Ezekiel 7 - Angami Naga CL (Re-edited) Bible (BSI)

Kepeka Vorketuo

¹ Jihova die a ki vor di sie:

² He-i, no themiau, Niepuu Jihovae puya, Israel kijüu ki: Puo thela puo! Puo thelau kijü ke diako gei vote.

³ Tsie puo thelau n gei vorte, a nouyieu pie n gei shütuo; n zhoko ki ze a n dienya kecütuo, tsiu no kerütsekecü pete la a siazha kha n tsütuo.

⁴ A mhi n ngu jowalie lho, a mia ngumezhielie lho, a n zhoko ki ze siazha kha n tsütuo, no kerütsekecüko n donu keba ki. Sitse no ae Jihova zo ücü silietuo.

⁵ Niepuu Jihovae puya: Kepeka sie kepeka! Harie, süu vorzhie.

⁶ Puo thela vorte, thelau vorte. Süu n petsoutuoü sierte; harie, süu vorzhie.

⁷ N kepeka n ki vorte. He-i kijü nu kelhouko. Puoteiu vorte, teisozhau penuote, kemezhie ketuou, kijüthouko geinu u nei kebaulie lho.

⁸ Tsie mhai di a nouyie rupie n gei shütuo; ae a nouyieu pie n petsoutuo. Ae n rüli rhi nunu n nyie kecütuo, sidi no kerütsekecüko pete la n siazha khashütuo.

⁹ A mhi n ngu jowalie lho, ae mia ngumezhielie lho. A n rüli rhi nunu n nyie kecütuo, nie kerütsekecüko nie donu keba ki. Sitse vüshüyakezhau sü a Jihova zo ücü noe silietuo.

¹⁰ Harie, teisozhau! Harie, süu vorzhie! N kepekau tuote. Ketheu pou rülha bate, kemiakokecüu we bate.

¹¹ Huoniehuo biekecüe kelhiecü the mevite. Uko puorei balie lho, u ketshukelhuo rei, kinyi rei, uko donu meyiekecü rei balie lho.

¹² Puoteiu vorte, teisozhau penuo vorzhie; mha kekhrümia bu u nei hie, morei mha kezemia bu rei thekrü chü hie, noupfhü uko krodi peteu gei batacü la.

¹³ Mha kezeko uko rhei keba chie uko zekewau nu la volie lho. Kekreilamonyü ziemho-u krodi pete la zo, mu süu kela lalie kenjü. Uko kesuo kechü la uko pelhou se balie lhote.

¹⁴ Uko ketsüu khoushüte mu mha pete dojüliete; derei miapuorei terhü nu vo mo, kekreilamonyü a nouyieu uko krodi gei baketa la.

¹⁵ Zhiechau chazou ba, thepetheruo mu pekriekecü puo nu ba; lie nu ketuomia zhiecha geinu siatatuo; nadi nu kebako pekrie mu thepetheruo bu mezulietuo.

¹⁶ Mia huo talie, di rheilie zorei ukoe razhako nu mekhruko tuoi ba di kijüthouko geinu ngulietuo, sidi uko pete rei u kesuo kechü la meheimelo batatuo.

¹⁷ Thedzie pete thachütatuo, tsiu khoudza pete dzü mhietatuo.

¹⁸ Ukoe gakhropfhe dzietatuo, kemeriekecü thuo uko whelietuo. Thezie pete rei mengatatuo, tsiu uko pete u tsü pietatuo.

¹⁹ Ukoe rakachü kelhoupie chaü nu shüwatuo, uko sunaü mesa mo ütatuo. Jihova teisozha nhie uko rakachü mu suna uko kelalie motatuo. Uko süu se di uko kemerü kelhuo morei u va ketshu chülie lho. Kekreilamonyü süu uko kesuo kechü phi kemesü puota zokecü la.

²⁰ Siro uko rütsonyie kezivi nunu, uko süu la kemelhayakezha nunu, uko süko pie kerütsekecü terhuorhiko chülieya, thiyakezha uko vieko chülie; süla ae süu pie u la mha mesa kemo puo chüwatuo.

²¹ Ae süu khapie ketakelie vie mhie di rüsomia tsüwatuo, pekakelie vie puo chü di pie kijü nu kerüzhüko tsüwatuo; sidi uko süu bie perhuwatuo.

²² A uko kinu a zie kereilietuo, uko bu ae rhuyakezha thechüu bie perhuwaketuo la; sekecümia sünu letuo, sidi uko süu perhuwatuo.

²³ Thegiro chülie! Kekreilamonyü kijü nu thezie pekrukecü kephouma thuo tshupfü bate; nadiu zhosuo thuo tshute.

²⁴ A seyie kesuothoko ze vor di süko bu uko kiko welietuo. A themia kekuomia kemelhaketuo chü pejüwatuo, sidi uko thechü kemesako perhuwatuo.

²⁵ Kemezhiekecü kevor ki, uko kezekevi pfhütuo, derei puorei ngulie lho.

²⁶ Kepeka sie kepeka, diekrie tsügei diekrie; sitse ukoe siedzekesimia kinu ziemho pfhü sietuo; kepethakecü zievo-u kinu tuo motatuo, tsiu phichümia ketarhokecü tuo motatuo.

²⁷ Kediu kratuo, kedinuou thezie kejü pie puo pfhenei chütuo, mu kijü nu themia dzieko petatuo. A uko zhoko tuoikecü chüpie uko gei shütuo; uko capiko tuoi di uko cako catuo. Sitse uko ae Jihova ücü silietuo.