Ezekiel 9 - Angami Naga CL (Re-edited) Bible (BSI)

Terhuorhi Kerüsuoko Dukhrikecü

¹ Süsie puoe a nyie kinu shie peto se di sie, “Penuo vorlie, nie nadiu pekayakezhako, mia puopuokecü bu puo dzie nu mha pekaketuo rünyie seliecie.”

² Sitse mia sorou kharu peso-u cha, pesotsa kebau ze di par, mia puopuokecü puo dzie nu mia kedukhri rünyie se tuo; uko donu linenpfhe kedzie puo tuo, kethukerubou puo se puo khieki tuo. Uko le di mese pie kechü ruosuoba khieki thata.

³ Mu harie, Israel Kepenuopfü zapuzayieu cherub bakecüu geinu sieta, di kiu kicie nu leta. Sitse Jihovae linen pfhe kedzieu, kethukerubou puo seketuou kieshü,

⁴ sidi sie puo ki, “Nadiu pfüthe vocie, Jerusalem pfüthe vocie, sidi sünu mha kerütsekecüko la thenou mezhie tsiu krayakezhamia kehoupuo teikhie gei rei zasi vüshülie.”

⁵ Siro puo a nyie kinu kekreiko ki, “Puo siemedzi nadiu pfüthe vocie, sidi dukhriwalie; nie mhi bu mia ngu jokewa chü hie, tsiu mia ngumezhieta hie.

⁶ Ketsamia, khriesamia mu rüümia, nhicumia tsiu thenupfümia shierei dukhri lotsowalie, derei u gei zasi kebamia we nyü hie, siro a kemesa chüu nunu sedeliecie.” Süla uko kiu mhodzünu ketha pehüko geinu sedeta.

⁷ Sitse puo uko ki, “Kiu bie perhuwalie, mu dukhrikewako pie kitiezhau ketshu chüwaliecie. Tuoshülie!” Süla uko tuo pra di nadiu nu themiako dukhri vota.

⁸ Uko mia dukhri vota sidi a rübei zota, sitse a tetsu zhüta tsiu kra di sie, “He-i, Niepuu Jihova! No n noupfhü miu pie Jerusalem gei keshü ki Israel peshapie kebako pete pekawatatieya memu?”

⁹ Sitse puo a ki, “Israel mu Juda kiu mha kesuo kechü zhathorte, siro kijüu thezie kepekru bu tshupfü bate tsiu nadiu thenoukere bu tshupfü; kekreilamonyü uko, ‘Jihovae kijüu khawate tsiu Jihovae nguya mo,’ si baya.

¹⁰ Derei a la we, a mhi mia ngu jowalie lho morei a mia ngumezhielie lho, derei a uko mhathoko pie uko tsügei shütuo.”

¹¹ Sitse themia linenpfhe dzie ketuo kethukerubou se ketuou la vor di pucü, “No a ki diekhakeshü mhiei a chüwate.”