Ezra 1 - Angami Naga CL (Re-edited) Bible (BSI)

Sairos-e Pesikeshü

¹ Persia kediu Sairos kedi chükelie teicie therie cie Jihova Jeremia tie nunu pukeshü chü tseilieketuo la, Jihovae Persia kediu nou chüshü, süki puoe puo kedirüvie pete pesikeshü, mu thukeshü hamhie:

² “Persia kediu Sairos-e puya: Jihova teigei keba Ukepenuopfüe kijü nu keba kedirüvie pete pie a tsüwate, mu puoe a bu Juda nu keba Jerusalem nu ki puo chüpie puo tsünuya.

³ Nieko donu ketuo puo themia pete puo Kepenuopfü bu puo ze ketuou chülie, puo bu Juda nu keba Jerusalem nu khocie, di Jihova Israel Kepenuopfü kiu chülie, puoe Jerusalem nu bayakecü Kepenuopfü.

⁴ Siro themia peshapie keba pete, thechü kehourapuo tuo rei, u ketuora themiako bu raka, suna, mhanya mu khunuo khapie khruohilie, Jerusalem nu keba Kepenuopfü kiu la keneisephra tsügei rei khashücie.”

Miadie Chü Ketuoko la Jerusalem nu Vorkelie

⁵ Sitse Juda mu Benjamin kikru krüko mu zievoko, siro Levimiako, mu Ukepenuopfü thuo themia nou hükeshü pete, Jerusalem nu keba Jihova kiu chütuoü sieta.

⁶ Siro uko siezanuomia pete rei u thuo u nei di khakeshü tsügei rei rakachü liko, suna, mhanya siro khunuo mu mhama kere khashü di uko dzie chü kemeteishü.

⁷ Sizomonyü kediu Sairos-e Nebukadnezar Jerusalem nu Jihova kiu liko se vo puo rhuoko kiko nu shüpie bakewako se vorlie.

⁸ Sükosü Persia kediu Sairos-e puo kinyikeseu Mithredat bu se vornushü, mu süko phrüpie Juda kedinuou Sheshbazar tsüwanushü.

⁹ Süko phrü kevo hamhie: Suna dzieteikhou ser, rakachü dzieteikhou nyie puo, zhietenuo mepfüethepfü;

¹⁰ Suna khou ser, rakachü khou krie dia di ker mu mhabou kekrei nyie puo.

¹¹ Suna mu rakachü pie kechü mhabou pete nyie pengou di krie dia, Sheshbazar-e mha hako mu miadie chüketako sa di Babilon nunu ze Jerusalem nu vor.