Ezra 3 - Angami Naga CL (Re-edited) Bible (BSI)

Jihova Rüsuo Sede Lakelie

¹ Siro khrü thenieu vorlie, mu Israelko u rünako nu lhoulieta tse, ukoe puo chü vor Jerusalem nu kengulie.

² Sitse Jozadak nuou Jeshua mu puo keze zievoko siro Shealtiel nuou Zerubabel mu puo siezedzürieko keze sielie, di Israel Kepenuopfü ruosuobau chüketuo dojülie, Mosa Ukepenuopfü themiaue pukeshü zho nu tuoi kethe ruosuo chüketuo la.

³ Sidi ukoe ruosuobau khapie puo ba gei shülie; kekreilamonyü ukoe uko zanuoko preikecü la. Sidi ukoe sü geinu kethe ruosuo chüpie Jihova tsü, khisetheva ruosuo chüya,

⁴ siro uko pruunyi nyi, süu thupie ketuo mhiei di, sidi teisonhie ruosuo khashü, süu chünukeshüu medzi di teisonhie chü morokesuou ze di chü.

⁵ Süsie khashü seiyakezha kethe ruosuou chü, süusü khrülhou ki mu Jihova kemesa nyi pete puotei puo penyi di chü tuoyakezha pete, mu themia kehoupuorei puo thuo puo nei di khapie Jihova tsü.

⁶ Khrü thenieu zha puo nhie nu ukoe mha thepie Jihova tsü sedeta. Sizo shierei Jihova rüsuokiu mvüdzeko dzeshülie mo zoluo.

⁷ Siro ukoe priesa pie ketsie mistiri mu sei mistirimia tsüwa; siro kecükekrie mu tier pie Sidonmia mu Turmia tsü di, uko bu Lebanon nunu sedarbo se vor dzükezha nu Jopa nu shü, uko Persia Kediu Sairos kinu ngukelie kemhiei.

Kerüsuoki Mvüdzeu Dzekelie

⁸ Süsie uko Jerusalem nu uko Kepenuopfü kiu nu vorkelie cie kenieu cie khrü kenieu nu Shealtiel nuou Zerubabel mu Jozadak nuou Jeshua, unie themia kekrei zievoko mu Levimiako mu miadie chü tuo di la Jerusalem nu vorkelie pete ze di Jihova kiu mhatho-u chü sedelie. Unie Levimia u kelhouzha cie mepfü mu sümhoko bu Jihova ki nu mhathoko mehoketuo la uko pethoshüwa.

⁹ Siro Jeshua mu puo nuo thepfuko tsiu puo siezedzürieko mu Kadmiel mu puo nuo thepfuko Binui mu Hodavia, siro Juda nuo thepfuko Henadad mu puo nuo thepfuko, Levimia hako sie Ukepenuopfü kiu mhathoko meholie.

¹⁰ Sidi ki kechükoe Jihova kiu mvüdzeko dzeshülieta tse, Israel kediu David uko ki pupie kezhü tuoi zievoko bu u pfheneiko se di ketsü khoupie Jihova tsheshüketuo la u thuo u tha nu thalie, siro Leviko, Asaf nuo thepfukoe simbalko se di thalie.

¹¹ Sidi ukoe chieli ketsiepie Jihova tshe, tsiu puo thezie di sie, “Puoe vicü la, puo kekhrie rüdirüli kemo se Israel ngumezhiekeshüe kechachie bayacü la.” Siro themia pete Jihova tshekeshü ki, shie peto seshü, kekreilamonyü Jihova kiu mvüdzeko dzeshülieketa la.

¹² Derei zievoko kekra, Leviko kekra, siro kikru krüko kekra mu phichümia thiedzü ki kerieu kenguko, u mhinguki nu hau mvü dzeshülieta tse, krakhouita; themia kekra rei u kenei pfü shie tha zo shierei.

¹³ Siketa la themiakoe kenei pfhe mu kekra pfhe si kekreilie kenjüta, kekreilamonyü themiakoe shie kemerie chüta, mu süu kepetse nu rei uko pfhe sita.