Ezra 5 - Angami Naga CL (Re-edited) Bible (BSI)

Kerüsuokiu Chü Sedekelie

¹ Süki Hagai siedzekesiu mu Ido nuou Zakaria Judamia Juda mu Jerusalem nu ketuoko ki Israel Kepenuopfü uko mho ketuou za nu siedzedie pu.

² Sitse Shealtiel nuou Zerubabel mu Jozadak nuou Jeshua unie sielie di Jerusalem nu keba Ukepenuopfü kiu chü sede lavü; süki Ukepenuopfü siedzekesimiako rei unie khruohishü.

³ Süki Kerü khie Lutsa keba ahng-u Tatenai, mu Shethar-bozenai, mu uko kezemiako vor di uko ki hakemhie pu, “Supuonie nie bu ki hau chülienu, mu dahou hau pfhelienu kekuo kha nie tsü ga?”

⁴ Sümho rei sükoe uko ketso di, “Ki hau chü keba themiako za üse kiüya?”

⁵ Derei uko Kepenuopfü mhi-e Judamia phichüko gei bata, süla thedzeu Darius tsolie kemochie uko khalie kenjüta, mu kethu nu hau dzeu kelashü.

⁶ Kerü Lutsakhie keba ahng-u Tatenai, mu Shethar-bozenai, mu puo kezemiako, Kerü Lutsakhie kebako, ketsepie Kediu Darius ki keshü leshü hau;

⁷ uko ketsekeshü leshüu gei hakemhie thupie tuo: “Pie Kediu Darius ki keshü, kediu bu keviu chüliecie.

⁸ Kediu bu siliecie, süsü hiekoe Juda rüna nu, Ukepenuopfü kezhau ki nu vo; süu ketsie kezhazha pie chü, mu sei pie puo sozhako chü, mhatho hau chü menuo se mu uko dzie pie chü pevi selietazhie.

⁹ Siro hieko sünu phichüko ketso di, ‘Supuonie nieko bu ki hau chülienu, mu dahou hako pfhelienu kekuo khashü nieko tsü ga?’

¹⁰ Hiekoe uko za rei ketsoshü; süusü uko krütako za thulie di pie n pesishüketuo la.

¹¹ Siru ukoe hakemhie di hie die kelashü: ‘Hieko tei mu kijü mho Kepenuopfü kituomia, hieko teicie kekra voketa ki Israel kedi kezha puoe chü di chü tseikeshü kiu chü la ba.

¹² Derei hieko puonuokoe teigei ketuo Ukepenuopfü nou chü kemeyiewa, süla puoe uko khapie Chaldiamia, Babilon Kediu Nebukadnezar dzie nu shüwa, puoe ki hau pekawa, mu themiako teze Babilon nu tsuta.

¹³ Sizorei Babilon nu Kediu Sairos kedi chükelie teicie therie cie, Ukepenuopfü ki hau chü lalienu diekhashü.

¹⁴ Siro Ukepenuopfü kiu nu keba suna mu rakachü hiekhouko, Nebukadnezar-e Jerusalem nu keba rüsuoki nunu se tsu Babilon rüsuoki nu shüwaketako, Sairos Kediue Babilon rüsuoki nunu süko chülie, di khapie puoe puo chüpie ahng chükeshüu Sheshbazar ükecü mia puo dzie nu shü.

¹⁵ Sidi sie süu ki, “Mhabou hako pielie, di hako toupfü vo Jerusalem nu keba rüsuokiu nu shüwalie, tsiu Kepenuopfü kiu puo tha nu chü laliecie.”

¹⁶ Süki Sheshbazar ükecüu vor, di Jerusalem nu keba Ukepenuopfü ki mvüdzeu dzeshü; sidi süteiki nu vor tsie ketso süu chü tuoya zo, mu chü tseilie mo ba zoluo.’

¹⁷ Süla kediu puo neituo üro, kediu leshü kengupie keba kiu, Babilon nu kebau nu pfhücie, sidi Kediu Sairos Jerusalem nu Ukepenuopfü kiu chünukeshü die khakeshü ketho mo mo shi mehocie. Siro kediu bu hau nyie la puo keneiu chüpie hieko gei shüliecie.”