thupie ketuou.

³ Puo dikelie teicie therie cie, Sairos Kediue die khakeshü: Jerusalem nu Ukepenuopfü la, kiu chüliecie, ruosuo chüyakezha mu kethe ruosuo khashüyakezha thechüu, puo rükrie thu hiesorou, mu puo zha thu hiesorou;

⁴ ketsie phrokelie kezhazhakecü cha se mu sei se cha puo chü; siro puo meza kediu kinyi nunu se mezatuo.

⁵ Sizomonyü Kepenuopfü kiu nu suna mu rakachü hiekhou Nebukadnezar-e Jerusalem rüsuokiu nunu chüse vo Babilon nu shükewako, pfhü kengu lalie di se la vo Jerusalem rüsuokiu nu, puo thuo puo tha nu shülie, sidi süko pie Kepenuopfü kinu shüwalie.”

⁶ “Süla tsie Tatenai, Kerü khie Lutsa kezhau, Ahng Shethar-bozenai, mu Kerü khie Lutsa unie zemiako, rüditalie;

⁷ Judako ahng mu Judako phichüko bu pheu nunu Ukepenuopfü kiu chülie, Kepenuopfü ki kechü mhatho hau kebvü hie.

⁸ Sizomonyü ae Kepenuopfü kiu la Judamia phichü hako gei nieko bu chüshü morokesuo thezho puo khashüya. Kerü Lutsakhie nu kediu khezhanuo ngukelie nunu rüsuoki kechü ma pie themiako tsü mhashülie.

⁹ Siro se morokesuo kehoupuorei thudonuo, tekuochü morei tekuonuo, teigei ketuo Kepenuopfü ki kethe ruosuo chüketuo la, thoulha, metsie, shierei Jerusalem nu zievokoe se morokesuo de, teisonhie khapie uko tsüshü mota hie;

¹⁰ sidi uko bu teigei keba Kepenuopfü nei kechü ruosuo chü di kediu mu puo nuonuoko kerheiro la kecha chüshülieketuo la.

¹¹ Siro a thezho puo chü sashüya, süusü themia kehoupuorei hau bie kediwa liro themia süu kinu kizo ciethalie di süu geinu puo rhüpie zhawatuo. Ki süu pie thubuokhru chüwatuo.

¹² Kepenuopfü, puo za sünu balieketau, kehoupuorei, kedimia shierei, morei hau kedikewamia, tsiu Jerusalem nu Kepenuopfü kiu bie pesuokecümia phewalie. A, Darius, thezho khashü; süu keshürhei di chüshüliecie.”

Rüsuokiu Kenyükelie

¹³ Sitse Kerü Lutsatie keba ahng-u Tatenai, Shethar-bozenai, mu unie kezemiako Kediu Darius die khakeshüu kemhie chülie.

¹⁴ Siro Judamia phichüko kiu chü, tsiu siedzekesinie Hagai mu Ido nuou Zekaria unie siedzedie kepu geinu chü pevi selie. Ukoe Israel Kepenuopfüe diekhakeshü mu Sairos, Darius mu Persia kediu Artaxerxes uko thezho khakeshü medzi di kiu chülie, tsiu süu chü tseiwa.

¹⁵ Ki hauha Adar-u khrü zha se nhie, Darius Kediu kedi chükelie teicie sorou cie chü tseilie.

¹⁶ Mu Israelmiako, zievoko mu Leviko, tsiu miadie chü tuo di la vorketakoe u nei se di Kepenuopfü ki hau chü kemesalie.

¹⁷ Sidi Kepenuopfü ki chü kemesakecü ki pedo krie puo, tekuochü krie kenie, tekuonuo krie dia pie ruosuo chü; siro Israel pete kephouma la ruosuo kechü liro, mvüdo kerekenie, Israel seyieko tse khashü.

¹⁸ Tsiu ukoe Mosa leshüdau nu thupie kezhü medzi di zievoko khapie u thuo u thau nu shüwa, mu Leviko u thuo u thau nu shüwa, süu Jerusalem nu Ukepenuopfü mhatho chüketuo la.

Ciekevo-u Nyikecü

¹⁹ Siro khrü therie nu zha keredia nhie miadie chü tuo di la vorketako ciekevo-u nyilie.

²⁰ Kekreilamonyü zievoko mu Leviko keze di u thuo u chü kemesalie; uko peteko rei mesate. Süla ukoe miadie chü tuo di la kevorko pete la zievoko la mu u thuo u la ciekevo kuonuou dukhrilie.

²¹ Israelmia miadie chü tuo di la vorketako siro Jihova, Israel Kepenuopfü rüsuotuo üdi kijü nu themiako donunu u perhuwa lho üdi u thuo u kelakreikelieko pete keze süu cü.

²² Sidi teisozha thenie u nei se di khreiüshükemo niekhrüdanyiu nyi; kekreilamonyü Jihova uko chüpie uko bu u nei selieketuo chüshü mu Asiria kediu nou chüpie uko kitsa shü, di puo bu Israel Kepenuopfü, Ukepenuopfü kiu mhatho nu uko khruohikelie la.