Ezekiel 8 - Angami Naga CL (Re-edited) Bible (BSI)

Rüsuoki nu Mha Kerütsekecüko

¹ Teicie sorouu cie, khrü sorouu nu zha pengou nhie a kinu ba, mu Judamia phichüko a mhodzünu ba, Niepuu Jihova dzie a gei tsur.

² Sitse a mehoshü, ru themia rhi mhiekecü puo ba, puo chieca khrotsa mi kemhie, tsiu puo chieca pesotsa thegi kemephrie kemhie di ziekruoi ba.

³ Süu themia dzie tuoikecü puo se par sidi a tsütha khro puo geinu a teshülieta; sitse ruopfüu a toupie kijü mu tei nie donu sieta, sidi Ukepenuopfü mha pie a pengukecü nunu a ze Jerusalem nu pesotsa va keba kitiezha nu kele kharuu nu, mia ngu u rokecü terhuorhi kebachüu, mia chüpie mia bu u rolieyakezhau nu vor.

⁴ Siro Israel Kepenuopfü zapuzayie kechüu sünu ba, a razha nunu kengu ziemho-u kemhiecü puo.

⁵ Sitse Ukepenuopfüe sie a ki, “He-i themiau, n mhi pfüsie di pesotsa kevatsa chau mehoshücie.” Süla ae a mhi pfüsie pesotsa mehoshü ru sünu pesotsa ruosuobau kikha keleu ki mia ngu u rokecü miarhiu ba,

⁶ Sitse puo a ki, “Themiau, uko kedipuo chü ba shikecü no ngu mo? Israel kiue mha kerütsekecü, kemeriekecüko, a bu kemesachü therhietatuo üdi a whuo keba ngu mo? No mha kerütsekecü zhakuokecü ngutuo.”

⁷ Sidi puoe a ze kitiezhau care ki vor; sidi a meho sie tse, sozha gei kecie puo ba.

⁸ Sitse puo a ki, “Themiau, sozhau hophalie,” sidi a sozhau hophalie tse, care puo keba ngulie.

⁹ Sitse puo a ki, “Tuo lecie, sidi uko hanunu mha kesuo thenga kerütse chüyakezhako mehoshücie.”

¹⁰ Süla a lelie di mehoshü, ru sünu, sozha lutsahatsa pete gei, gou tuoyakezha khunuo pete, mu khunuo kerütsekecüko, tsiu Israel kinumia terhuorhiko pete rhipie zha.

¹¹ Siro süko mhodzünu Israel kinuko pehüko mia hiethenie tha, tsiu Shafan Jazania nuou uko donu tha, mia puopuokecü puo dzie nu kethengu kethebou se, mu kethengu thekeshü reu kimhou chü khu sieta.

¹² Sitse puo a ki, “Themiau, Israel kinuko pehüko kezei nunu kedipuo chüya shikecü, mia puopuokecüu kibou nu terhuorhiko keba no ngushüta die? Kekreilamonyü uko pukecü, ‘Jihova hie nguya mo, Jihova kijüu khawate, isiya.’ ”

¹³ Puo a ki pu sakecü, “No uko haki rei mha kerütsekecü kechü ngu satuo.”

¹⁴ Sidi puo a ze care pesotsa Jihova kiu kikha ki vor; mu sünu thenupfüko Tamuz la kra ba.

¹⁵ Sitse puo a ki, “He-i themiau, no hau ngu mo? No tsie rei haki kerütsekuokecü ngu satuo ho.”

¹⁶ Süsie puoe a ze Jihova kitiezha metsuou nu vor; ru sünu, Jihova rüsuokiu kikha ki, kifükhro mu ruosuobau nie donu, mia mepfüepengou mese rünoupie Jihova rüsuokiu tsü, tsiu uko zie niathutsa petsou, sidi uko niathutsa petsou di niaki rüsuo ba.

¹⁷ Sitse puo a ki, “He-i themiau, no hau ngu mo? Juda kinuko hanunu mha kerütse chükecü ha suothor mo üme? Uko mha pekakecü pie kijüu ketshu chü, sidi a nouyie chü pekrakuozhütuo me? Harie, ukoe seico-u pie uko nyhü nu shüpfü tuoya!

¹⁸ Süla a rei nouyie se mhachütuo; a mhi uko ngu jowalie lho, morei ngumezhielie lho, tsiu uko thuo peto se di a bu si zotuoü shierei, a uko pfhe rünyülie lho,” sita.