Ezekiel 6 - Angami Naga CL (Re-edited) Bible (BSI)

Israelko Terhuorhi Kerüsuo Pejokeshü

¹ Jihova die a ki vor di sie:

² He-i themiau, n zie pie Israel kijüthouko kitsa valie di uko petsoukecü siedzedie pushülie.

³ Sidi sie, nieko Israel kijüthouko, Niepuu Jihova die rünyüliecie! Niepuu Jihovae puya: Kijüthou kerükrieko ki, tsiu kijütseiko ki, kerüko ki, tsiu razhako ki: A a thuo zhiecha pie n gei vortuo, sidi a nie thechü kerükrieko pekawatuo.

⁴ Nieko ruosuobako vawa mu kethengu thako bietshebietshawatuo mu a nieko dukhrikewako kelhoupie nie terhuorhiko mhodzünu shüwatuo.

⁵ Ae Israel siaketako mo pie uko terhuorhiko mhodzünu zhüwatuo; mu nieko ruko kezapie nieko ruosuobako gei tshuwatuo.

⁶ Nie kehourapuo lhou zorei, nie rünako methuota siro nie thechü kerükrieko katatuo, sidi nieko ruosuobako kemethuo chü tsiu ruotatuo, nie terhuorhiko bietshebietsha mu pekawa, nie kethengu kethe thako dathewa, mu nieko mhathoko bie pejüwatatuo.

⁷ Siro dukhrikewako nieko donu tetsutatuo; sitse nie ae Niepuu Jihova ücü silietuo.

⁸ Derei a huomia lhieshütuo. Nieko huomia zhiecha nu talie di rünako nu cüre votatuo.

⁹ Süki takelieko seyieko donu miadie chüketuora nu a rükralietuo, kimhie di uko nou nu thethe lie di a kinu rüreita, di a nou bie pesuowa, mu uko mhi rüyo di uko terhuorhiko ze rüge tuoketa la uko bietshebietshawate shikecü rükralietuo, sitse ukoe kerütsekecü pete chükecü kesuoko la uko thuo uko ngu mecütatuo.

¹⁰ Sitse uko ae Jihova ücü silietuo; ae mha kesuo hau uko gei chüshütuo ükecü pukeshü thedo chüta mo ükecü silietuo.

¹¹ Niepuu Jihovae puya: Dziedalie mu phideshülie, sidi sie: Aya, Israel kiu mha kerütse chükecüko we ce, chülietie! Ukoe zhiecha geinu, pekrie geinu mu thepe geinu tetsutaketuo la.

¹² Kepetse nu ketuomia thepetheruo geinu siatatuo; kepenuo nu ketuomia zhiecha geinu sia; tsiu peshakelie mu lhiekeshü kehoupuorei pekrie geinu siatatuo. Hakemhie di ae uko gei a nouyieu chü tseiwatuo.

¹³ Sidi nie donu dukhriwakecüko uko ruosuobako khieümhoura uko terhuorhiko donu kijükhru kerükrie pete gei, tsiu kijüthou mezü pete gei, tsiu sei kepejo pete khro, mu phrienyü dei se kebako khro, uko kethengu thepie uko terhuorhiko tsüyakezha thechüko ketshu chükelie ki, uko ae Jihova ükecü silietuo.

¹⁴ Ae a dzie yhapie uko petsoutuo, sidi rayha nunu vo Ribla ketso uko lhou kebachü kehourapuorei chü kemethuowa mu pekawatuo. Sitse uko ae Jihova ücü silietuo.