Ezra 4 - Angami Naga CL (Re-edited) Bible (BSI)

Ngumvüko Mhatho-u Khakecü

¹ Juda mu Benjamin ngumvükoe miadie kechü nunu la vorkelieko nuosenuoyiekoe rüsuoki puo chüpie Israel Kepenuopfü Jihova tsütuo ükezhü silie tse,

² ukoe Zerubabel mu chienuo krütako ki vor di sie uko ki, “Hie bu rei nie ze di chücie, hieko rei nie kemhie nie Kepenuopfü rüsuoya zocü la, mu Asiria kediu Esar-hadon hie ze hanu vorkeshü yawinu hie rei ruosuo chüpie puo tsü vorta zo,” sita.

³ Derei Zerubabel, Jeshua mu Israel chienuo krütako pete rei uko ki, “Ki chüpie hieko Kepenuopfü tsüketuotsa we nie hie ze mhachüketuo ba puorei jü; hie thuo hie rübei di Persia kediu Sairos kepu tuoi chüpie Jihova, Israel Kepenuopfü tsütuo,” sita.

⁴ Süsie kijü sünu themiakoe Juda themiako dzie chü kethachüwa di uko bu kiu chü michieta,

⁵ siro Persia kediu Sairos teiki nu vo Persia kediu Darius kedi kechü ketso theso pie mia ketarhoko so di uko kebvü tuo tso.

⁶ Sidi Ahasurus kedi teiki, puo dikelie therieki, ukoe Juda mu Jerusalem nu kelhouko pejokecü leshü thupie puo tsü.

⁷ Siro Artaxerxes teiki, Bishlam, Mithredat, Tabil mu uko zemiakoe leshü thupie Persia Kediu Artaxerxes tsü, leshüu Aramaik die nu thu di thuyie chü sashü.

⁸ Rehum kediu kekhruohiu mu Shimshai leshükesiu Jerusalem petsou di hamhiekecü thupie kediu Artaxerxes tsü.

⁹ (Rehum kediu kekhruohiu mu Shimshai leshükesiu mu uko kezeko, capiko, thesoukechüko, kezhako, Persiako, Erekmiako, Babilonko, Susa themia, süusü Elamko,

¹⁰ mu seyie kekreiko pehüu kezhau Osnapar-e uko tepie ketsewa di uko bu vo Samaria nadiko mu kerüu khie lutsatie kijü kekreiko nu lhouketakoe leshü thushü.

¹¹ Mu uko ketsekeshü leshüu hau): “Artaxerxes kediu ki keshü: N kituoko, Kerüu Lutsakhie themiako n kelushüzhie.

¹² Tsie kediu bu siliecie, Judamia n kinu hieko ki kevorko Jerusalem nu vote. Ukoe mia perhiepetsoukecü, zekesuo rünau chü lazhie; uko puo dahouko, mu puo mvüdzeko chü kesa lazhie.

¹³ Tsie kediu bu siliecie, mhanuü rüna hau chülieta mu puo dahouko chü tseilieta ro, ukoe khezhanuo, thekhruo morei cha nyieko rei khruoshü motatuo, sidi kediu kinyi bie petsawatuo.

¹⁴ Tsie rei kediu ki nu metsie hie yachüya mu süla kediu rhu kemo mhatho meho zo keba puotou mo, süla hie kediu pesishütuoü ketseshüzhie;

¹⁵ sidi n bu n puonuoko dze thupie ketuo leshüu nunu thedzeko pfhülieketuo la. Siro noe thedzeko thupie ketuo leshüdau nu rüna hau mia perhiepetsou, siro kediu mu rünako bie pesuoyakezha puo, siro thiedzü sünu kezekesuo pesieshüya ükecü niekoe silietuo, mu süla rüna hau pekawatakecü silietuo.

¹⁶ Hieko süla kediu pesishüya, mhanuü rüna hau chü lalie, mu puo dahouko chü tsei lakelie sie, noe Kerü Lutsatie kevo kijü nu n ya puorei tuo motatuo.”

¹⁷ Sitse kediu uko die kela di sie, “Pie kediu khro kezhau Rehum, Shimshai leshükesiu, Samaria mu Kerü Lutsakhie ketuo themia kekrei uko zemiako ki keshü, keviu chüliecie.

¹⁸ Mu tsie nieko ketsepie hie ketsü leshüu phrü menuopie a kieshüte.

¹⁹ Ae diekhashü, sidi vo pfhüwate, süla thiedzü rüna hau sie kedimia perhie, siro mia petsoukecü tsiu sorkari perhiekecü ngulie.

²⁰ Thiedzü kedi kekuo kro puoe Jerusalem mho di, sükoe Kerüu Lutsakhie keba pete mho di, tsiu khezhanuo, thekhruo mu cha nyie khruopie uko tsü vor zo.

²¹ Süla themia hako kekhawatalie, mu a kinu die ngulie kemochie rüna hau chü la motalie.

²² Nieko hau chüwa beicie. Kedipuo la üdi kediu bie pechütieya ga?”

²³ Sitse Kediu Artaxerxes leshüu Rehum, Shimshai leshükesiu, siro uko kezemiako mhodzü phrüshü, ukoe rükri Jerusalem nu keba Judako ki kho, sidi uko kemvü chü di kekuo se uko khawa.

²⁴ Sidi Jerusalem nu Kepenuopfü ki mhatho-u, Persia Kediu Darius dikelie teicie kenie ketso khawata.